Ja çfarë thoshte Ilir Meta para shqiptarëve në Parlament, kur kishte nisur pazaret për vendet e punës, hidrocentralet dhe guroret, ‘babai’ i korrupsionit përbetohej se do të luftonte korrupsionin
Dritan Prifti e publikoi video-skandalin, ku shfaqej Ilir Meta me zë dhe figurë, me një bllok pazaresh në dorë, si hajdut ordiner në janar të vitit 2011, por Prifti kishte nisur ta regjistronte në fshehtësi Metën që në fillim të vitit 2010, pas aleancës PD-LSI. Që pas ndarjes së posteve, kur Meta mori portofolin e ministrit të Jashtëm dhe të zëvendëskryeministrit, ndërsa Prifti të ministrit të Energjetikës, “Floriri” shkonte vazhdimisht në zyrën e Priftit për pazare, siç edhe konfirmon videoja.
Meta e përdorte postin e ministrit të Jashtëm si kamuflim, ndërsa në prapaskenë urdhëronte Priftin të ndante koncesionet për klientët e tij dhe të Monikës. Në zyrën e Priftit shkonte shpesh në emër të Metës, edhe i besuari i tij, Fahri Balliu, duke bërë pazare.
Por, sot do të ndalemi tek një fjalim i Ilir Metës, sapo kishte nisur aleancën me Berishën për të qeverisur së bashku.
Çfarë thoshte Ilir Meta dhe si e justifikonte aleancën me PD, dhe çfarë bënte me të vërtetë?!
Në fjalimin e tij para se të niste një nga fushatat më të mëdha të korrupsionit dhe plaçkitjeve, Ilir Meta thoshte se qeveria PD-LSI do të luftonte korrupsionin. “Kjo është Qeveria e sinergjive programore që do të sjellin standarde më të larta mirëqeverisjeje, solidariteti dhe gjithëpërfshirje në politikat e saj, kohezion e paqe sociale, si dhe shërbime më cilësore ndaj qytetarëve shqiptarë. Kjo Qeveri do të ketë në programin e saj një tërësi reformash institucionale që do të konsolidojnë më shumë shtetin e së drejtës, ndarjen e pushteteve dhe pavarësinë e tyre, zbatimin e ligjit dhe luftën kundër korrupsionit”, tha Meta në 16 shtator 2009, teksa u kishte vënë syrin vendeve të punës, hidrocentraleve, guroreve etj.
Integrimi ishte një tjetër mashtrim për të kamufluar etjen për të vjedhur.
“Objektiv madhor yni dhe kërkesë e drejtpërdrejtë e procesit integrues është rritja e cilësisë dhe zbatueshmërisë së ligjeve si një sfidë e madhe për zhvillimin tonë të përgjithshëm, përballimi i së cilës është gjithashtu përcaktues për suksesin e mëtejshëm të integrimit tonë europian.
Politika e jashtme e Qeverisë së re do të synojë të forcojë rolin e Shqipërisë në përputhje me stadin e ri të integrimit tonë, në mënyrë të veçantë duke pasur në konsideratë arritjen më madhore, atë të anëtarësimit në NATO vetëm pak muaj më parë, duke kontribuar për rritjen e paqes dhe të sigurisë, si dhe për forcimin e stabilitetit në rajonin tonë e kudo, ku do të na kërkohet të kontribuojmë si pjesë e kësaj Aleance”.
Në fund Meta tha se: “Sot jam këtu për arsye se forca politike që unë drejtoj u krijua për t’i shërbyer integrimit evropian të Shqipërisë. Ndaj LSI-ja nuk mund të mungonte në këtë moment të rëndësishëm për vendin tonë dhe për qytetarët tanë, për të dhënë kontributin e saj të rëndësishëm, të domosdoshëm dhe historik, në mënyrë që të gjithë shqiptarët të përmbyllin fazën më të rëndësishme të integrimit tonë, atë të anëtarësimit në BE.
Sot është 16 shtatori, dita e Konferencës së Pezës, prandaj dua t’i ftoj të gjithë që të mos ngatërrojnë mesazhin historik që dhanë patriotët shqiptarë pa dallim feje, krahine e ideje më 16 shtator të vitit 1942, i cili është mesazhi i bashkimit për interesat e kombit tonë.
Interesi i kombit tonë është integrimi në BE, ndaj askush nuk duhet të mungojë në këtë detyrë të rëndësishme ku na thërret vendi, interesi i tij dhe, mbi të gjitha, vota e qytetarëve shqiptarë”. Historia më pas dihet se si vijoi, pazare, pazare, pazare./Pamfleti
