I papërmbajtur ka qenë kryeministri Rama ditën e sotme, teksa nga një takim me strukturat e Partisë Socialiste në mjediset e inceneratorit të Elbasanit, ai nuk ka ndalur sulmet ndaj Presidentit Ilir Meta dhe kryedemokratit Lulzim Basha.
Rama u shpreh se opozita nuk e sfidon dot PS-në, duke shtuar se Partisë Socialiste i nevojiten njerëz që kanë energji të mëdha për të ndryshuar gjërat në mënyrë pozitive.
“Si mund të thotë PD që jam gati të qeverisë, kur nuk ka reflektuar asgjë, të njëjtat njerëz, të njëjtin ide, në ndryshim që në vend të liderit është një dezhurn, është një bosh. Nuk e kemi betejën me ta, kundërshtarët tanë, nuk janë ata. Ata janë kundërshtarët e Shqipërisë. Kundërshtarët tanë janë ato ndjenja vetëkënaqësie, vetëmjaftueshmërie, vetë përmbushje që të pengojnë të shohësh shumë më tutje kur je i pari.
Ne na duhen njerëz që vijnë nga lufta e përditshme, që duan të bëjnë jetën e tyre më të mirë dhe të familjes me punë, duke mësuar edhe nga gabimet e tyre e për të mos u dorëzuar përballë vështirësive. Jam besim-plotë se jemi në rrugën e duhur. Në këtë rrugë na duhen energji të mëdha. Nuk na sfidojnë dot, janë shumë mbrapa. Është opozitë mizerable në çdo aspekt, në lidhjet me njerëzve, në aspektin e halleve të përditshme. Sot është një opozitë e pandershme. Procesi ynë është i drejtpërdrejtë, është ftesë e hapur”, tha Rama.
