Amerikanët ishin një hap para dhe i dinin të gjitha këto plane djallëzore të Ilir Metës dhe natyrisht nuk lejuan që të vinte në jetë këtë plan, me një bashkëpunim të plotë me Edi Ramën
Reforma në drejtësi padyshim që është kundërshtuar nga Ilir Meta dhe Sali Berisha që në fillimet e saj. Këtë e dinë të gjithë, ndaj nuk i kanë votuar dhe i kanë dhënë mundësinë Edi Ramës që për 4 vjet të qeverisë vetëm.
Ka qenë Edi Rama që nuk i ka leverdisur, nuk ka shpenzuar energji dhe nuk ka rrezikuar që këtë reformë ta shpejtojë e ta implementojë sa më drejtë.
Edhe pse e pati mundësinë, nuk arriti të vendosë në krye të KLGJ-së, KLP-së e Gjykatës Kushtetuese njerëz publikisht të pakontestuar e botërisht të ndershëm për të mos u sulmuar. Por ka vënë njerëz që janë afër tij, të cilët edhe pse kanë kaluar nga sita e komplikuar e ligjeve të reformës, ata janë gjithsesi larg perfektësisë apo delirësisë ç’ka ka pritur publiku shqiptar.
Nga ana tjetër, është fakt që në vonesën e ngritjes së institucioneve, ku në fillimet e saj, sidomos për strukturat e vettingut, pati një krizë kandidaturash, e në këtë krizë kontribuoi edhe mazhoranca që nuk motivoi për të kandiduar, sidomos duke frenuar të gjithë shqiptarët që janë shkolluar dhe jetojnë në perëndim.
Ndërkaq, ajo që është më e rëndë, dhe që u zbulua e u ndalua nga SHBA-ja kryesisht ishte plani që përgatiti Edi Rama me Ilir Metën për të siluruar në krye të SPAK-ut një person shumë të afërt të kreut të LSI-së.
Bëhet fjalë për Ramadan Trocin, prokurorin e ardhur nga Bulqiza, njeri të afërt të deputetit të LSI-së Përparim Spahiu, i cili u pompua për të krijuar një “hero” të luftës antikorrupsion.
Troci bëri dy hetime të bujshme siç ishte Shpëtim Gjika-kryebashkiaku i Vorës, që u bë edhe “koka e parë e turkut” e Edi Ramës dhe Ardian Fullanin, ish-Guvernatorin e Bankës ë Shqipërisë, që madje edhe u arrestua për pak kohë.
Por dihet si shkuan hetimet më pas: afera për të cilën Shpëtim Gjika u hetua ku kulmi ishte Pallati i Lulzim Bashës në Ujin e Ftohtë jo vetëm u amnistua, por u dëmshpërblye me miliona euro nga Edi Rama.
Ndërsa Ardian Fullani, jo vetëm që u lirua por mori edhe dëmshpërblim nga shteti, me të cilat shijoi pushime luksoze në Nicë të Francës çdo vit.
Në krye të Bankës së Shqipërisë, Ilir Meta emëroi një shok të klasës, duke kapur një nga institucionet më të rëndësishme të shtetit, por shumë të çmuar për të, në mënyrë që të fshehë lëvizjen e pasurisë së tij marramendëse.
E gjithsesi, njeriu i shitur në media si një “hero” i luftës së korrupsionit po bëhej gati për SPAK duke shijuar pushimet në pronat e Balilëve në Sarandë së bashku me deputetin e LSI-së.
Por ishte vetëm ngulmi i fortë i SHBA-së dhe BE-së, që në Operacionin Ndërkombëtar të Monitorimit, bënë të mundur që Troci, i cili kishte favorizuar oligarkët e minierës, të mos e kalonte vettingun.
Ai moment, realisht është koha kur Ilir Meta vendosi të prishet përfundimisht me Ramën, pasi e pa që ai ishte i pafuqishëm ndaj amerikanëve.
Duke e ditur që Adriatik Llalla ishte i mbaruar, Meta luftoi për të thjesht duke vonuar proceset. Çizmet e Monikës në seancën për Arta Markun ishin thjesht një aktrim për të përgatitur lëvizjen nën rrogoz.
Por amerikanët ishin një hap para dhe i dinin të gjitha këto plane djallëzore të Ilir Metës dhe natyrisht nuk lejuan që të vinte në jetë këtë plan, me një bashkëpunim të plotë me Edi Ramën.
Amerikanët e dinë se ai nuk është “I pafajshëm” në rrugën e Reformës, por realisht votat e mazhorancës socialiste kanë siguruar që ajo reformë të ecë përpara. Dhe pikërisht ky fakt është arsyeja e mbështetjes ndaj kryeministrit, e nëse bie Ilir Meta, e natyrisht Berisha, radhën menjëherë e ka Babloku… /Pamfleti
