Kronike21 Maj 2024, 11:17

Dyshohet se vijnë nga veprimtari kriminale, sekuestrohet llogari bankare me vlerë 30 mijë euro

Shkruar nga Pamfleti

Dyshohet se vijnë nga veprimtari kriminale, sekuestrohet llogari bankare me

Policia në Fier ka sekuestruar 30 mijë euro të 30-vjeçarit Armando Bregasi, që është dënuar në Greqi për pjesëmarrje në organizatë kriminale.

"DVP Fier/Finalizohet operacioni i koduar “The end”. Sektori për Hetimin e Krimeve Ekonomike ka ekzekutuar vendimin e Prokurorisë për vendosjen e sekuestros preventive mbi një llogari bankare me 30 000 euro që dyshohet se janë përfituar nga veprimtaritë kriminale të kryera nga një 30-vjeçar.

30-vjeçari, i arrestuar në Greqi, për veprat penale “Trafikimi i narkotikëve” dhe “Organizata kriminale”.

Në kuadër të një hetimi të kryer për disa muaj, me metoda proaktive, në drejtimin e Prokurorisë pranë Gjykatës së Shkallës së Parë të Juridiksionit të Përgjithshem Fier, Sektori për Hetimin e Krimeve Ekonomike, në zbatim të vendimit të kësaj prokurorie, ka vendosur sekuestro preventive mbi një llogari bankare me shumën 30 000 euro, në emër të shtetasit A. B., 30 vjeç, banues në Fier.

Vijon puna hetimore për evidentimin dhe sekuestrimin e pasurive të tjera të këtij shtetasi, që mund të jenë përfituar nga veprimtaritë kriminale.

Materialet procedurale do t’i kalojnë Prokurorisë, për veprime të mëtejshme, për veprën penale “Pastrimi i produkteve të veprës penale ose veprimtarisë kriminale”", njofton policia.