Aktualitet16 Qershor 2024, 14:25

ILD fut "në sitë" prokuroren e Lezhës, ndryshoi veprën penale për punonjësin e gjykatës

Shkruar nga Pamfleti

ILD fut "në sitë" prokuroren e Lezhës, ndryshoi

Inspektoriati i Lartë i Drejtësisë ka nisur verifikimet ndaj prokurores së Lezhës Irena Sufaj, me dyshimin se ka shkelur ligjin.

Bëhet fjalë për një proçedim penal të goditjes për shkak të detyrës të një punonjësi gjykate, ngjarje e ndodhur në muajin tetor të vitit 2023.

Për rastin në fjalë një ditë para përfundimit të afatit të hetimeve prokurorja e Lezhës Irena Sufaj, ka vendosur ndryshimin e cilësimit juridik të veprës penale nga “Goditja për shkak të detyrës” parashikuar nga neni 237 i Kodit Penal, në nenin 90 i Kodit Penal “Dëmtime të tjera me dashje” dhe në kundërshtim me ligjin këtë vendim prokurorja nuk ja ka komunikuar viktimës së veprës penale.

Po ashtu një ditë pasi kishte ndryshuar cilësimin juridik të vepres penale dhe pa ja komunikuar këtë vendim viktimës, prokurorja ka përfunduar hetimet dhe njëkohësisht ka vendosur pushimin e çështjes, për autorin e ngjarjes.

Referuar ligjit procedural penal, për ndryshimin e cilësimit juridik të veprës penale organi  i akuzës me marrjen e vendimit duhej të vinte në dijeni viktimën, dhe për të drejtën e njohjes me aktin si dhe sipas rastit, për të paraqitur ankim në Gjykatë, por kjo nuk ka ndodhur në rastin në fjalë.

Për këtë arsye, ky procedim penal dhe këto vendimmarrje të prokurores Irena Sufaj janë bërë objekt verifikimi nga Inspektoriati i Lartë i Drejtësisë.

Ndërkohë ky vendim është ankimuar nga i dëmtuari në gjykatë dhe pavarësisht se kanë kaluar më shumë se dy muaj ende nuk është caktuar data e zhvillimit të seancës gjyqësore, duke tejkaluar çdo afat ligjor.