Kryetari i Partisë Demokratike, Lulzim Basha iu ka dërguar pasditen e djeshme një mesazh anëtarëve të Kryesisë së PD-së dhe krerëve të degëve të kësaj force politike.
Përmes një porosie të qartë, tekstin e të cilës e ka siguruar “Balkanweb”, lideri i PD-së kërkon ndihmën e tyre, kur na ndajnë 3 muaj nga zgjedhjet e 25 Prillit.
Rrjetet sociale, thotë kryedemokrati, në kohën e pandemisë, por edhe për faktin se shumë media nuk e pasqyrojnë, mbeten mjet i rëndësishëm për shpërndarjen e mesazheve drejt qytetarëve. Ndaj, ju kërkon të bashkëpunojnë dhe ndajnë në profilet e tyre postimet e PD, në mënyrë që të shpërndahen dhe rishpërndahen sa më shumë.
Mesazhi i plotë i Bashës:
“Të dashur miq dhe bashkpunëtorë! Siç e dini, për shkak të kushteve që dikton pandemia por edhe diktatit që pushteti ka mbi shumë media në vend, rrjetet sociale mbeten një mjet i rëndësishëm për shpërndarjen e mesazheve tona tek qytetarët.
Për këtë qëllim është i rëndësishëm bashkëpunimi juaj për të ndarë dhe shpërndarë në profilet tuaja, në rrjetet sociale, veçanërisht, mesazhet dhe postimet tona, në mënyrë që ato të ndiqen, rishpërndahen e lexohen nga sa më shumë qytetarë. Faleminderit dhe punë të mbarë”, thuhet në mesazh.
