Kronike25 Maj 2024, 10:12

Goditet grupi i prodhimit dhe shitjes së drogës, arrestohet 1 efektiv policie 3 persona në Fier; zbardhen emrat

Shkruar nga Pamfleti

Goditet grupi i prodhimit dhe shitjes së drogës, arrestohet 1 efektiv

Një punonjës policie dhe 3 persona të tjerë janë arrestuar nga Agjencia e Mbikëqyrjes Policore (Rajoni Fier-Berat pasi akuzohen për  prodhim dhe shitje të narkotikëve. 

Sipas policisë, të arrestuar janë: Lorenc Gropa (polici), Klevis Gropa, Ledjon Gropa dhe Skerdilajd Levendi.

Sakaq, janë proceduar penalisht edhe 2 persona të tjerë: Maliq Gropa dhe Bruno Festimaj.

Siç njofton AMP, pas kontrollit të banesës së policit Lorenc Gropa, janë gjetur kokainë, cigare hashashi, 2 armë zjarri dhe 11 aparate celularë. 

Sipas AMP, Skerdilajd Levendi në bashkëpunim me persona të tjerë akuzohet për trafikim armësh e municionesh në Greqi.

"Agjencia e Mbikëqyrjes Policore (Rajoni Fier-Berat), në kuadër të hetimit proaktiv me metoda speciale, finalizoi operacionin për goditjen e një grupi kriminal në zbatim të vendimit të Gjykatës së Shkallës së Parë të Juridiksionit të Përgjithshëm Fier, duke arrestuar në flagrancë punonjësin e policisë L.G., me detyrë Trup Shërbimi i Patrullës së Përgjithshme pranë Komisariatit Fier, si dhe shtetasit K.G. dhe L.G., të dyshuar për kryerjen e veprës penale “Prodhim dhe shitje e narkotikëve”, veprimtari të cilën dyshohet se e kryenin në ambientet e një bar kafe, në Patos.

Nga kontrolli i banesës së punonjësit të policisë L.G. u sekuestruan në cilësinë e provave materiale një qese me pluhur të bardhë, në dukje lëndë narkotike e llojit kokainë me peshë rreth 41,25 gr, 2 cigare me lëndë narkotike hashash, 2 peshore për peshimin e lëndës narkotike, një armë zjarri tip TT, një armë zjarri e llojit Karabinë dhe 11 aparate celularë.

Nga veprimet hetimore progresive në vijimësi si deklarimet dhe këqyrja e telefonave, u dokumentua implikimi në trafikun e armëve në shtetin grek të shtetasit S.L., i cili u arrestua për “Trafikim i armëve dhe municioneve”, pasi ai negocionte me shtetas të tjerë në lidhje me këtë veprimtari të paligjshme.

Gjithashtu, janë proceduar në gjendje të lirë shtetasi B.F., i dyshuar për “Organizim i lojërave të palejuara” dhe “Vënia në dispozicion e ambjenteve për lojëra të palejuara”, si dhe shtetasi M.G., i dyshuar për “Prodhim dhe mbajtja pa leje e armëve të gjuetisë dhe sportive”. Vijojnë hetimet për përfshirjen e mundshme të shtetasve apo punonjësve të tjerë të policisë në këtë veprimtari të paligjshme", thuhet në njoftim.

droge shitje efektiv policie fier