Në kulmin e pandemisë së koronavirusit, ministria e Financave firmos kalimin e shërbimit të kontrollit të pompave të karburantit dhe gazit të lëngshëm në dorën e oligarkut klient të Ramës. Urdhërohet Metrologjia që më 31 mars të dorëzojë shërbimin në dorë të “Noa Inspect”. I sillte shtetit 2-3 milionë euro në vit, tani për 20 vite do t’i sigurojë privatit 50-60 milionë euro. Pse SHBA kërkoi hetimin e koncesioneve të matësve të ujit, rezervuarëve të gazit dhe pompave të naftës të fituara po nga Gentian Sula dhe cili është shqetësimi i FMN
Gentian Sula merr zyrtarisht nën kontroll shërbimin e kontrollit ligjor të instrumenteve matëse nëpërmjet verifikimit instrumenteve shpërndarëse së karburantit dhe të gazit të lëngshëm.
Teksa pandemia e koronavirusit ka mbyllur thuajse gjithë administratën në shtëpi, sekretari i përgjithshëm i Ministrisë së Financave më 24 mars ka qënë në punë dhe ka firmosur urdhërin për Drejtorinë e Metrologjisë.
Ndërkohë që kishte deklaruar se për shkak të COVID-19 koncesionet jojetike do të anulohen, për të mbrojtur oligarkët e oborrit, Rama nënvizoi se ata që kanë nëshkruar kontratat nuk do të preken, pasi përkthehen në penalitete.
Në këtë urdhër ministria e Financave kërkon nga ky institucion të zbatojë të drejtën kontraktuale të kompanisë “Noa Inspect” që më 31 mars të këtij viti të marrë shërbimin e kontrollit të naftës dhe gazit të lëngshëm në të gjithë territorin e Shqipërisë.
Më konkretisht, sipas dokumentit që i jep Gentian Sulës, mikut të Oplsi Ramës të drejtën e ushtrimit të këtij koncesioni thuhet se “Ministria e Financave dhe Ekonomisë, në cilësinë e autoritetit kontraktues në kontratën e koncesionit nr.15326 prot, datë 21.08.2019 “Për shërbimin e kontrollit ligjor të instrumenteve matëse nëpërmjet verifikimit instrumenteve shpërndarëse të karburantit dhe të gazit të lëngshëm”, ju bën me dije se:
Pas përmbushjes së të gjitha detyrimeve kontraktuale për kryerjen e investimit dhe fillimin e shërbimit nga ana e shoqërisë koncesionare “Noa Inspeckt” shpk prej datës 31.03.2020, shërbimi i kontrollit ligjor i instrumentave të karburantit dhe gazit të lëngshëm do të fillojë të ofrohet nga shoqëria koncesonare “Noa Inspeckt” shpk.
Sa më sipër, lutemi nga ana juaj marrjen e masave për ndërprerjen e këtij shërbimi nga data e sipërcituar. Duke ju falenderuar pëer bashkëpunimin, Arjan Kraja Sekretar i Përgjithshëm”. Dokumenti ka numrin e protokollit, firmën e zyrtarit autorizues e vulën e Ministrisë së Financave.
Në këtë mënyrë Gentian Sula merr me koncesion për 20 vite me PPP një shërbim të cilësuar si “minierë ari”, pasi me shpenzime minimale i ka sjellë shtetit shqiptar një fitim prej 2-3 milionë euro në vit. Ndërsa “Noa inspect” pritet të fitojë për 20 vite 50-60 milionë euro nga ky shërbim.
Nga ana tjetër nuk është bërë i ditur fakti se sa do të kushtojë një shërbim i tillë tashmë tek privati. Parashikohet të ketë një rritje drastike, pasi kompania private ka hyrë për të fituar.
Po si arriti miku Gentian Sula të merrte koncesionin e kontrollit të pompave të naftës dhe gazit!
Projekti koncesionar nisi në dhjetor 2016 me një propozim të pakërkuar të kompanisë “Noa”, e cila u ofrua të zëvendësonte drejtorinë e Metrologjisë në kryerjen e kontrollit të distributorëve të karburanteve.
Një vit e gjysmë pas propozimit, kompania Gentian Sulës u shpërblye me bonus, një praktikë tashmë e njohur e qeverisë “Rama” me referencë ligjin për koncesionet me PPP, duke treguar qartë se fituesi ishte i paracaktuar. Aktualisht, deri më 31 mars kontrollin e pompave të karburanteve e realizon me sukses Drejtoria e Përgjithshme e Metrologjisë, e cila arkëton nga ky shërbim 2 deri në 3 milionë euro në vit.
Pavarësisht fitimit dhe mungesës së ankesave nga ana e shpërndarësve të naftës në të gjithë vendin ndaj Meterologjisë, qeveria nuk e la këtë shërbim në dorë të shtetit por e kaloi tek privati. Kjo ka shtuar dyshimet për ekzistencën e një pushtetari të lartë pas firmës fituese. Dhe në të vërtetë bëhet e ditur se pas Gentian Sulës dyshohet se qëndron Olsi Rama, vëllai i kryeministrit.
Kompania zvicerane “Penzoil Trading SA” në ankesën e paraqitur pranë Komisionit të Prokurimit Publik nënvizon se ka shkelje. Teksa nuk gjeti zgjidhje këtu, kompania rivale e hodhi çështjen në Gjykatën Administrative, e cila nuk dha një vendim të formës së prerë!
Dihet se si kanë funksionuar gjykatat tek ne, por ky “dyzim” shërbeu për ministren e Financave dhe Ekonomisë Anila Denaj që të shprehej se duhej shpallur fituesi “Noa Control”. Madje Denaj sqaroi dhe zërat për një rritje të çmimit të naftës.
Por nuk është shërbimi i vetëm i “Noa Control” që po jepet nga qeveria e Edi Ramës. Kështu, nga viti 2015 kur u themelua dhe operon në tregun shqiptar, “Noa Control” ka siguruar një autorizim nga Drejtoria e Përgjithshme e Metrologjisë për kontrollin e matësave të ujit dhe për kontrollin e rezervuarëve të gazit, autorizime të dhëna nga kompania që varej nga Gjiknuri.
Në fillim të vitit “Noa Control” u bë kompania e vetme shqiptare e autorizuar nga ish ministri i Financave, Arben Ahmetaj për kontrollin teknik të ashensorëve.
Pra klienti i Ramës po merr një e nga një të gjitha shërbimet e institucioneve shqiptare, të cilat jo vetëm s’janë me humbje, por vit pas viti i kanë sjellë fitime prej miliona eurosh shtetit shqiptar.
Duke qënë se shitet apo jepet me koncesion një shërbim që është me humbje dhe jo me fitim, dhënia e këtyre shërbimeve Gentian Sulës nga Rama ka krijuar dyshimin se koncesioni është një abuzim në favor të të tretëve që qëndrojnë pas oligarkut.
Për këtë arsye dhe organet ligjzbatuese të SHBA kërkuan nga homologët shqiptarë që të hetojnë koncensionin e matësve të ujit, rezervuarëve të gazit dhe pompave të naftës. Por dhe FMN ka paraqitur shqetësimin seë këto kontrata, përveçse kanë vënë në rrezik qëndrueshmërinë financiare të vendit janë shndërruar në instrumente abuziv, që lënë hapsira të mëdha për korrupsion në kurriz të qytetarëve.
Ky është koncesioni i dytë në fushën e karburanteve, pas atij të markimit, kostot e të cilëve paguhen nga qytetarët në çmimin fundor të naftës e shkojnë si fitime për oligarkët./Pamfleti
