Duke marrë shkas nga infektimi i mjekut të njohur Pëllumb Pipero, ish-deputeti Tritan Shehu, shprehet se Ministria e Shëndetësisë duhet të kërkojë nga Kompania “Pfizer” të verifikojë gjendjen bio-aktive të atyre dozave vaksinash të arritura në Shqipëri pa transparencë!
Postimi i plotë
Ministria e Shëndetësisë duhet të kërkojë nga Kompania “Pfizer të verifikojë gjendjen bio-aktive të atyre dozave vaksinash të arritura në Shqipëri pa transparencë!Kjo nevojë nuk lind vetëm nga infektimi Covid i kolegut mbas 16 ditë të marrjes së dozës së parë (të cilit i uroj shërim të shpejtë e të plotë), por dhe nga gjithë ajo “Odise” e mbuluar me mister dhe parregullsi ligjore.
E kam ngritur këtë shqetësim që ditën e parë:
-Asnjë medikament, aq më shumë një vaksinë si kjo që kërkon kushte shumë speciale ruajtjeje, transporti e aplikimi nuk mund të futet e të përdoret pa Certifikatën e Origjinës së mallit nga Kompania Farmaceutike që e dërgon, si dhe dokumentet e tjera të domosdoshme sipas ligjit.
-Termi i përdorur në doganë “dorazi” është antiligjor, dhe të bën të mendosh për “kontrabandë”.
-Agjencia e Kontrollit të Barnave, që tregoi se realisht nuk ekziston, duhej të kishte një dosje të plotë mbi të cilën të dilte Urdhëri i Importit nga Titullari i Ministrisë, si medikament i pa regjistruar.
-Dhe për këtë dokumentacion nuk ka asnjë “konfidencialitet”, ka vetëm detyrim ligjor për transparencë deri në publikim On line; asnjë shtet i BE-së, donator e kompani farmaceutike serioze nuk mund dhe nuk do të kërkonte të kundërtën.
-Është tjetër gjë për atë që mund ta ketë paguar a sponsorizuar mallin, ajo është një çështje tjetër dhe hyn në kompetencat e organeve të tjera.
-Unë kam ngritur alarmin e shkeljes se rregullave më elementare të “Sigurisë medikamentoze” e “farmako vigjilencës”, rregulla që duhen respektuar me fanatizëm, ndryshe, së paku, vihet në dyshim siguria e efektshmëria e medikamentit.
Prandaj, Ministria e Shëndetësisë duhet të kërkojë sa më parë një verifikim laboratorik nga “Pfizer” për këto doza e një certifikim të rezultateve, gjë që duhet bërë publik.
