Përfundojnë ndeshjet e play-off-it, të kualifikueseve në EURO 2020. Hungaria ka përmbysur Islandën, teksa ka fituar me rezultatin 2-1, duke u kualifikuar në fazën e grupeve të këtij kompeticioni. Takimi u zhbllokua në minutën e 11 nga Sigurdson me një goditje dënimi. “Merita” më e madhe i shkon portierit Gulacsi, të cilit i ka shpëtuar topi nga duart. Golat e Nego në minutën e 88 dhe szoboszlai, 4 minuta më vonë i dhanë kualifikimin Hungarisë.
Skocia siguroi kualifikimin në fazën e grupeve të EURO 2020, duke iu drejtuar 11-metërshave, pasi 90 minutat u mbyllën në barazim 1-1. Skocezët kaluan të parët në avantazh me Chrisitie në minutën e 52. Ky i fundit mposhti Rajkoviç me një goditje të zgjuar nga jashtë zone.
Kur u duk se ndeshja do të përfundonte këtu, Serbia u zgjua në fund dhe barazoi rezultatin me Luka Joviç në minutën e 90. Sulmuesi i Realit të Madridit, i lënë në mënyrë të pashpjegueshme vetëm në zonën e rreptësisë, dërgoi topin në rrjetë me një goditje me kokë.
Nga pika e bardhë e penalltisë, Skocia u tregua më e saktë, duke triumfuar me rezultatin 4-5.
Sllovakia është kualifikuar në grupet e EURO 2020, në shtesë, pasi edhe këtu ndeshja përfundoi 1-1. Sllovakët kaluan të parët në avantazh me Juraj Kuçka në minutën e 17, por një gabim i Milan Skrinjar në minutën e 88, ktheu Irlandën e Veriut në lojë, duke e çuar takimin në shtesë.
Në minutën e 110, Duris vulosi fatin përfundimtar të këtij takimi, duke dërguar Sllovakinë në fazën e grupeve.
