Diplomatja amerikane tjetër mesazh të fortë kastës politike
Ambasadorja amerikane në Tiranë, Yuri Kim, ka kërkuar nga palët politikë të përfshira në nënshkrimin e marrëveshjes së “5 qershorit” që t’i qëndrojnë dhe të mos devijojnë.
Sipas diplomates kjo nuk është vetëm një çështje politike, kjo është një çështje nderi. Kim i rikujton opozitës jashtëparlamentare dhe maxhorancës se pavarësisht se firma e saj nuk ndodhet mbi atë marrëveshje, ajo është e mbështetur nga ambasada e SHBA.
Teksa në Komisionin e Ligjeve u diskutuan sot propozimet për Kodin e ri Zgjedhor, diplomatja amerikane thotë se ajo marrëveshje është arritur me dakordësinë e të gjithëve.
Ndër të tjera, Kim nga Himara përgëzoi opozitën për pjesmarrjen e saj dhe propozimin e draftit për miratimin e Kodit të Ri Zgjedhor, ndërsa ka këkuar që të vijojë me angazhimet.
“Në qershor Kuvendi miratoi një ligj që nuk është perfekt por do të shpjerë në drejtimin e duhur. Jam shumë e kënaqur që opozita jashtë parlamentit ka marrë përgjegjësitë e saj për të përfaqësuar popullin. E kma thënë edhe para disa ditësh që opozita të jetë e angazhuar dhe të gjitha palët të sjellë propozime që janë reale. Kam kuptuar që sot opozita ka bërë një propozim dhe jam e lumtur që PS ka thënë se do ta marrë këtë kundërpropozim dhe do të ketë një debat real për ta përfshirë. Kjo është ajo që duhet të presim nga një vend që është anëtar i NATO-s, aspiron BE-në dhe kryeson OSBE-në. 5 qershorit arriti një marrëveshje transparente dhe çdo palë që ka nënshkruar duhet t’i qëndrojë asaj sepse është çështje nderi. Nëse palët bien dakord për çështje të tjera përtej 5 qershorit ne do ta mbështesim”.
Sot Opozita e Bashkuar dorëzoi në Këshillin Politik draftin e saj për ndryshimet në Kodin Zgjedhor që përcaktojnë një hapje të listave 100%, lejimin e koalicioneve parazgjedhore dhe rregullimin e kuotës gjinore në mandate në rast se nuk është respektuar.
