Kreu i AAK-së dhe kandidati për president Ramush Haradinaj ka riparalajmëruar Serbinë se nëse nuk ndodh anëtarësimi në NATO, Kosova duhet të bashkohet me Shqipërinë. Deklaratat e ish-kryeministrit u bënë nga Prizreni, ku u takua me krerët e Bashkësisë Islame në këtë qytet.
“Ne kemi përgatitur një plan ekonomik se mendojmë se më rëndësi është ndalja e rënies ekonomike dhe rifillimi i ekonomisë. Fokusimi im personal është te përgjegjësitë e Presidentit të vendit kryesisht te pjesa e sigurisë dhe anëtarësimit në NATO. Ne jemi të interesuar të kemi qartësi të rrugës sonë deri në NATO dhe paralajmërojmë që nuk mund të mbetemi pezull. Ne dëshirojmë me ditë se kur është koha kur do të jemi anëtarësimi në NATO, dhe nëse nuk arrihet kjo atëherë nuk na mbetet rrugë tjetër pos t’i kthehemi asaj që na takon me bë e që është bashkimi me Shqipërinë”, tha Haradinaj.
“Në Turqi kemi shumë njerëz të gjakut. Pra e dimë se jemi të bashkuar edhe si Kosovë në NATO. Por nëse nuk arrihet kjo ju siguroj se duhet t’i vëmë epilog gjendjes tonë në këtë rast na mbetet zgjidhja bashkimi me Shqipërinë. Bashkësia Ndërkombëtare tani e ka në opsion të shfrytëzojë kohën para nesh me i dhanë epilog në këtë rast me bind Serbinë që ta njoh Kosovën në mënyrë që Ballkani i tëri të jetë në BE. Kosova duhet të hyjë në NATO me largu Rusinë”, u shpreh ai.
Sjellim në vëmendje që Ramush Haradinaj më herët ka deklaruar se nëse Kosova nuk anëtarësohet në BE, do të mbaj referendum për bashkim me Shqipërinë. Pas kësaj reagoi ambasada ruse në Tiranë që e cilësoi Kosovën si pseudo-shtet të vetëshpallur, ndërsa i cilësoi deklaratat e Haradinajt si provokim.
