Edi Rama ishte i interesuar që Gjykata të Kushtetuese të mos funksiononte edhe disa vite për të shmangur rrëzimin e ligjeve me të cilët po plaçkit Shqipërinë, Ilir Meta i interesuar për bllokimin e Gjykatës nga frika e shkarkimit
Gjykata Kushtetuese e Shqipërisë, e boshatisur nga zbatimi i ligjit të Vetingut, do të jetë funksionale brenda vitit 2020. Ky është një nga lajmet më pozitive për shqiptarët, por një lajm i zi për kokat e politikës së Tiranës, të cilët janë bashkuar kundër ngritjes dhe funksionimit të drejtësisë së re, të cilën e shohin si rrezik për sundimin e tyre bazuar në vjedhje, mashtrime dhe krime. Prej tre vitesh, Ilir Meta, Sali Berisha dhe Edi Rama kanë bërë çdo përpjekje për të kapur Gjykatën Kushtetuese dhe për të zvarritur plotësimin e saj me anëtarë.
Herë pas herë, Gjykata Kushtetuese është bërë edhe objekt sherri publik mes tre kokave të politikës, sherr i cili ka përfunduar në Komisionin e Venecias. Komisioni ka fshikulluar si Ramën ashtu edhe Metën. Bëhet fjalë për rastin e Arta Vorpsit, e cila u propozua nga Këshilli i Emërimeve në Drejtësi, me dorën e Ardian Dvoranit, për anëtare të Gjykatës Kushtetuese.
Ilir Meta nuk pranoi Vorpsin, duke shkelur hapur ligjin dhe Kushtetutën. Në vend të Vorpsit, Meta emëroi të besuarën e tij dhe të Berishës, Marsida Xhaferllarin, mikeshë e Enkelejd Alibeajt, bashkëpunëtore e Presidentit në ish-KLD dhe avokate e qeverisë Berisha-Meta për të mbrojtur shitjen e detit Greqisë.
Arta Vorpsi shkoi të betohej tek një notere për të filluar detyrën, pasi sipas ligjit ishte anëtare e Gjykatës Kushtetuese. Megjithatë, sot Vorpsi nuk lejohet të futet në Gjykatë. Në vend të Arta Vorpsit në Kushtetuese ka hyrë Xhaferllari, e cila nuk ka kaluar Vetingun dhe është emëruar nga Ilir Meta në shkelje të ligjit.
Presidenti bëri një dallavere tjetër, duke emëruar të besuarin e tij, Bensik Muçin, pa Veting. Muçi u shkarkua më pas nga Kolegji i Vetingut, duke e zvarritur më tej plotësimin e Gjykatës Kushtetuese.
Meta, Rama dhe Berisha, kërkonin të kapnin Gjykatën Kushtetuese ose ta bllokonin. Edi Ramës i intereson kapja ose bllokimi i Gjykatës Kushtetuese nga frika e rrëzimit të ligjeve klinteliste dhe koncesioneve mafioze, më të cilat vjedh pasuritë publike në bashkëpunim me oligarkët. Rama i frikësohet një gjykate të pavarur, e cila do të hidhte poshtë dhe do shfuqizonte shumë akte të qeverisë dhe Parlamentit që janë kundër interesit publik dhe në funksion të një grupi që grabit shqiptarët. Ndërkohë që Ilir Meta është i interesuar për të kapur ose bllokuar Gjykatën Kushtetuese nga frika e shkarkimit prej saj para se t’i mbarojë mandati.
Aktualisht Gjykata Kushtetuese ka katër anëtarë. Ilir Meta dhe Sali Berisha kontrollojnë dy vota, atë të Xheferllarit dhe të Vitore Tushës. Që Gjykata Kushtetuese të funksionojë duhet të ketë të paktën pesë anëtarë. Deri në fund të vitit Gjykata Kushtetuese do të ketë të paktën 6 anëtarë. Për dy vende vakante të shpallura nga Kuvendit dhe Presidenca, Këshilli i Emërimeve në Drejtësi ka kualifikuar dy kandidatë që plotësojnë kushtet, Sonila Bejte dhe Altin Binaj.
Gjykata e Apelit ka rikthyer në garë edhe dy kandidatë të tjerë, të cilët ishin përjashtuar nga KED. Ata janë Zhaklina Peto dhe Eugen Papandile. Kuvendi, Presidenca dhe KED u vunë në lëvizje për të zhbllokuar Gjykatën Kushtetuese vetëm pas presionit të fortë të SHBA-BE. Funksionimi i Gjykatës Kushtetuese është edhe një nga kushtet për mbajtjen e konferencës së parë ndërqeveritare mes Shqipërisë dhe Brukselit, për hapjen e kapitujve të parë të negociatave.
Një rol të rëndësishëm në këtë proces ka edhe ambasadorja amerikane në Tiranë, Yuri Kim, e cila ka artikuluar disa mesazhe të forta. Ambasadorja amerikane ka kërkuar që Gjykata Kushtetuese të jetë funksionale brenda vitit 2020. Nga ana tjetër, politika dhe segmente të drejtësisë po mbajnë peng edhe funksionimin e Gjykatës së Lartë, e cila ka dy vite që nuk merr vendime./Pamfleti
