Aktualitet 1 Korrik 2018, 08:27

I shkaktuan shtetit 39.5mln Euro dëm, ngushtohet laku për Berishën dhe Metën. Zyrtarisht nën hetim për aferën CEZ-DIA

Shkruar nga Pamfleti
I shkaktuan shtetit 39.5mln Euro dëm, ngushtohet laku për

I shkaktuan shtetit 39.5mln Euro dëm, ngushtohet laku për Berishën dhe Metën. Zyrtarisht nën hetim për aferën CEZ-DIA

Dy bashkëqeverisëst e koalicionit në vitin 2009, Sali Berisha dhe Ilir Meta janë tashmë zyrtarisht nën hetim për çështjen CEZ-DIA. Ish-juristi I OSHEE, Romeo Kara vitin e kaluar ngriti një padi ndaj dy 7 personave, mes të cilëve ishin edhe Berisha e Meta. Sipas tij ata i kanë shkatuar shtetit një dëm prej 39.5 mln Euro. Gazeta ‘’SOT’’ i është drejtuar me një letër Prokurorisë së Krimeve të Rënda për të mësuar se çfarë ka ndodhur me këtë padi. Ky institucion shprehet se ndaj ish-kryeministrit Berisha, Presidentit Ilir Meta dhe 5 zyrtarëve të tjerë, është regjistruar procedim penal për 3 vepra penale.

“Më datë 19.01.2018 nga ana e Prokurorisë për Krime të Rënda është regjistruar procedimi penal nr. 14 për veprat penale “Shpërdorim detyre” dhe “Korrupsion pasiv i funksionareve të lartë shtetërorë ose i të zgjedhurve vendorë”, parashikuar nga nenet 248 dhe 260 të Kodit Penal dhe “Ushtrimit të ndikimit të paligjshëm ndaj personave që ushtrojnë funksione publike”, parashikuar nga neni 245/1 të Kodit Penal”, tha prokuroria për gazetën “SOT”.

Hetimet

Vetë juristi Kara, i kontaktuar nga gazeta pak ditë më parë tha se nuk ndjehet shumë optimist mbi mënyrën se si po ecin hetimet. Janë bërë rreth 6 muaj që kur është regjistruar procedimi penal dhe deri më tani nuk ka pasur asnjë zhvillim. Megjithatë pozitat e të akuzuarve mund të rëndohen në ditët në vijim. Me ngritjen e SPAK, kjo dosje automatikisht transferohet aty dhe gjithçka mund të ndryshojë. Megjithatë, interesant është fakti se dy politikanë të lartë janë duke u hetuar për 3 vepra penale.

Bashkë me ta nën hetim janë gjithashtu: Kastriot Ismailaj administrator i DIA, i dënuar tashmë nga gjykata; Martin Roman, ish Drejtor Ekzekutiv i CEZ Group; Tomas Pleskash, z/kryetar i Bordit të Drejtorëve të CEZ-Group; Jozef Hejsek, ish kryetari Bordit të Drejtorëve të CEZ-Shpërndarje dhe Bujar Nepravishta, ish-kryetar i Entit Rregullator të Energjisë.

Provat

Gazeta ka mësuar se juristi Romeo Kara ka dorëzuar pranë prokurorisë një sërë provash, të cilat sipas tij tregojnë se marrëveshja CEZ-DIA ka qenë në dëm të shtetit shqiptar. Sipas tij, përgjegjës kryesorë janë Sali Berisha, në atë kohë kryeministër dhe Ilir Meta, në atë kohë ministër i Ekonomisë. Prova e cila mund të tronditë politikën është dëshmia e Vojsava Ismailit, gruaja e Kastriot Ismailit. Në prokurori është dorëzuar një intervistë e saj, e cila akuzon ilir Metën dhe Sali Berishën.

“Më 26 tetor 2014 Hejsek pranon se Ismailaj ka qenë njeri i qeverisë shqiptare dhe si një ri i Metës dhe Berishës. Kastriot Ismailaj është prezantuar te ai dhe ish-ambasadori shqiptar. Ky fakt është konfirmuar nga gruaja e Ismailajt. Ajo akuzon Ilir Metën që i bën presion Ismilajt për t’i dhënë para”, ka thënë Romeo Kara pak kohë më parë. Po ashtu ai ka deklaruar se zotëron dhe një e-mail që shkëmbenin dy zyrtarët e CEZ, Tomas Pleskash, z/kryetar i Bordit te Drejtoreve të CEZ-Group dhe Jozef Hejsek, ish kryetari Bordit të Drejtorëve të CEZ-Shpërndarje për një takim me Ilir Metën. Të gjitha këto janë duke u shqyrtuar nga prokuroria.

Aktualitet Afera CEZ-DIA Ilir Meta Romeo Kara Sali Berisha