Në Tiranë, opozita akuzoi javë më parë drejtuesit e bashkisë së kryeqytetit, se kanë pranuar dhurata, në kundërshtim me ligjin e konfliktit të interesit. Opozita iu referua disa dokumenteve, sipas të cilave, nënkryetari i bashkisë, Arbjan Mazniku, pranoi t’i paguheshin në Spanjë hotele luksoze, nga një firmë që fiton rregullisht pjesën dërrmuese të tenderave publike të kryeqytetit.
Afro një vit më parë, në kulmin e protestës së artistëve në mbrojtje të Teatrit Kombëtar para parlamentit, ku po miratohej një ligj special bashkë me planet e firmës Fusha për të ndërtuar një seri kullash shumëkatëshe dhe një teatër të ri, nënkryetari i bashkisë së Tiranës, Arbjan Mazniku, udhëtonte drejt Spanjës në një hotel luksi, ku shpenzimet e fjetjes, së paku 900 euro në natë, i pagoi Shkëlqim Fusha, një nga përfituesit më të mëdhenj të tenderave të bashkisë së kryeqytetit.
Prokuroria e Përgjithshme ka nisur hetimet për këtë rast të shkeljes së ligjit, u njoftua ditë më parë, por ende nuk ka asnjë raport zyrtar se në ç’pikë janë hetimet nga organi i drejtuar nga Arta Marku, pinjollja e Ulsi Manjës dhe e gjithë qeverisë së Ramës.
Jo më larg se ditën e sotme, Prokuroria për një rast të ngjashëm me këtë të Maznikut, por që nuk është kaq i rëndë, kërkoi burg edhe për gjyqtarët që kishin marrë dhurata, gjithashtu edhe për dhuruesin.
Tre gjyqtarë të akuzuar se përfituan një udhëtim turistik në Barcelonë nga një biznesmen palë në një çështje gjyqësore të shqyrtuar prej tyre u përballën me akuzën e prokurorisë për korrupsion, ndërsa të akuzuarit e kanë deklaruar veten jofajtorë para gjykatës. Prokuroria kërkoi dy vjet burg për biznesmenin Namik Sadiku, i cili akuzohet se korruptoi gjyqtarët. Të katër të pandehurit kanë përfituar gjykim të shkurtuar dhe nëse shpallen fajtorë, do të marrin ulje të një të tretës së dënimit.
Sipas prokurorëve Klodian Braho dhe Arenc Çela, të katërt ndërmorrën një udhëtim në Spanjë në tetor 2014, udhëtim, që dyshohet se u pagua nga biznesmeni Namik Sadiku – pronari i një kompleksi turistik. Gjyqtarët akuzohet se dhanë një vendim të favorshëm për biznesmenin në një proces gjyqësor civil.
Këtu qëndron një kontraditë e madhe, se nëse Namik Sadiku është një biznesmen i ndershëm, i cili paratë e tij I ka vënë me djerë, tjetri, pra Mazniku, është një zyrtar i lartë i administratës së Bashkisë Tiranë, madje numri dy i Bashkisë. Për gjyqtarët medemek të korruptuar nga Sadiku kërkohet burg, ndërsa për Maznikun dhe për Fushën, Prokuroria ka javë që nuk ndihet. Provat janë të gjalla, provat janë të mjaftueshe, por Arta Marku ka mundësi të ketë marrë ndonjë urdhër që ta shkatërrojë këtë çështje hetimore.
Ky është shteti dhe drejtësia që paramendon Rama, çdo gjë e përqëndruar në dorën e tij dhe vlerësim i çështjeve hetimore me dy standarde se kur preken zyrtarët e tij dhe të Veliajt, çdo gjë kthehet përmbys, vetëm ata nuk shkojnë në burg. /Pamfleti
