Autoritetet turke bllokuan kryerjen e një kontrolli nga marina gjermane teksa ajo po lundronte në drejtim të portit të Misratas në Libi. Fregata gjermane “Hamburg” ishte duke lundruar në ujërat e Mesdheut, në kuadër të misionit të përbashkët europian “Irini” për të parandaluar dërgimin e armëve në Libi.
Gjatë natës ushtarët gjermanë të fregatës “Hamburg” hipën në anijen turke, “Rosaline A”, por u tërhoqën pasi Turqia dërgoi një notë proteste.
“Burimet turke të sigurisë thanë se ‘Rosalina-A’ mbante materiale të ndryshme si ushqim dhe bojë dhe se ekipi i kërkimit kishte shkelur ligjin ndërkombëtar, duke mos pritur lejen nga Turqia”, raporton Reuters.
“Ushtarët kuptuan që nuk kishte asgjë tjetër në anije, përveç ndihmave humanitare, ushqimeve si biskota dhe materiale boje, duke u larguar nga anija”, tha një burim.
Duke e konfirmuar lajmin për revistën gjermane “Der Spiegel” një zëdhënës gjerman i Ministrisë së Jashtme i tha se “Hamburg” e kishte interceptuar “Rosaline A” 200 km në Veri të qytetit libanez të Bengazit.
Ai tha se “Hamburg” kishte ndjekur procedurat standarde të pritjes për orë të tëra, për të pritur një aprovim, duke shtuar se të gjitha procedurat ishin ndjekur me korrektësi.
