Kryeprokurorja luan me afatet kohore për regjistrimin e fillimit të hetimit penal për kallëzimin e Presidentit ndaj kreut të KED. Krimet e Rënda kanë shpallur moskompentencën për hetimin, duke ia kaluar çështjen Prokurorisë së Tiranës, që ka afat deri më 10 dhjetor. Anëtarët e KED zgjidhen më 6 dhjetor nëse refuzon Meta. Prokurori i ri i Përgjithshëm zgjidhet nga Kuvendi deri më 22 dhjetor, dhe Arta Marku kërkon të përfitojë nga “qoka” që i bën mazhorancës
Kallëzimi penal i Ilir Metës për kreun e Këshillit të Emërimeve në Drejtësi, Ardian Dvorani rrezikon të “endet” dyerve të prokurorive të të gjitha shkallëve, pa e “prekur” askush me dorë.
E themi këtë, pasi Arta Marku 3 ditë pas dorëzimit të kësaj padie në Prokurorinë e Përgjithshme, e ka dorëzuar atë në Prokurorinë e Krimeve të Rënda.
Vendimi është marrë pas marrjes në shqyrtim të kallëzimit prej Kryeprokurores së përkohshme, e cila ia ka dërguar “kuti postale” Krimeve të Rënda për të nisur ose jo hetimin, pas regjistrimit të procedimit penal në ngarkim të Dvoranit për shkelje ligji, sipas pretendimeve të Metës.
Pavarësisht se kjo prokurori ka 18 ditë afat për ta shqyrtuar dosjen, mësohet se në kushtet kur nuk e ka regjistruar si procedim penal, pasi ka bërë verifikimet e duhura, e ka larguar nga vetja duke shpallur moskompetencën e saj për hetimin e akuzave të ngritura nga Presidenti Meta në drejtim të kreut të KED, Dvorani.
Prokurori i Krimeve të Renda, Klodian Braho, ka dorëzuar kallëzimin penal të Ilir Metës pranë Prokurorisë së Tiranës, që sipas Krimeve të Rënda, është kompetente për hetimin e dy veprave penale për të cilat Dvorani është akuzuar dhe kallëzuar nga Presidenti.
Duke parë këtë “ping-pong” mes prokurorive të të gjitha niveleve, të cilat refuzojnë marrjen nën hetim të Dvoranit, sipas kallëzimit të Metës, mësohet se kjo është një “lojë” e Arta Markut për t’i bërë “qokën” e radhës mazhorancës, në këmbim të zgjedhjes së saj Kryeprokurore.
Një mision i tillë i Kryeprokurores së Përkohshme realizohet përmes luajtjes me afatet kohore, për të shpëtuar kreun e KED nga përjashtimi në garën për rizgjedhjen e tij.
Në rast se Prokuroria vendos të ndjekë penalisht Dvoranin, i mbetur vetëm tashmë si anëtar i Gjykatës së Lartë, atëherë ai automatikisht përjashtohet nga rikandidimi për në KED, duke e futur në kolaps këtë të fundit.
Ligji përcakton se një person në ndjekje penale nga organi i akuzës, s’mund të kandidojë për të qenë pjesë e KED, ndërkohë që shorti për përzgjedhjen e anëtarëve të KED hidhet në dhjetor, ndërsa funksionimin ky institucion do ta nisë në fillim të vitit 2020, me një mandat 1- vjeçar.
Sipas ligjit, kandidati plotëson kushtet kur “magjistrati ose gjyqtari i Gjykatës Kushtetuese nuk është nën hetim, ose s’është dënuar më parë me vendim gjyqësor të formës së prerë për kryerjen e një vepre penale”.
Po sipas ligjit, është Presidenti i Republikës ai që, në prani të Avokatit të Popullit, përzgjedh anëtarët e KED, me short midis datës 1 dhe 5 dhjetor të çdo viti kalendarik. Por nëse këtë proces nuk e bën presidenti deri në këtë datë, atëherë fjala i mbetet Parlamentit.
Pikërisht këtë synon Arta Marku, e cila vonon marrjen nën hetim të Dvoranit, duke shfrytëzuar dhe afatin 18 ditor që i takon Prokurorisë për ta verifikuar kallëzimin dhe filluar hetimin.
Sipas përllogaritjeve, afati fundor për marrjen nën hetim nga prokuroria është 10 dhjetori, pra 5 ditë pas përfundimit të afatit kohor që Meta ka për të zgjedhur Dvoranin kryetar të KED, sepse sipas ligjit në këtë periudhë kohore ai rezulton jo nën hetim.
Por për këtë “qokë” që kërkon t’i bëjë mazhorancës Arta Marku, ka dhe përfitimin për vete. Gjithnjë duke bërë një përllogaritje kohore, Arta Marku tenton që në afatin 30 ditor që ka Parlamenti për të vendosur për emërimin e Prokurorit të ri të Përgjithshëm, lista ka shkuar sot në Kuvend, vendimi i Kuvendit ka afat fundor që të merret deri më 22 dhjetor.
Kështu që mbatja “peng” e kallëzimit të Metës për Dvoranin është brenda afatit kohor të zgjedhjes së Prokurorit të ri të Përgjithshëm për një mandat 7-vjeçar, dhe Arta Marku bën përpjekjen e fundit që të përfitojë nga ky “nder”, për të marrë 84 votat e deputetëve./Pamfleti
