Vrasja e Ridvan Ramazanit në Shkodër, duket se ka hapur serinë e një lufte të ashpër mes grupimeve më të njohura të nëntokës kriminale në këtë zonë.
46 vjeçari Ridvan Ramazani është një nga personazhet më “VIP” të ambjentit të të fortëve në të gjithë Shkodrën, kjo si për reputacionin që gëzon grupimi i tij, por edhe aktivitetin e gjerë të biznesit që zotëronte rrethi i tij.
Ridvan Ramazani, apo Ridvan Bejtja, i biri i Bejto Ramazanit, banues në fshatin Darragjat, pjesë e zonës së Nënshkodrës, ka qenë një nga emrat e njohur të gjithë zonës dhe me një aktivitet të shtrirë edhe në qytet. Atentati ndaj tij në fshatin Mushan është kryer në mënyrë tipike mafioze nga një dorë profesioniste, e deri tani nuk dihet asnjë detaj mbi këtë vrasje. Vrasja ka qenë një nga ata që quhen “punë e pastër” e sipas të gjitha gjasave kemi të bëjmë me vrasës me pagesë të nivelit shumë të lartë.
Killeri nuk ka lënë asnjë gjurmë në zonë dhe është zhdukur si një “fantazëm” .
Disa media në vend kanë nisur të hedhim pista, duke e lidhur vrasjen edhe me mundësinë e një hakmarrje me fisin “Koçia”, duke hamendësuar përshtatmërinë me ngjarjen e vrasjes së ish-bosit emblemë të krimit në Shkodër, Mir Koçia, që u vra në vitin 2012, pikërisht në një ditë si sot, pra më 28 nëntor.
Por sipas të gjitha gjasave, ky krim ka pista edhe më të gjëra se një hakmarrje e thjeshtë. Kjo, pasi Ridvan Ramazani njihet si një nga personat me lidhje shumë të fuqishme me ambjentet e narkotrafikut, me aktivitet potencial në Holandë, përkatësisht në portin e Roterdamit.
Megjithatë të gjitha pistat e mundshme nuk përjashtohen kur jemi akoma herët për të mësuar detaje mbi një ngjarje që sapo ka ndodhur.
Fakt është se Ridvan Ramazani, ishte një person me probleme dhe me emër në ambjentin e të fortëve, ai njihet gjithashtu si shumë inteligjent dhe i mprehtë, pasi deri tani e ka pasur të pastër dosjen e tij, ngaqë vepronte në hije dhe i shmangej mjeshtërisht publicitetit.
Burime të besueshme nga sherbime sekrete i thanë “Pamfleti”-t se Ridvan Ramazani ka pasur lidhje të rëndësishme politike dhe me drejtues organesh shtetërore në Shkodër, deri në nivele shumë të larta. Kaq deri tani!/Pamfeti
