Aleanca për Teatrin kallëzoi të mërkurën në Prokurorinë e Posaçme Antikorrupsion, ministrin e Brendshëm, Bledi Çuçi, drejtorin e Policisë së Shtetit, Ardi Veliu, drejtorin e SHÇBA-së, Muhamet Rrumbullaku, dhe zyrtarë të tjerë të policisë.
Ata pretendojnë se policia ka ushtruar dhunë brenda komisariatit ndaj aktivistit të aleancës, Donald Martini. Në një deklaratë për mediat ata thanë se nuk do të ndalen deri sa autorët e dhunës ndaj aktivistit Martini të dalin para drejtësisë.
Regjisori Edmond Budina pohoi se policia e shtetit bashkëpunon me mafian për të ngritur kulla dhe ndalon qytetarët të protestojnë.
“Kjo është një polici politike, se kur vjen puna për të kontrolluar njerëzit e thjesht ajo vepron, në të kundërt jo, aq më tepër tani me përgjimet.Është një polici që ndalon njerëzit të protestojnë dhe lë mafiozët të ngrenë kullat e krimit.”
Ai i bëri thirrje SPAK të hetojë dhe të nxjerrë para drejtësisë të gjithë përgjegjësit.
“Ky është një kallëzim penal personal i shtetasit Donald Martini, që jo rastësisht na ka sjellë të gjithëve ne si aleancë para derës së SPAK. Ne kemi vlerësuar që kjo është një dhunë e komanduar, e mirëmenduar, dhe nuk ka pasur në fokus vetëm aktivistin e aleancës, por është një dhunë ndaj Aleancës për Teatrin.
Objekti i kallëzimit sot është dhuna e ushtruar brenda komisariatit. përgjegjës janë ministri Cuci, Ardi Veliu, drejtuesi i SHCBA, drejtues të tjerë të policisë, pasi nuk kanë marrë asnjë veprim konkret referuar kërkesave të bëra nga aktivistë të Aleancës, dhe duke mos marrë asnjë veprim konkret ato japin modelin e dhunës, i thonë cdo polici që të ushtrojnë dhunë, sepse nuk i gjen gjë.
Ushtruesit e dhunës kanë goditur Donald Martinin. Është dhuna që ushtrohet në mënyrë të vazhdueshme ndaj Aleancës për Teatrin. Ne këtu jemi për të mbështetur Donald Martinin. Edhe mua policët tentuan të më merrnin peng, por ishin këta miqtë e mi që më shpëtuan nga kthetrat e tyre. Sa herë ne vijmë në SPAK, koha na ka dhënë të drejtë”, tha ndër të tjera aktivistja Kalaja.
