Historia që u transmetua në mbrëmjen e kaluar në emisionin “Dua të bëj të lumtur” të Arbana Osmanit, bëri jo pak bujë në publik. Bëhet fjalë për rastin e Bledit, i cili i kërkoi falje publikisht gruas së tij, Majlindës për dhunën e tmerrshme, që ka ushtruar ndaj saj.
Sipas rrëfimit të vetë protagonistëve të historisë, Bledi jo vetëm e ka dhunuar sistematikisht gruan e tij, por ka arritur deri aty sa i ka rrezikuar dhe jetën. Sipas Majlindës, ai e ka “çuar në një pyll dhe nëse nuk do t’i kishte shpëtuar nga duart, sot mbase nuk do të ishte këtu“. Qartazi kjo nuk është një episod i thjeshtë dhune, por një tentative për vrasje. Dhe përderisa Bledi e ka dërguar fillimisht në një vend të izoluar, me shumë gjasa, është tentativë vrasjeje me paramendim.
Ky rast specifik jo vetëm që nuk duhej transmetuar kurrsesi në një televizion kombëtar, por çështja duhet ti kalojë prokurorisë për hetime të mëtejshme.
Në një vend ku dhuna ndaj femrave ,paragjykimet, seksizmi janë shumë të larta, aq sa shumë gra dhe vajza nuk i raportojnë krimet që kryhen kundër tyre, çfarë shembulli dha mbrëmë emisioni “Dua të të bëj të lumtur”?
“Lubitë e internetit do të reagojnë me siguri ndaj këtij rasti”- tha Albana, duke i paraprirë reagimeve të audiencës. Kjo deklaratë e saj na bën të kuptojmë dy gjëra; 1- Arbana dhe stafi i saj janë plotësisht të vetëdijshëm se sa e rëndë është situata, por u intereson më shumë të rrisin shifrat e audiencës. 2- e kuptojnë shumë mirë impaktin negativ të historisë tek audienca , por përsëri nuk u intereson përsa kohë kanë një audiencë të lartë.
Dhe në emër të fitimeve që vijnë nga numri i lartë i audiencës, Arbana nuk ngurroi aspak të nxirrte pa asnjë paralajmërim, para kamerave si në kurth, një grua të dhunuar e të stresuar. Për më tepër e ballafaqoi atë me burrin dhunues, e i kërkoi të konsideronte pajtimin me të.
Bledi premtoi të mos ngrejë kurrë më dorë ndaj Majlindës, e shpresojmë ta mbajë premtimin jo vetëm për hir të gruas së tij por edhe për Arbanën, pasi nëse rasti i rëndë përsëritet disa fjalë mallëngjyese e pak lot të sforcuara nuk do tja heqin përgjegjësitë nga shpatullat. /Pamfleti
