Ashtu si në protestat e mëparshme të opozitës, edhe ditën e nesërme kryeministri Edi Rama ka urdhëruar masa ekstreme.
Kamera sigurie, dron, agjentë civilë, 1600 efektivë policie, automjete të hedhjes së ujit, autoblinda dhe Garda e Republikës do të blindojnë nga mëngjesi i nesërm Tiranën, për shkak të protestës së opozitës, që do të nisë në orën 11:00, para Kryeministrisë.
I njëjti plan masash do të jetë në gatishmëri në të gjitha komisariat, që prej mbrëmjes së sotme e deri në mbylljen e protestës, e cila nuk ka një orar përfundimi.
Nga oborri i Kryeministrisë është hequr kërpudha e dëmtuar nga protesta e 16 shkurtit dhe është përforcuar rrethimi i ndriçuesit te hyrja e selisë së qeverisë.
Ndërsa për të shmangur ngjitjen e protestuesve, siç ndodhi më 16 shkurt kur u këputën megafonët e policisë, shtyllat ku janë vendosur kamerat e sigurisë janë lyer me graso.
Ndërkohë, pritet që pjesë e masave të policisë të jetë bllokimi i qarkullimit në rrugën ‘Ismail Qemali’, ‘Ibrahim Rugova’ lidhja me bulevardin, ura e Lanës nga Ministria e Brendshme deri te Presidenca, aty ku do të ndalohet dhe parkimi i mjeteve.