Duket sikur pandemia i ka varfëruar të gjithë por e vërteta është se miliarderët janë fuqizuar më shumë se kurrë. Numri i miliarderëve në klasifikimin e përvitshëm të Forbes për njerëzit më të pasur në botë është rritur me 660 krahasuar me një vit më parë, duke shkuar në 2755. Në total, shuma e pasurisë së tyre është 13.1 trilionë dollarë, nga 5 trilionë që ishte në vitin 2020.
Në klasifikimin e vitit 2021 janë shtuar 493 emra të rinj, një tjetër rekord duke bërë që të shfaqet një miliarder i ri çdo 17 orë. Ndër ta, 210 janë nga Kina apo Hong-Kongu, 98 nga SHBA. Hyrja e re, me 38.2 miliardë dollarë, është Miriam Adelson, nga Nevada, e cila ka trashëguar perandorinë e kazinove të të shoqit, Sheldon Adelson, i cili vdiq në janar.
Hyrje të tjera të reja të rëndësishme konsiderohen producenti i filmave dhe programeve televizive Tyler Perry; bashkëthemelueses së aplikacionit të takimeve Bumble, Whitney Wolfe Herd miliarderja më e re self-made në botë dhe Guillaume Pousaz, themelues i shoqërisë së pagesave Checkout.com.
250 persona të tjerë që kishin dalë nga klasifikimi në të kaluarën janë rikthyer. Ndërkohë që pandemia ka përkeqësuar gjendjen ekonomike të pjesës më të madhe të popullatës, 86% e miliarderëve janë më të pasur se një vit më parë.
Totali i pasurisë së dhjetë personave më të pasur arrin në 1.15 trilionë dollarë, 2/3 më shumë se 686 miliardë vitin e shkuar.
