Komisioni i Pavarur i Kualifikimit ka nxjerrë emrin e kandidates tjetër për në SPAK e cila do të ketë një seancë dëgjimore, ajo është Elida Kackini, prokurore pranë Prokurorisë së Rrethit Gjyqësor Tiranë.
Trupa Gjykuese përbëhet nga Valbona Sanxhaktari, Xhensila Pine, Etleda Çiftja dhe seanca do të zhvillohet më datë 16 korrik. Kackini u intervistua nga këshilli një ditë më parë, ndërkohë që nesër është dita e fundit e intervistimit.
Kujtojmë se kanë ngelur pa u intervistuar edhe Dritan Prenci, Vladimir Mara, Maksim Sota dhe Ndini Tavani. SPAK duhet të ketë të paktën 15 anëtarë për të nisur funksionimin si organ i ri i drejtësisë shqiptare.
Prokurorja Kaçkini, ka hetuar më herët katër aktivistët e shoqërisë civile, të cilët më 22 shkurt 2016 protestuan për paligjshmërinë dhe dhunimin e dhjetra ligjeve nga Bashkia Tiranë për ndërtimin e një këndi lojërash në park.
Pas disa muajsh hetimesh, prokurorja i ka kërkuar gjykatës dënimin e aktivistëve. Bëhet fjalë për aktivistët Mimoza Boçari, Ardit Mekshiqi, Orges Zani dhe Altin Kuko. Në aspektin profesional, vetëm kjo çështje mund të konsiderohet e ndjeshme që ka kaluar në duart e prokurores Kaçkini.
Por, cila është Elida Kaçkini? Kaçkini duket se ka qenë e “përkëdhelur” nga Ambasada Amerikane, e cila e ka radhitur në listën e trajnimeve të DASH-it. Prokurorja rezulton se ka marrë dieta nga Ambasada Amerikane dhe DASH, në seminarin një mujor, 17.02.2014-16.03.2014. E trajnuar nga DASH, prokurorja Kaçkini duket se e ka të hapur rrugën për t’u bërë pjesë e SPAK-ut. /Pamfleti
