Ka ardhur e po trashet zëri i serbëve që drejtojnë qeverinë e Malit të Zi ndaj shqiptarëve të këtij vendi.
Pas protestës së Tuzit për mbylljen e njëanshme të bareve dhe bizneseve të bashkisë me shumicë shqiptare, kur në pjesën tjetër të vendit nuk ka asnjë masë ndalimi, ka ardhur një kërcënim i fortë nga Podgorica.
Ministri malazes i Drejtësisë Vladimir Leposaviç, i cili deri pak muaj më parë ishte krahu djathtë i kreut të Kishës Ortodokse Serbe Amfilohije që vdiq nga Covid 19, ka kërcënuar hapur shqiptarët e Malësisë.
Në një deklaratë që e bën të ditur ‘Antena M’, Lepasoviç ka deklaruar se Tuzi do të rrethohet nga policia nëse do të ketë rezistencë ndaj masave të kufizimeve.
Mali i Zi, i cili është një vend përgjithësisht turistik, prej kohësh ka pasur kufizime të kujdesshme, madje për qytetarët serbë ka hequr edhe kushtin e tamponit apo testit seriologjik.
Leposaviç ka deklaruar duke kërcënuar indirekt se “beson se Gjeloshaj nuk kishte për qëllim të shkaktonte paqëndrueshmëri të institucioneve shtetërore, pasi ai përfaqëson interesat dhe të drejtat e qytetarëve Tuzit dhe bashkatdhetarëve të tyre, sepse, kjo do të ishte jashtëzakonisht e papërgjegjshme ndaj të gjithë qytetarëve”.
Ndërkaq, Podgorica vijon afrimin gjithnjë e më të madh me Moskën. Kryeministri malazes Zdravko Krivokapiç falënderoi Federatën Ruse për shpërndarjen e kontigjentit të parë me 5,000 doza, nga një total prej 50,000 vaksinash Sputnik V.
Krivokapiç theksoi se dorëzimi i vaksinës Sputnik V “është me vlerë të pamatshme dhe se paraqet një shpresë të madhe për të gjithë qytetarët e Malit të Zi”.
“Kryeministri i Malit të Zi kujtoi ambasadorin Maslenikov se ky prokurim ishte paraprirë nga një pasiguri e caktuar e negociatave dypalëshe komplekse, e cila është rezultat i një situate specifike ndërkombëtare, por që Rusia edhe një herë reagoi në frymën e marrëdhënieve miqësore shekullore,” thuhet në deklaratën e shpërndarë nga kryeministri i Malit të Zi, të cilën e bën të ditur gazeta ‘Vijesti’./Pamfleti
