Vetëvendosje e ka marrë mandatin pa asnjë dyshim për një operacion të tillë, i cili duhet të bëhet që në fillim, pa kursyer asnjë; të gjenden shkaktarët e kësaj grabitje, e krimi që po bëhet në hundën e Avdullah Hotit. Duke mos kursyer asnjë, qoftë edhe ‘Dullën’…
Ka mbi një javë që kronikat në Kosovë transmetojnë edhe zyrtarisht lajme publike të rënda. Rreth 400 mijë euro firojnë nga agjencitë e Ministrisë së Bujqësisë ku si pasojë arrestohen 12 zyrtarë, ndërkohë 8 oficerë të rëndësishëm policie janë kapur me presh në duar në operacionin anti-narkotik, që është kryer nga prokuroria e Kosovës, por e sinjalizuar nga partnerët.
Çfarë po ndodh?
Po ndodh një bastisje në masë të gjerë, që tregon realisht fytyrën e qeverisë dhe elitës së vjetër të Kosovës.
Ata kishin një shans për të treguar qoftë edhe një shenjë shtetformimi, serioziteti apo angazhimi për shtetin.
Në mes të Pandemisë, Kosova është në kaos, askush nuk di se cdo të bëhet me vaksinat, ndërkohë kur të gjithë vendet e rajonit i kanë siguruar kush më shumë e kush më pak, të paktën dozat për pjesën më të prekshme.
Në një vakum pushteti, Avdullah Hoti, edhe pse është lancuar si njeri i aksionit e jo i propagandës, del cdo ditë në televizor, ndërkohë që nuk ka ditë ku mos të ketë një skandal të nivelit të lartë, pikërisht sepse Kosova është pa qeveri.
Duke qenë se është një qeveri në largim, qeveria e Avdullah Hotit, nuk ka bërë asnjë mbledhje bilanci të paktën për pandeminë, për ndihmën ekonomike që ka dhënë në kuadër të Covid 19, pra sa euro kanë harxhuar në buxhet dhe sa i lënë qeverisë së re.
Albin Kurti e merr qeverinë e tij, në një vit, kur buxheti është miratuar. Deri në janarin e vitit 2022, kjo qeveri nuk do të mundet të zbatojë një buxhet shtetëror të plotë, edhe pse mund të miratojë ligje për zhvendosje fondesh, ato nuk do të jenë të plota.
Pasi Hoti e ka miratuar buxhetin pa konsensus, duke e ditur se ka të bëjë me një vit elektoral.
Kjo tregon fiks natyrën e klikës së vjetër, që shtetin e konsideron si oborrin e shtëpisë së Isa Mustafës në Prapashticë, ku mund të mbjellësh e korrësh si të duash, e jo sipas një plani që i shërben qytetarëve.
E kjo situatë ka sjellë vërtetë, në mënyrë të hapur një emergjencë që qeveria e re e Vetëvendosjes të mos mjaftohet vetëm me zbutjen e pasojave të kaosit, por edhe me ndëshkimin e fajtorëve të këtij kaosi.
Natyrisht që i takon prokurorisë të hetojë të dyshuarit, por qeveria duhet të bëjë detyrën e vet; kontrollin e inventarin e të ardhurave. Jemi cdo ditë në një situatë ku raportohen grabitje, e që në këtë rast mendimi shkon tek logjika se këto raste mund të jenë më të mëdha se ato të raportuara.
Vetëvendosje e ka marrë mandatin pa asnjë dyshim për një operacion të tillë, i cili duhet të bëhet që në fillim, pa kursyer asnjë; të gjenden shkaktarët e kësaj grabitje, e krimi që po bëhet në hundën e Avdullah Hotit. Duke mos kursyer asnjë, qoftë edhe ‘Dullën’… / Pamfleti
