Një pazar i madh nën hijen e Bablokut është mbyllur gjatë vitit të ri, dyshja nga Tepelena kapi tenderin 14 miliardë lekë për ndërtimin ‘rruga mbikalimi TEG’, kompani me përvojë dhe me ofertë 9 miliardë lekë u përjashtuan. Skema si u vodhën paratë e shqiptarëve
Drejtorët dhe kryebashkiakët e korruptuar të Edi Ramës po nxitojnë të mbyllin pazaret e fundit me shpejtësi, duke ndarë llokmat e mëdha të buxhetit të shtetit, me klientët e zakonshëm, përmes tenderave të dyshimtë. Në 11 janar 2021, në skenë doli edhe një herë kreu i Autoritetit Rrugor Shqiptar, Ergys Verdho, sot një nga pushtetarët më të lakuar dhe akuzuar në Shqipëri për afera të mëdha financiare. Me vullnetin e tij, me urdhrin e Bablokut apo të njërit prej ministrave kjo nuk dihet ende, por Verdho ka finalizuar një pazar të madh disa ditë më parë me klanin e Tepelenës, Odhise Bresha dhe Pëllumb Beta, me vlerë 14 miliardë lekë. Bëhet fjalë për tenderin e rëndësishëm me objekt “ndërtim rruga mbikalimi Teg dhe rrugët lidhëse të tij”. Dyshja në fjalë kanë kompaninë “ALB BUILDING”
Arsyeja se pse ky tender duhet të jetë objekt hetimi ka të bëjë me vjedhjen e parave të shqiptarëve. Fondi limit për këtë tender ishte 1.479.800.353,50 lekë. Oferta fituese e klanit të Tepelenës është 1.417.963.621,20 lekë, një diferencë qesharake. Në këtë tender kanë marrë pjesë kompani të mëdha me përvojë dhe që kanë realizuar vepra edhe më të rëndësishme, edhe pse janë akuzuar për korrupsion dhe klientelizëm. Madje oferta e ‘Gener 2’ e Bashkim Ulajt, bajlozit të tenderave në Shqipëri, ishte 961.394.069,50 lekë. Vëllezërit Hysa kanë dhënë një ofertë edhe më të ulët, 900.897.065 lekë, pra gati 5 miliardë lekë më pak se klani Tepelena. Këto kompani janë skualifikuar pasi nuk kanë paraqitur dokumentacionin e plotë dhe për disa arsye të tjera qesharake, si makineri që nuk bën vizime.
Ka dyshime të forta se dokumentet këto kompani nuk i kanë paraqitur qëllimisht, duke u bërë pjesë e një gare fiktive dhe të paracaktuar, pasi oligarkët që fshihen pas tyre kanë marrë llokma të tjera nga buxheti i shtetit shqiptar. Jo rastësisht kjo procedurë, ku duhet të kurseheshin rreth 5 miliardë lekë, nuk është ankimuar në Komisionin e Prokurimit Publik. Tashmë është praktikë që kompanitë e madha dhe të mesme marrin pjesë formalisht në tendera, ku fitues janë paracaktuar miqtë e tyre. Klienti që fiton tenderin, më pas merr pjesë formalisht në tendera të tjerë, ku fitues është paracaktuar tjetri. Për rrjedhojë për këto procedura nuk ka ankimim pasi pazari mbyllet brenda rrethit.
Tashmë pazari është mbyllur dhe vetëm një ndërhyrje e fortë dhe në kohë e SPAK mund të shpëtojë paratë e shqiptarëve. Nuk dihet nëse për të diktuar fituesin e këtij tenderi ka ndërhyrë Gramoz Ruçi, për të cilin dokumente të kohëve të fundit konfirmojnë se po turret pas parasë. E qartë është se ky tender është klientelist dhe korruptiv, ku të paktën 7 miliardë lekë do ndahen mes pushtetarëve të korruptuar, sekserëve dhe fituesve të tenderit. /Pamfleti
