Ish-ministri i Drejtësisë nga LSI-ja, Ylli Manjani, ka komentuar largimet e ish-deputetëve nga LSI-ja e Beratit. Sipas Manjanit, teza politike që një parti opozitare është eksperiment dhe se për këtë shkak duhet vendosur rotacioni politik, është e rrezikshme.
Postimi i plotë në Facebook
Mbetem ende i bindur se çdokush ka të drejtë të zgjedhë cilindo grupim politik që dëshiron. Në një shoqëri të lirë kjo nuk duhet të jetë problem. Kjo vlen edhe për 2 miqtë e mi ish-deputetë të LSI në Berat. Teza politike që “një parti opozitare është eksperiment dhe se për këtë shkak duhet vendosur monizmi e ndaluar rotacioni politik”, është e rrezikshme.
Nuk po i hyj as arsyetimit se nëse partia nga ikin paska qenë “eksperiment”, i bie që edhe ata vetë ishin eksperiment. Nuk po i hyj sepse ata nuk janë autorët e fjalëve që artikulojnë.
Ajo fjalë janë tezë politike që ka hartuar monisti Edvin që kërkon të sundojë në këtë vend derisa të ketë frymë. Miqve të mi në Berat e kudo, që kanë zgjedhur të braktisin opozitën sepse e konsiderojnë “eksperiment”, njerëzisht ju uroj suksese në karrierën politike!
I ftoj të përpiqen të kuptojnë se rrjeshtimi kundër rotacionit dhe pro monizmit është eksperimenti më i rrezikshëm i mundshëm. Ky eksperiment nuk ka të bëjë më me partinë, por me Shqipërinë!
