Kreu i Partisë Demokratike ka hedhur akuza ndaj ministres Manastirliu, duke thënë se ajo po mundohet të fshehë statistikat e njerëzve të infektuar me Covid. Madje, Basha aludon se ka fakte që disa të vdekur nga pandemia nuk janë raportuar nga Ministria e Shëndetësisë.
“Dënoj maskaradën që po zhvillohet në Parlament, ku Ministria e Shëndetësisë po mundohet të mbulojë me shoshë dështimin e Ramës me Codiv-19. Sot kemi 493 të vdekur, kjo sipas statistikave zyrtare, që siç e dini nuk shfaqin të vërtetën. Jam në dijeni të disa rasteve të personave të vdekur me Covid, që kurrë u raportuan si të tillë. Me qëllim që të gënjejnë për numrin e viktimave, e njëjta vlen edhe për të prekurit. kur dikush ka simptoma e kërkon të bëjë testin i duhet të presë për 6 ditë e për 3 – 4 ditë për përgjigjen. Pra nga momenti i simptomave kalojnë 6 ditë, e tre ditë për përgjigjen. Në këtë mënyrë numri i të prekurve mbahet artificialisht i ulët po edhe përhapja e infeksionit mbahet i fshehtë. Arsyeja? Se Rama ka humbur kontrollin e menaxhimit”, u shpreh Basha.
