Aktualitet11 Gusht 2018, 23:21

“Luftë e ashpër brenda llojit”, intervista e njeriut që u bë Kryeministër në moshën 29-vjeçare

Shkruar nga Pamfleti
“Luftë e ashpër brenda llojit”, intervista e njeriut

“Luftë e ashpër brenda llojit”, intervista e njeriut që u bë Kryeministër në moshën 29-vjeçare

Arkiv-Kongresi i tretë i Partisë Socialiste në Tetor të vitit 1999 solli  në atë kohë një përballje mes Kryeministrit të asaj kohe Pandeli Majkos dhe Fatos Nanos, me fitoren e këtij të fundit zhvillimet në qeveri dhe kryesinë e partisë morën një tjetër rrjedhje.

Televizioni Klan sjellë intervistën ekskluzive të Pandeli Majkos në vitin 1999 dhënë në atë kohë për emisionin “Opinion” të Blendi Fevziut,  pas humbjes në garën për kryetar të PS, por që vijonte të mbante ende detyrën e Kryeministrit.

Zhgënjimet, dilemat, pikëpyetjet dhe reflektimet e Pandeli Majko pas kongresit ku ai humbi me një diferencë prej 36 votash (Nano 297 vota, Majko 261 vota) ju ftojmë ti ndiqnin në videon e mëposhtme pjesë përbërëse e arkivës së Tv Klan.

Majko e cilësonte situatën në PS pas kongresit si “luftë e ashpër brenda llojit”.

Majko u bë kryeministër në moshën 29-vjeçare. Pas një viti në krye të qeverisë Majko jep dorëheqjen nga posti i kryeministrit, si pasojë e humbjes së tij në zgjedhjet në Kongresit të PS-së, për kryetar partie përballë Fatos Nanos.

INTERVISTA E PLOTË E PANDELI MAJKOS

Blendi Fevziu: Të nderuar telespektatorë mirëmbrëma. Ju flas nga studio e Tv Klan. Në tre ditët e fundit nga spotet publicitare të emisionit të sotëm ju jeni informuar se i ftuari i sotëm do të jetë Zoti Pandeli Majko, kryeministër i Shqipërisë. Mirëmbrëma dhe mirë se edhët Zoti Majko.

Pandeli Majko: Mirëmbrëma Blendi.

Blendi Fevziu: Mua më vjen mirë që miqësia jonë e vjetër ka triumfuar mbi mëritë e momentit që ju keni patur mbase me Klanin këto kohët e fundit. Shpresoj që do të jetë një bisedë miqësore dhe e hapur dhe kërkoj edhe kompromisin që të jeni sa më i hapur në përgjigjet që do të jepni. Kam parasysh që një pjesë e madhe e opinionit shqiptar nuk është e qartë për zhvillimet që ka sjellë kongresi i tretë i Partisë Socialiste dhe natyrisht me lëvizjet që janë bërë pas këtij kongresi, ndërkohë që bëhen dy javë që ka mbaruar. Megjithatë unë po hy direkt në temë duke iu bërë një pyetje që mbase do të duket paksa e veçantë. Si ndiheni tani dy javë pas humbjes, a jeni më i qetë?

Pandeli Majko: Më i qetë sigurisht, sepse u plotësua një vakum i cili ekzistonte brenda Partisë Socialiste. Ishte një parti e cila në një mënyrë apo në një tjetër duhet pranuar, kaloi një nga momentet më të veçanta të historisë së vendit pa institucionin e kryetarit në krye të saj. Tani kjo është zgjedhur në pikëpamjen e rregullave që ka statuti i PS. Unë s’do ta përsëris shumë shpesh fjalën statut se me këtë statut po bëhen të gjithë shqiptarët anëtarë partie duke kujtuar nenet apo pikat e saj.

Blendi Fevziu: Kanë qenë debatet mbi thirrjen ose jo të kongresit.

Pandeli Majko: Ky është rregull i brendshëm i partive dhe tani situata do të vazhdojë drejt një orientimi tjetër që ka të bëjë me qeverisjen e vendit.

Blendi Fevziu: Në të vërtetë unë nuk iu ndërpreva, por pyetja ime është pak më personale. Ju folët për shqetësimin që keni patur për vendin e mbetur bosh të kryetarit dhe zgjedhjen e Nanos kryetar. Unë doja t’iu pyesja si e përjetuat këtë humbje? Ka patur komente sipas të cilave ju jeni mbyllur në zyrë dhe nuk keni dalë për këto dy javë.

Pandeli Majko: Po mirë po t’i besojmë të gjitha ato që thuhen në shtyp nuk e di se ku do të dalim. Megjithatë mund të them që e kam përjetuar edhe unë sipas mënyrës sime. Natyrisht nuk mund të them se u gëzova për bashkëpunimin në formë grupi etj, etj. U mërzita dhe pikë.

Blendi Fevziu: Megjithatë kjo mërzi deri ku shkonte Zoti Majko? Më fal që po insistoj në këtë pikë. Një nga komentet më negative që është bërë pas kongresit të tretë ka qënë ai që lidhet me largimin tuaj nga salla menjëherë pasi Nano u zgjodh kryetar i partisë. Do doja një shpjegim më konkret këtu sepse kam parasysh që para votimit ju i dhatë dorën Nanos dhe e pranuat si një konkurrent dhe menjëherë u larguat nga salla kur ai fitoi. A ju duket kjo si një lloj mungesë respekti ndaj kryetarit të sapozgjedhur të PS, por edhe ndaj 260 e ca votave që morët?

Pandeli Majko: Tani ju e bëni pyetjen me një gjysmë konkluzioni brenda kështu që unë nuk dua ta kontestoj atë. Mendoj se ka një moment i cili vështrohet me një frymë negativizmi që zgjidhet kryetari dhe kandidati largohet nga salla. Unë di t’iu them që emocionet e momentit ekzistonin, por nga shokët që kisha përreth mbaj mend që ekzistonte ideja për të dalë edhe për një arsye shumë të thjeshtë që ne nuk e dinim që Nano ishte brenda në sallë sepse unë fillova të përqafohesha dhe të merja përqafime normale që i jepen një kandidati që ka humbur.

Blendi Fevziu: Humbja është po aq dinjitoze sa fitorja…

Pandeli Majko: Me Bashkim Finon jemi përqafuar sapo janë dhënë rezultatet, edhe me disa të tjerë dhe ecëm dhe shkuam në Partinë Socialiste. Një pjesë e sallës ishte bosh, një pjesë kishin shkuar të flinin gjumë sepse ora ishte 5 e mëngjesit dhe vendosëm të qëndrojmë aty dhe të presim rezultatet. Pastaj morëm vesh që në sallë ka qenë edhe Fatos Nano duke pirë duhan diku dhe vetëm kaq. Kjo u komentua në mënyra të ndryshme. Mendoj se ia vlen që të shikohet një pjesë negative në këtë aspekt. Mbase ne duhet të prisnim që të vinte kryetari, por të flasim hapur, unë isha pak edhe me emocionet e momentit dhe mendova se gjëja më e mirë që mund të bëja në atë moment ishte t’i fusja krahun shokëve të mi dhe normalisht të bënim një shëtitje sepse po na buçiste koka.

Blendi Fevziu: Zoti Majko duke marë shkas nga përgjigja juaj, unë e kuptoj ngarkesën e momentit, por kjo ngarkesë apo ky emocion i parë a ju pengoi dhe të nesërmen apo gjatë një jave që të telefononit dhe të uronit kryetarin e zgjedhur të Partisë Socialiste?

Pandeli Majko: Nuk ishte aq e thjeshtë.

Blendi Fevziu: Pse?

Pandeli Majko: Për arsye që ju si analist kam përshtypjen që duhet t’i kuptoni.

Blendi Fevziu: Megjithatë nga ajo që ju thoni duket që ju keni qenë mjaft i sigurt në fitoren tuaj. Çfarë ju bënte të ishit kaq i sigurt që do të fitonit?

Pandeli Majko: S’ishte problem sigurie. Problemi ishte që tek ne, brenda PS edhe në sallë po ta vinit re kishte një tension i cili në thelb qe shumë njerëzor. Kjo kam përshtypjen se ishte e lidhur me mënyrën se si ishte përshkruar fushata. Ishte një fushatë e cila në një mënyrë apo në një tjetër sillte ato emocione dhe dalim tek konkluzioni i pyetjes suaj se përse se mora në telefon kandidatin e sapozgjedhur. Sepse realisht fushata e realizuar para kongresit ishte futur në disa kanale që e vështirësonin në moment marrëdhënien mes dy kandidatëve. Salla në një moment ndërhyri duke thënë dorën, dorën sepse ishte një moment i pritshëm nga ana e tyre. Unë realisht ndjeja pjesën e peshës time në këtë mesazh që kërkonte salla. Dhe Fatosi kam përshtypjen se e ndjeu, i dhamë dorën njëri-tjetrit dhe drejtova gishtin nga salla për të treguar se ishit ju që ne i dhamë dorën njëri-tjetrit. Dhe më duket se ky mesazh po vazhdon, normalisht. Jo në dhënien e dorës dhe kaq, por të konceptit që si u zhvillua kongresi dhe si e kërkuan socialistët. Po përsëris fjalët e Malajt që kam dëgjuar sot në lajmet e Klanit “ne tani jemi të detyruar të punojmë sëbashku”.

Blendi Fevziu: Pyetja për kompromisin e mundshëm sidomos pas përfundimit të mbledhjes së djeshme të këshillit drejtues. Duke ndjekur gjithnjë të njëjtën logjikë Zoti Majko ka patur komente të shtypit. A mendoni se ju keni qenë i keqinformuar për të mos thënë i mashtruar nga një pjesë e stafit tuaj politik? Ka patur më shumë entuziazëm tek njerëzit e tu Zoti Majko se sa tek ju vetë.

Pandeli Majko: Po përse duhet të fillojmë të bëjmë që tani analizat e një humbje ku dikush do të përpiqet, në rastin konkret kandidati që ka humbur të bëjë rolin e viktimës. Në kuptimin që më kanë keqinformuar, s’më mbrojtën, s’folën shumë për mua etj, etj., kur rezultati ishte ai që u deklarua në komisionin e votimit në kongresin e tretë të PS. Ky rezultat ishte një tregues që sigurisht ka nevojë për analiza, por kam përshtypjen se jemi shumë afër për t’i hyrë këtyre gjërave në thellësi. Them që tani për tani unë jam duke reflektuar nga disa pikëpamje sepse mendoj që gjithsecili mund të nxjerrë disa konkluzione nga kjo që ndodhi në PS, por jo vetëm nga kjo. Unë vërtetë jam një protagonist i asaj çfarë ka ndodhur, por jam edhe një pjesë e së tërës. Pra duhet të mendoj se në ç’balanca apo ekuilibra do të notoj me qëllim që qytetari shqiptar të mos ngrejë gishtin dhe të thotë ç’na bëtë.

Blendi Fevziu: Ky është një shqetësim normal që është tek pjesa më e madhe e shqiptarëve sepse nuk është kollaj të ketë një pikëpyetje të madhe në zhvillimet në maxhorancë dhe në zhvillimet në qeverisjen e vendit. Por nëse ju nuk mund të bëni një analizë tani me stafin tuaj a keni bërë një analizë se përse një pjesë e madhe e shtypit u vu kundër jush? Nga analiza që bëj unë del që gjatë kohës që ju keni qenë kryeministër vazhdimisht keni qenë i mbështetur nga shtypi, sidomos duke patur parasysh kryeministrin para jush, Zotin Nano i cili gjatë kohës që drejtonte qeverinë ka qenë mjaft i atakuar. Si shpjegohet kjo përmbysje e raporteve në shtyp? Si shpjegohet që një pjesë e madhe e shtypit me një lloj ndikimi nga opinioni publik është rreshtuar krah Nanos kësaj here. A keni bërë një analizë?

Pandeli Majko: Sepse shtypi normalisht duhet të kontestojë një qeveri. Sepse shtypi normalisht duhet të dyshojë mbi një qeveri apo qeverisje, këtë unë e kam thënë edhe më përpara.

Blendi Fevziu: Megjithatë ishte një konkurrim për partinë Zoti Majko.

Pandeli Majko: Është pjesë e kontestimit. Pastaj ka anë të tjera të cilat unë nuk dëshiroj t’i komentoj sot. Mendoj se janë brenda atij reflektimi që thashë më parë, por nuk mendoj se gjithë shtypi ka qenë kundra.

Blendi Fevziu: Unë thash një pjesë e shtypit.

Pandeli Majko: Por, dyshime ka patur.

Blendi Fevziu: Flas për atë pjesë të shtypit që deri diku ka qenë e deklaruar. Megjithatë, meqenëse ju pak më parë përmendët në pyetjen tuaj disa nga pikëpyetjet lidhur me fushatën që ju keni bërë. Pyetja ime është shumë konkrete. Pse pikërisht në kulmin e fushatës për kreun e PS, ju zgjodhët të bënit një vizitë në SHBA dhe nuk morët pjesë në fushatën që po zhvillohej nëpër rrethe? Ndërkohë që konkurrenti juaj po bënte një fushatë, e para në jetën e tij kaq serioze.

Pandeli Majko: Vërtetë ashtu është, e para në jetën e tij shumë serioze, por normalisht ishte edhe në një hapësirë për ta bërë sepse tre vjet ka qenë në burg. Përsa i përket vizitës në SHBA, ishte një vizitë që unë e konsideroja shumë herë më të rëndësishme se sa fushat për kreun e PS. Sepse në këtë vizitë më duhej të rregulloja disa raporte të cilat unë i mendoja shumë fondamentale për të ardhmen e vendit.

Blendi Fevziu: Ju besoni se këtë vizitë nuk e keni përdorur për marketing politik?

Pandeli Majko: Jo, sepse deklarata ime e parë sapo mbërrita në Aeroportin e Rinasit ka qenë që qeveria amerikane nuk përkrah asnjë individ në fushatën për kryetar partie.

Blendi Fevziu: Ka patur një deklaratë të Ministrisë së Jashtme, të përgënjeshtruar më pas nga ministri i Jashtëm në të cilën thuhej se Zoti Hill shprehej se prishja e qeverisjes do të destabilizojë Shqipërinë.

Pandeli Majko: Se di, nuk e kam ndjekur këtë lloj deklarimi. Nuk e fsheh që unë me politikën amerikane kam kofidencën time dhe asnjëherë nuk kam menduar që kjo kofidencë mund të shërbejë si trampolinë që në mënyrë të paligjshme mund të të shtyjë të thuash që unë e kam prapa qeverinë amerikane për të bërë këtë apo atë. Qoftë edhe në marrëdhënie me kolegë të Europës me të cilët ndajë kofidencën përkatëse.

Blendi Fevziu: Zoti Majko meqenëse jemi tek Ministria e Jashtme më njoftuan se ka një deklaratë të Sekretarit të Shtetit, Zotit Maqo Lakrori i cili ka dhënë dorëheqjen nga posti, a jeni në dijeni të kësaj deklarate?

Pandeli Majko: Po, e kam takuar sot dhe meqenëse është ditë pushimi unë ia grisa dorëheqjen. Më erdhi në shtëpi siç vjen miku tek miku dhe mendova që duhet të reflektojë sepse realisht jo vetëm Lakrori, por edhe kolegë të tjerë po kalojnë një moment të vështirë. Të them të drejtën edhe kur u takuam unë ta thashë që ajo që më detyroi të vija sot këtu ishte thirrja jote që, lëre kryeministrin, po thërras një mikun tim. Dhe ju e kuptoni që ndonjëherë me mikun është shumë e vështirë kur flet dhe vepron përballë tij se sa me institucionet. Dhe unë në këtë pozitë jam me shumë kolegë sot, të cilët kalojnë një moment të vështirë psikologjik sepse brenda këtij reflektimi ka brenda shumë pse të cilat kanë një rëndesë shumë të madhe për ne socialistët. Më lejoni të them për ne socialistët sepse kam përshtypjen se kështu si ne mendojnë edhe mjaft të tjerë. Ju kujtoj votimin për kryesinë e PS ku janë larguar figura që unë mendoj se do t’i bënin nderë çdo partie po t’i kishte prezente. Shpesh mund të quhen lapsuse, por shpesh unë mendoj se janë pjesë e traumave që qoftë PS i kaloi ashtu siç në disa momente i ka kaluar PD. Nuk dua të bëj paralelizma, por nuk mund të shmang këtë konkluzion që kandidatura të tilla si Maqo Lakrori, Kastriot Islami apo pse jo edhe njerëz me investim në PS si Servet Pëllumbi kanë humbur në këtë kandidim.

Blendi Fevziu: Ju i jepni dot një shpjegim konkret kësaj Zoti Majko?

Pandeli Majko: Lufta brenda llojit Blendi. Lufta brenda llojit tek ne u shfaq mjaft e ashpër dhe shpesh u individualizua mbi një bazë të cilën e përsëris jam ende brenda mënyrës time të reflektimit për të parë se çfarë nuk shkon sepse në fund të fundit janë njerëz që kanë investuar në PS dhe kanë investuar në një mënyrë tjetër se sa ne që kemi ardhur aty, si djem të rinj nga bankat e shkollës. Këta njerëz i kanë dhënë PS me emrin e tyre dhe jo PS t’iu japi atyre. Me ne të tjerët ka ndodhur diçka tjetër, ne kemi marë nga PS. Ne përfaqësojmë një investim të PS në skenën politike shqiptare, kurse këta individë janë një lapsus që unë nuk di si do ta kalojmë. Mbase me një reflektim të brendshëm të socialistëve e cila me pak fjalë përkthehet në punë të përbashkët. Besoj se ju e ndoqët një ndërhyrje të Dritëroit i cili tha: Tani jemi të përlyer të gjithë.

Në fakt kjo që ne bëmë debat të brendshëm dhe pas një debati ku deklarohet se partia doli më e fortë etj, etj., le të flasim hapur, dolëm më dobët. Në radhë të parë përballë njëri-tjetrit si njerëz, prandaj unë thashë të merrja Nanon në telefon nuk ishte e lehtë sepse vërtetë politikanët kanë programin, kanë statutin, por kanë edhe shpirtin more Blendi. Kanë edhe atë që japin nga vetvetja, atë që quhet njeri në politikë. Dhe kur preket ky dimension dhe dy javë më pas të bësh sikur s’ka ndodhur asgjë është pak e vështirë, pak imorale.

Blendi Fevziu: Besoj se politikanët kalojnë gjendje të tilla dhe janë aq të fortë sa të kalojnë edhe situata si këto.

Pandeli Majko: Normalisht ne i kalojmë, por mos kujtoni se bëjmë sikur nuk i kuptojmë apo bëjmë sikur nuk i ndjejmë.

Blendi Fevziu: Dhe ju shpresoni se miku juaj Lakrori nuk do ta ngjisë nesër atë dorëheqje që ju ia grisët sot?

Pandeli Majko: Do ta diskutoj me të, unë mendimin tim të parë ia kam dhënë sepse nuk mendoj se njerëz të tillë, jo vetëm si Lakrori, nuk mendoj se duhen hedhur kështu. Nuk është ky parimi i politikës, në politikë duhet të vlerësohesh nga ajo çfarë ofron dhe jo nga vizat që të hidhen në një moment të caktuar të një debati të PS. Kjo më shqetëson, si do të heqim konceptin vizë përballë asaj që quhet vlerë.

Blendi Fevziu: Zoti Majko ose miku im Majko sepse ju pak më parë thatë që me miqtë është më e vështirë, me këtë që thatë më vutë mua në një lloj përgjegjësie sepse duke ju patur mik i bie që unë të mos jem mjaft i ashpër me ju. Por do t’iu kërkoj falje për këto minuta të këtij emisioni ku natyrisht do të detyrohem të jem i ashpër për të sqaruar më shumë një pjesë të enigmave të opinionit publik. Një nga këto pikëpyetje e ngritur në kongres dhe në konferencën e Tiranës ka qenë një akuzë direkte e bërë ndaj jush, që ju keni filluar të jepni kredi shtëpie për deputetët. Ju keni shpërndarë benefite për të marë votat e tyre, a është e vërtetë? Zoti Malaj ka demonstruar këtu një listë ku përmendet edhe emri i Zotit Islami. Disa ditë më parë ka qenë një debat që ka patur shumë komente.

Pandeli Majko: E para, kryeministri nuk mund të ndajë kredi në kuptimin ku të dojë ai dhe kujt të dojë ai. Këto kredi janë shpërndarë për një kategori të caktuar të administratës publike me vendim të posaçëm qeverie. Dhe nga institucione të ndryshme, tek unë vijnë propozime të cilat po me fonde që dalin po me vendim qeverie ndahen për institucione që normalisht nëse mund të quhen kështu, janë elita e shtetit. Kredi të tilla kanë marë deputetë të Parlamentit të Shqipërisë, kanë marë përfaqësues të Gjykatës së Lartë dhe Kushtetuese dhe përfaqësuesit e Prokurorisë dhe disa pjesë institucionesh të tjera.  Ne do të vazhdojmë me këtë koncept bazuar mbi këtë vendim qeverie.

Blendi Fevziu: Edhe pse nuk ka kongres.

Pandeli Majko: Normalisht. Nuk e di, por në atë listë ka qenë edhe emri i Fatos Nanos i pari mos gaboj. Kurse Kastrioti nuk e ka marë kredinë, e ka tërhequr të drejtën për ta marë atë kredi sepse e ka rregulluar në mënyrë tjetër që të më lehtësojë mua punën.

Blendi Fevziu: Zoti Majko, të nesërmen e votimeve për kryetar të PS kur ju kishit humbur dhe një pjesë e opinionit shqiptar nuk po orientohej. Komenti i Gazetës Shqiptare u shpreh që një nga shkaqet e humbjes së Majkos ishte se kolegët e tij ata që zyrtarisht e mbështetën nuk u çuan që të flasin në kongres. Dhe në fakt të gjithë anëtarët e kabinetit tuaj, vetëm Zoti Ulqini u shpreh hapur dhe foli mjaft ashpër në kongres. Asnjë nga anëtarët e tjerë nuk iu mbështeti, si e komentoni këtë?

Pandeli Majko: Nuk mendoj se është kusht i domosdoshëm që një kryeministër i cili kandidon për kreun e PS, të gjithë ministrat e tij duhet të vihen në rrjesht.

Blendi Fevziu: Nuk po flas për të gjithë ministrat, flas për mbështetësit kryesorë që kishin edhe vota në kongres.

Pandeli Majko: Mund t’iu them me bindje një fakt që Musa Ulqini humbi në kandidimin për kryesinë e PS vetëm sepse në mënyrë shumë të hapur mbrojti kandidaturën time. Ky është një fakt të cilin unë nuk ia kisha thënë Musait që në fillim. Nuk është problemi sa të mbrojnë apo se si mbrohesh në politikë. Ajo çfarë u zhvillua në PD dhe më pas në PS në fakt evidentoi një problem që ka qenë midis nesh, por ne e kemi anashkaluar. Në fakt politika nuk është vetëm grup i filanit apo filanit edhe kur këta janë të sajuar shpesh nga shtypi. Është një politikë gri e cila qëndron në mes dhe sapo të shikojë që një balancë shkon nga njëri krah, shkon atje dhe i thotë në momentin e fundit, ne me ty kemi qenë. Por kjo politikë gri që brenda ka mjaft politikanë mban lidhje dhe kontakte me të dy krahët.

Blendi Fevziu: A ka patur njerëz nga ata që kanë thënë jemi me ty dhe të nesërmen kanë kaluar në anën tjetër?

Pandeli Majko: E ç’rëndësi ka kjo. Unë po e përsëris se nëse ka patur një politikë gri e cila ka qenë një nga sëmundjet më të vështira që ekziston aktualisht është pikërisht kjo politikë gri e cila në emër të unitetit mendoj se ka luajtur një rol me efektivitet këtë radhë. Por do të thosha që kjo politikë gri si në PD, si në PS u fut në krizë shumë të thellë dhe shmangu disa prej figurave që ishin bërë pjesë e saj. Politika kërkon protagonizëm dhe t’i duhet ta ndash mendjen të jesh me këtë linjë apo me atë linjë. Se ç’ndodh pasi meren vendimet apo pasi krijohet maxhoranca, pastaj kjo është në moralin tënd si politikan për t’u orientuar. Kur zhvillohet një debat ka nevojë për dy palë, ajo që qëndron në mes mua më duket se është pjesa më e shëmtuar e debatit.

Blendi Fevziu: Pavarësisht se merr pjesën më të madhe të votave.

Pandeli Majko: Zakonisht po. Kjo nuk mund të shërbejë si akuzë për ata që marin shumicën e votave. Ka edhe njerëz që marin shumicën e votave sepse janë figura të tilla. Nuk mund ta quash politikan Dritëro Agollin i cili merr më shumë vota se të tjerët. Ai është një vlerë, një figurë që në cilëndo kohë që të ishte partia socialiste, pavarësisht se me kë krah do të ishte Dritëro Agolli do të merrte përsëri numrin më të madh të votave.

Blendi Fevziu: Zoti Majko një nga gjërat më të komentuara pas humbjes që ju pësuat në PS ka qenë një deklaratë që ju e keni bërë para kongresit ku jeni shprehur se: Unë jam gati të jap dorëheqjen nëse Nano fiton. Nuk po e bëj pyetjen se përse nuk e dhatë dorëheqjen, por pyetja ime është ndryshe. A mos ishte kjo një deklaratë për presion ndaj delegatëve për të siguruar stabilitetin?

Pandeli Majko: Ju keni të drejtë ta bëni pyetjen pse nuk e dhashë dorëheqjen. Mendova në radhë të parë si kryeministër. Në radhë të parë mënyra se si u zhvillua kishte brenda fenomene të cilat mund të ofronin një mënyrë destabilizimi në Shqipëri e cila u vërtetua me dhënien e oksigjenit mjaft individëve të cilët po kalonin dalëngadalë anash. Po përmend njërin prej tyre, fenomenin Berisha i cili deri në prag të kongresit të PS nuk mund të thuhet se përbënte një faktor të fortë në skenën politike shqiptare. Me mënyën se si ne socialistët i ndamë hesapet midis njëri-tjetrit, krijuan mjaft trauma në mënyrën se si ne po qeverisim vendin. Unë mendova se gjëja më e mirë do të ishte se duhej mbyllur cikli i ndërtimit të institucioneve të PS. Këtë e kam diskutuar edhe me kryetarin e PS edhe me kolegë të tjerë. Nuk është se ishte një moment që do ta ndaja vetëm me të. Sepse ndërtimi i strukturave të tjera në thelb janë gjeneratorët e politikës së një partie shumë të organizuar siç jemi ne socialistët. Kurse tani që ky moment ka përfunduar, pra PS ka komitetin e përgjithshëm drejtues, ka kryesinë e PS, ra gongu për diskutimin e qeverisjes.

Blendi Fevziu: Kjo do të thotë që në një nga mbledhjet e ardhshme të KPD-së ose Parlamentit ju do të kërkoni votëbesim?

Pandeli Majko: Absolutisht, unë jam tani kryeministër i një Partie Socialiste të ndryshuar në disa drejtime. Pas një debati do të thosha jo shumë normal. Jam kandidati që ka humbur edhe pse artimetikisht zgjedhjet për kreun e PS, tani bie gongu për të diskutuar problemin e qeverisjes në vend.

Blendi Fevziu: Kjo humbje e prek legjitimitetin tuaj si kryeministër?

Pandeli Majko: Po them dikë që më ka dhënë një nga mësimet e para. Një kongresmen amerikan në një shëtitje shumë të këndshme përreth një liqeni në Slloveni më tha: Në politikë nuk ka moral. Dhe unë shpesh e kam ndjerë këtë. Nuk është se s’ka moral njerëzor, por është morali që ne jemi mësuar ta ndeshim në rregullat normale të jetës. Dhe jam i bindur se ajo çfarë njerëzit konsiderojnë moral në jetën e tyre të përditshme, nuk është i vlefshëm në politikë sepse është një mënyrë tjetër e të ndërtuarit të marrëdhënieve të brendshme. Dhe e kundërta, ajo çfarë ata konsiderojnë si imorale në jetën e tyre të përditshme të konsiderohet plotësisht e moralshme në marrëdhëniet politike. Por pavarësisht të gjithave gongu ra. Duhet të diskutojmë për problemet e qeverisjes.

Blendi Fevziu: Në atë që ju shprehët në balancat në zgjidhje brenda komitetit të përgjithshëm drejtues mos keni parasysh se ai votim që solli Namik Doklen si sekretar të përgjithshëm dhe Arta Daden si sekretare të marrëdhënieve me jashtë mund të konsiderohet si një lloj votëbesimi për ju?

Pandeli Majko: Çdo individ ka karizmin e vet përpara atyre që e votojnë, ka vlerën e vet, por sigurisht që ka edhe përkrahje. Në momentin e caktuar, në mënyrën se si u zhvillua votimi le të themi që ne ishim një grup njerëzish brenda PS të cilët u evidentuan. Ndarja dhe psikologjia që ekzistonte në forumin përkatës bënte pothuajse të detyrueshëm që këta të ishin të mbështetur dhe të sponsorizuar nga disa fenomene apo politika që ekzistojnë aktualisht brenda PS.

Blendi Fevziu: Ju folët për moralin shoqëror dhe politik të cilët i konsideruat morale të ndryshme. Kur bëtë deklaratën për dorëheqjen tuaj në rast se humbnit, a kishit parasysh moralin politik?

Pandeli Majko: Jo, kisha parasysh në radhë të parë moralin njerëzor. Sepse deri në atë moment kur m’u bë pyetja mënyra se si ishte zhvilluar fushata e kandidatit tjetër karshi meje ishte pothuajse në një kufi isha i papërgatitur nga pikëpamja njerëzore. Si politikan nuk ndjeva ndonjë çudi, por nga pikëpamja njerëzore thashë: Po kjo? Më ka ngacmuar, nuk mund ta fsheh, jo lidhja me mafian, jo 14 Shtatori kanë pirë shampanjë, jo firmat piramidale, nuk e di.

Blendi Fevziu: A mund të quhen pjesë e moralit politik?

Pandeli Majko: Jo, ishte moral njerëzor. Në atë moment ajo pyetje nuk mund të kishte përgjigje tjetër. Tani gjërat zhvillohen në një mënyrë por që unë absolutisht i qëndroj asaj që është një parti socialiste e ndryshuar dhe kjo parti do të ketë disa kërkesa karshi qeverisjes. Pra, tani hapet një sirtar tjetër.

Blendi Fevziu: Këto kërkesa përballë qeverisjes a parashikojnë ndryshime në qeverisje?

Pandeli Majko: Të gjitha alternativat janë të hapura.

Blendi Fevziu: Përfshi edhe dorëheqjen tuaj?

Pandeli Majko: Për mendimin tim, kur them të gjitha alternativat janë të hapura nuk them përveç meje.

Blendi Fevziu: A e menduat përpara kongresit një kompromis të mundshëm me Nanon? Nano u zgjodh kryetar i PS, ju mund të qeverisnit si kryeministër duke bashkëjetuar me të?

Pandeli Majko: Gjërat nuk janë të thjeshta, gjerat shpesh janë më të komplikuara sepse nuk janë thjeshtë politike apo të programuara. Ndonjëherë në shtyp gjërat përpiqen të jepen në mënyrë alternative, por shpesh gjerat janë kaq njerëzore dhe nganjëherë janë kaq personale sa njerëzit nuk e kuptojnë se ajo quhet alternativë dhe ka në thelb disa interesa personale të një grupi individësh. Kjo nuk do të thotë që ky kongres i PS ishte kot, por gjithsesi unë i qëndroj këtij momenti që kishte shumë gjëra që ne mund t’i bënim ndryshe.

Blendi Fevziu: Megjithatë më duket se po shkoni në një lëvizje të detyruar sepse të nesërmen e zgjedhjes së Nanos ju keni deklaruar se: Idetë e mia politike janë shumë të ndryshme nga ato të kryetarit të porsazgjedhur të PS.

Duket sikur në këtë këndvështrim një kompromis i juaji është i pamundur.

Pandeli Majko: Jo, jo. Të jemi të qartë sepse është një deklaratë zyrtare kjo. Ka një ndarje të qartë midis meje dhe kryetarit të PS i cili u zgjodh përsa i përket raporteve që ne do të ndjekim në politikë. Kjo nuk është një ndarje e cila ka të bëjë me dy njerëz që kanë marë çomanget dhe po përgatiten për goditjen e radhës. Por këto fenomene që ndodhën në periudhën e kongresit nuk mund të përkthehen në: tani e tutje të punojmë sëbashku apo tani e tutje të vazhdojmë sikur s’ka ndodhur asgjë. Mendoj se këtu ka një ndarje. Normalisht nëse do të punohet që ajo të shikohet në realizëm për të mos u kaluar në një moment negativ. Nga ana ime jam duke e parë me një reflektim përkatës. Pra kjo ndarje nuk ka të bëjë me një ndarje të inatit të dy individëve. Sigurisht që këtu brenda ka një moment personal, por ky është një moment personal mëse i kuptueshëm.

Blendi Fevziu: Në vizionin tuaj a merret në konsideratë edhe një kompromis i mundshëm me Nanon?

Pandeli Majko: Kompromisi është vetë brenda rregullave që ka PS. Sepse kompromiset në politikë nuk janë se sa unë pëlqej Blendin apo sa Blendi pëlqen Pandeliun. Nëse ai në momentin përkatës thotë që: Shiko se ky kryeministër nuk shkon, duhet të sjellim një tjetër, kjo kalon në një moment të dytë që vlen të diskutohet në bazë të disa rregullave të caktuara dhe jo në bazë të i pëlqen apo jo dikujt.

Blendi Fevziu: Pyetja ime ishte më konkrete, sepse Zoti Nano në intervistën që bëri këtu pas kongresit u shpreh që në bisedën që ka patur me ju ka thënë që ka 52% në xhep dhe ju keni 48% dhe të dyja bashkë bëjnë 100%. E thënë ndryshe a jeni i gatshëm ju që të fusni dorën në xhep dhe këtë 48% ta bashkoni me 52% të Nanos?

Pandeli Majko: Unë nuk jam pronar i njerëzve që kanë votuar për mua. Ashtu siç mendoj se Nano nuk mund të jetë pronar i njerëzve që kanë votuar për të. Nuk mund të flitet me balanca të kësaj natyre që unë i kam tani 48% të njerëzve që kanë votuar për mua i kam në xhep dhe tani do t’i nxjerr në lodrën që do të luhet brenda PS për të bërë kompromisin përkatës që dikush të nxjerrë asin apo të realizojë momentin që dëshiron. Mendoj që gjerat mund të rregullohen me një logjikë të një natyre tjetër, por që kanë brenda një natyrë të ndryshme Nano e ka shprehur. PS na ka vënë disa rregulla shumë të qarta, u shatë u ndatë, jeni baltosur, tani rrini sëbashku dhe merruni vesh nëse keni dëshirë.

Blendi Fevziu: Kur Nano bëri deklaratën që nëse fitonte, në postin e kryeministrit do të ishte një grua, a ju ka shqetësuar?

Pandeli Majko: Jo, jo është batuta e radhës e një njeriu që unë e njoh shumë mirë.

Blendi Fevziu: Megjithatë për të insistuar më shumë këtu, si janë marrëdhëniet tuaja me Metën?

Pandeli Majko: Pse ka patur ndonjë problem?

Blendi Fevziu: Shtypi ka komentuar që Meta ka marë një ofertë për t’u bërë kryeministër nga Nano.

Pandeli Majko: Unë mendoj që shtypi në mënyrë periodike që kur unë me Metën kemi filluar të drejtojmë qeverinë shqiptare ka thënë që pritet që këta do të ndahen në filan muaj, në filan muaj dhe kjo është ndjekur në mënyrë periodike. Ata që na kanë dashur të keqen janë përpjekur të na ndajnë.

Blendi Fevziu: Edhe marrëdhëniet tuaja gjatë këtyre 9 vjetëve që keni qenë bashkë në PS, jo gjithmonë ka qenë perfekte.

Pandeli Majko: Jo.

Blendi Fevziu: Për të mos thënë të kundërtën.

Pandeli Majko: Po, është e vërtetë. Ne kemi patur momente ndarje me Ilirin. Me Metën kemi diskutuar në mënyrë shumë të hapur se çfarë mund të bëhet për vendin pikërisht në darkën e datës 14 Shtator në mos gaboj. Aty kemi filluar të mendojmë gjëra që po të na i kishte thënë dikush më përpara, vështirë se do t’i kishim menduar. Jo për t’i dhënë kolltukun dikujt por shumë të shqetësuar se ç’po ndodhte me këtë vend. Biseda ka filluar në një moment shumë të rëndë nga pikëpamja psikologjike. Ishin të gjithë ministrat që po prisnin të fillonte mbledhja e qeverisë dhe dikush tha që po vinte turma e PD e armatosur. Ministrat u larguan qetësisht me makinë dhe në një moment të caktuar të dy njerëzit që nuk kishin makina u bashkuan. Më pas na u bashkua edhe Gramoz Pashko dhe nuk mund t’iua shpjegoj atë rëndesë shpirtërore që të tre e ndjenim. Ishte e trishtueshme, thoja e pafalshme sepse ne i shikonim gjerat në një mënyrë tjetër. Ndërkohë që ne largoheshim, garda merte thasët dhe i vendoste për t’u mbrojtur me një turmë që nuk dihej se nga do të vinte. Ato janë momente psikologjike që sjellin një fund për disa gjëra, por ama hapin një moment të ri për disa gjëra të tjera. Dhe ishte një diskutim që ne e filluam shumë normalisht dhe në mënyrë shumë njerëzore të paktën kështu më është fiksuar. Pastaj filluam të bëjmë shaka me njëri-tjetrin sepse këto ndodhin ndonjëherë kur je në situata të vështira. Por brenda politikanit jeton një njeri i cili në momente të caktuara reflekton.

Blendi Fevziu: Megjithatë nëse do të ndodhte vërtetë kjo që është lajmëruar nga shtypi, a do t’iu vriste shpirtërisht?

Pandeli Majko: Kjo do të jetë diçka që do të diskutohet brenda rregullave përkatëse. Meta është krahu i djathtë dhe unë e kam deklaruar para konferencës së shtypit. Është njeriu që ka dhënë një kontribut unik në periudhën e menaxhimit të krizës. Meta është nga ata politikanë që do të kapë demin për brirësh, por ama po e kapi do të rrëzohet demi. Dhe pikërisht fillimi i menaxhimit të krizës ka një vulë të fortë të Metës. Ai nuk ishte nga ata ministra që qëndronin në zyrë, veshi xhupin dhe u nis në Kukës apo edhe në vende tjera. Unë do të evidentoja një moment përpara kongresit kur ne po diskutonim problematikat me të cilat po ndeshej PS ku aludoheshin lloji, lloji kandidaturash. Meta duke përkrahur kandidaturën time do të thosha se bëri më shumë nga ana morale. Ka dhënë një kontribut jo pak të vlefshëm përsa i përket balancave të mëpasshme në PS. Mendoj se është nga ata njerëz që dinë të vlerësojnë.

Blendi Fevziu: Po e kritikoni shumë rëndë shtypin dhe unë jam pjesë e këtij shtypi.

Pandeli Majko: Sa herë kemi pirë kafe bashkë e kemi sharë shtypin shqiptar. Unë kam sharë shtypin, ti ke sharë politikën.

Blendi Fevziu: Edhe unë kam pjesën time të rezervave përsa i përket shtypit nuk diskutohet, ka mjaft ekzagjerime, ka mjaft probleme që në radhë të parë reflektohen tek ne dhe më pas tek ju. Megjithatë si e përjetuat ju zgjedhjen e Dokles si sekretar i përgjithshëm?

Pandeli Majko: Unë e kam përjetuar në mënyrë të veçantë.

Blendi Fevziu: Nuk po flas vetëm për përjetimin, si përkthehet ç’do të thotë në balancën e forcave brenda PS?

Pandeli Majko: Përpara se të përjetoja këtë, përjetova një moment tjetër. Të flasim një herë se ç’përjetuam ne si njerëz. Musa Ulqini na bëri me zemër të gjithëve sepse kishte parë disa fletë me vizë me emrin e Dokles dhe ma bëri me shenjë që punët janë keq. I rashë Dokles pas dhe i thashë që kjo punë u mbyll. Do thoni ju që kandidati tjetër nuk ishte me cilësi të këqia që të mendonim se mori fund kjo punë. Unë do të doja të fitonte Dokle është njeriu i parë që kam takuar në PS. Është njeriu i parë që me ne socialistët ka patur një lidhje specifike. Është një njeri që renditet i dyti në politikën e PS dhe unë mendoj se ofron më shumë bashkim për të gjithë socialistët.

Blendi Fevziu: Por është një kundërshatarë i deklaruar i Nanos. A mund të krijojë kjo një konflikt brenda lidershipit të partisë?

Pandeli Majko: Blendi po përse duhet t’i diskutojmë gjërat me kundërshtarë, miqësorë, kompromis etj, etj. Dokle është një njeri që do të punojë për PS dhe jo për të kundërshtuar Nanon apo Metën. Ai është zgjedhur për një arsye krejtësisht tjetër. Kur socialistët kanë marë vesh se Dokle u zgjodh sekretar i përgjithshëm i PS, pavarësisht nga opinioni të gjithë janë kënaqur sepse thanë se u vendosën disa balanca që në fund të fundit ishin edhe psikologjike dhe të pritshme.

Blendi Fevziu: Zoti Majko po vazhdoj me pyetjet ngacmuese që ju gjithmonë ju pëlqejnë nga shtypi, por që janë pjesë e jona. A mund të flitet tashmë në PS për dy grupe, atë që mbështet Nanon dhe atë që mbështet Majkon? Apo bëhet fjalë për grupin Nano dhe anti Nano.

Pandeli Majko: Në një mënyrë të caktuar nuk duhet të lidhim situatën para kongresit me atë që do të zhvillohet më pas. Nuk besoj që në politikë njerëzit rrinë për të qenë anti dikujt. Të jesh në një funksion të caktuar për të qenë anti dikujt nuk e di si do të funksiononte kjo dhe për sa kohë. Ne kemi kaluar realisht dy trauma të cilat në thelb nuk kanë të bëjnë me je pro Nano apo pro Majko. Problemi shtrohet në mënyrë shumë njerëzore sepse ka të bëjë me marrëdhëniet e brendshme të një PS-je. Në fund të fundit do të vijë një moment që do të jemi përballë elektoratit. Kemi zgjedhjet e pushtetit lokal të vitit 2000, zgjedhjet elektorale të 2001 dhe imagjinoni në ç’pozita do të jemi nëse vazhdojmë me këtë frekuencë ndarje përballë njerëzve që do t’iu themi votoni për ne. Në mënyrën më ironike dikush nga salla mund të ngrihet dhe mund të thotë për cilën alternativë? Për ata që qëndrojnë majtas në tryezë apo për ata që qëndrojnë djathtas.

 Blendi Fevziu: Një ndarje ekziston Zoti Majko sepse katër ditë më parë në këtë sallë, rreth kësaj tryeze kanë qëndruar përfaqësuesit që mbronin kongresin dhe përfaqësuesit e PS që e kontestonin atë. Ka qenë një debat i Malajt dhe Koçit me Islamin dhe Doklen që ju besoj e keni ndjekur dhe ishte evidente dhe ndihej ndarja mes tyre.

Pandeli Majko: Ai emision nga një pikëpamje e caktuar do të ishte më mirë të mos ishte bërë. E di çfarë mendoja kur e shihja atë emision, nuk bëri ndonjë evidencë të veçantë për fenomenet që po ndodhin brenda PS. E vetmja gjë që mendova është sa keq. Por ama imagjinoje për një moment Kastriot Islamin me Arben Malajn në një tryezë dhe dy përfaqësues të PD përballë tyre. Unë them që ata janë të papërballueshëm. Kjo lloj ndarje ka edhe reflektim brenda. Dhe në thelb evidentohen energji të jashtëzakonshme. Të dy së bashku mund t’iu them se përbëjnë më shumë se një forcë energjike. Ata të dy tani janë duke mërmëritur nëpër dhëmbë disa fjalë kundër meje sepse nga ai emision ku i pashë ishin shumë të nervozuar. Por ky nervozizëm nuk vjen për atë se çfarë raporti kanë ata dy njerëz në PS, është diçka krejt tjetër. Në PS gjatë kësaj periudhe para kongresuale u evidentuan fenomene që nuk kishin të bënin as me alternativën dhe as me reformën, por kishin të bënin me atë që tha Dritëroi i madh, “tani jemi të përlyer të gjithë”. Se si u përlyem, se si u ngatërruam. Tani mbaroi kongresi dhe themi që PS u forcua dhe doli më e fortë. Në fakt duhet të hedhim sytë sepse përpara opinionit jemi edhe pak të goditur nga gjëra të cilat na kanë ardhur nga vetja jonë.

Blendi Fevziu: Po marrëdhëniet tuaja me median cilat janë në këto momente. E keni takuar besoj disa herë pas kongresit të tretë. Pardje shtypi është shprehur se Mejdani ka kërkuar largimin tuaj.

Pandeli Majko: Jo, jo. Mejdani është nga ata njerëz që ta thotë në sy kur diçka e mendon.

Blendi Fevziu: Nuk iu ka thënë asnjëherë këtë?

Pandeli Majko: Normalisht ai ka qenë sekretar i përgjithshëm i PS dhe unë kam qenë sekretar i marrëdhënieve publike dhe Mejdani është nga ata njerëz të cilët të thërrasin dhe të thonë që: Pandi unë mendoj që mund të bëhet edhe kështu. Sepse realisht, pavarësisht se disa gazeta janë përpjekur të orjentojnë marrëdhëniet e mia me presidentin e Republikës, kjo pjesë dhe kohët e vështira që kemi kaluar në PS e kanë dhënë atë kofidencë. Ai është zgjedhur president si përfaqësues i PS. Edhe diçka. Është e vështirë të bëhesh kundërshtar me Zotin Mejdani, bëj ç’të duash, ai i rregullon gjërat në mënyrë të tillë që nuk e bën dot armik.

Blendi Fevziu: Unë fola për marrëdhëniet institucionale dhe jo personale kur thashë a ju ka kërkuar dorëheqjen. Megjithatë po përqëndrohem edhe një herë tek pikat kryesore të fushtës elektorale për kryetar partie. Nano u shpreh se iu kritikoi për takimin me Berishën. Një takim që u bë pa mandatin e kryesisë së PS sipas Nanos. Duket sikur ju vetë nuk arritët ta mbronit këtë takim në kongres. A jeni bërë pishman për këtë takim? Flas për takimin e parë dhe jo për të dytin.

Pandeli Majko: Jo, jo nuk jam penduar. Ajo ka qenë ndër momentet më të vështira që unë kam kaluar në politikë. Dhe përpara se këta dy drejtues të qeverisë të akuzohen se çfarë kanë bërë duke tradhtuar partinë e tyre me një kundërshtar të PS, mirë do të ishte që jo vetëm në kongresin e PS të thuhej: ore dy djemtë më të rinj të PS ju thanë shkoni futuni atje te ajo godina me plumba dhe qeverisni. Kjo pyetje shtrohet normalisht? Përballë njerëzve që mendojnë se vetëm akuzat mund të realizojnë diçka pozitive për veten e tyre përballë të tjerëve.

Blendi Fevziu: Zoti Nano u shpreh se duke takuar Berishën ju vështirësuat punën e grupit të moderuar brenda PD, pra njohët si partner Berishën?

Pandeli Majko: Dengla. Ne kemi patur të tjerë partnerë brenda PD. Unë kam patur gjithmonë kontakte me kryetarin e Grupit Parlamentar të PD, me Pollon me të cilin më lidhin kofidenca edhe të një natyre tjetër pavarësisht nga bindjet.

Blendi Fevziu: Para kongresit ju nuk i shkuat në dasmë ku ishit i ftuar Zoti Majko.

Pandeli Majko: Do ta vija atë në pozitë të vështirë dhe do të vija edhe veten në pozitë të vështirë. Edhe ai do të akuzohej brenda PD dhe unë do të akuzohesha. Jetojmë në Shqipëri Blendi dhe më e lehtë është të jesh anti se sa pro. Dhe bazuar mbi këtë logjikë unë me Pollon kemi ndarë një sërë kofidencash të cilat nuk kanë të bëjnë me ndonjë kompromis të fshehtë, por ne jemi përpjekur të bëhemi protagonistë të arritjes së disa marrëveshjeve që kanë ekzistuar dhe që janë realizuar më parë mes PD dhe PS. Përsa i përket Berishës unë mund t’iu them këtë që të gjithë deputetët e PS kur shikonin Berishën në Parlament thoshin: sot do kemi sherr. Dhe të gjithë linin kafet, shkonin në dhomën e Parlamentit dhe përgatiteshin shpirtërisht se si do të vazhdonte sherri përkatës. Takimi me Berishën është një takim i cili bazohet mbi logjikën,  kryeministri dhe kryetari i PD. Nëse në atë moment kryetar i PD ishte Sali Berisha, unë do të takoja Sali Berishën. Dhe vetë ky moment ka vend për mjaft reflektime. U bëmë të qartë të gjithë qytetarëve se nuk është puna se ne po hapim një epokë të re, gjërat nuk fillojnë dhe mbarojnë tek politikanët. Njerëzit filluan ta shikojnë ndryshe politikën. Tani nuk shikohet ndryshe nëse një përfaqësues i opozitës ulet me një përfaqësues të maxhorancës.

Blendi Fevziu: Tani është e kundërta, tani është e jashtëzakonshme nëse një përfaqësues që ka votuar për Nanon i jep dorën një përfaqësuesi që ka votuar për ju.

Pandeli Majko: Le t’i lemë këto shaka. Tani ka filluar një proces që unë do ta quaja të jashtëzakonshëm nga disa pikëpamje duke patur parasysh kohën pas viteve 90-të. Pas këtyre takimeve pati një psikologji ç’tensionimi . Mund të them që kemi bërë një evolucion nga më të dukshmit dhe brenda radhëve të PD filloi një proces i brendshëm aq sa sot në thelb takimi i Nanos me Berishën nuk përbën më problem të jashtëzakonshëm.

Blendi Fevziu: Zoti Nano e deklaroi që ishte i gatshëm ta takonte Berishën.

Pandeli Majko: Ka njerëz që thonë le të mos takohen, janë kështu dhe le të vazhdojnë kështu. Unë mendoj se takimi i një përfaqësuesi të maxhorancës, i Nanos dhe Berishës tingëllon mëse normal. Një eveniment i madh do të ishte nëse s’do të kishte kontakte të tjera. Tani ne e kemi thyer akullin. Morëm përsipër damkën e të dyshimtit, por megjithatë më duket se kemi bërë diçka të mirë.

Blendi Fevziu: Unë bashkohem me këtë konkluzion tuajin, por ju pak më parë thatë që takimi juaj me Berishën hapi një proces në PD dhe pjesë e këtij procesi ishte edhe takimi i ministrit tuaj Rama dhe zv. kryeministrit Meta dhe Ferdinant Xhaferrit, përfaqësuesit të moderuar të PD.

Pandeli Majko: Për këtë pyesni Edin, ministrin e Kulturës dhe mikun tim, i cili ka formula të hatashme në momente tranzitore. Por të jeni i bindur që përveç pirjes së kafesë dhe diskutimit normal midis një politikani të PD dhe një politikani të PS nuk ka patur asnjë problem të një natyre tjetër. Këto janë rrjedhojë e një fryme të re. Përfaqësusesit e maxhorancës dhe ato të opozitës nuk mund të jenë gogol për njëri-tjetrin. Mendoj se kemi bërë diçka të mirë dhe idetë se një takim me Berishën mund të kthejë automatikisht në tradhtar unë mendoj se këtu vlerësim ka vetëm një njeri, Berisha. Koha ka treguar se Berisha ka nuhatje dhe ca gjëra i kupton më mirë se sa të tjerët që mendojnë se të pish pak më shumë se të tjerët dhe të flasësh për perëndimin pak më shumë se të tjerët, kjo mjafton për të quajtur reformator. Mendoj se përballë Nanos, Berisha në disa momente ka treguar për fat të keq vitalitet më të fortë se sa ai. Nano ka disa momente të tjera të cilat i ka shumë më pozitive, por që koha hap pas hapi do t’i vërë në dukje dhe njëkohësisht edhe në provë.

Blendi Fevziu: Meqenëse më kujtuat anën pro perëndimore të një politikani, ka qenë një pyetje që kam dashur t’iua bëj gjithmonë. Ju keni deklaruar vazhdimisht gjatë kohës që jeni kryeministër i Shqipërisë dhe orientimi i qeverisjes tuaj është pro amerikan. Si shpjegohet fakti që zyrtarët më të lartë amerikanë kanë vizituar Shkupin dhe jo Tiranën?  Ndërkohë që Shqipëria ka qenë e hapur dhe iu ka vënë në dispozicion të gjitha mundësitë që ka patur. Si shpjegohet që ju dhe Mejdani u detyruat të shkonit në Shkup për të takuar Clintonin?

Pandeli Majko: Kjo nuk do të thotë se vëmendja e politikës amerikane karshi Shqipërisë është e diferencuar. Ka një shqetësim të politikës amerikane për situatën në Maqedoni sepse deri në një moment para konfliktit në Kosovë, Maqedonia konsiderohej ndoshta hallka më e dobët e Ballkanit. E përsëris, kjo nuk do të thotë mungesë vëmendje.

Blendi Fevziu: Në rast se ju do të rikonfirmoheshit kryeministër në këtë proces ku thatë se nuk përjashtoheni as ju, cilët do të jenë ata ministra që do të ndryshoni?

Pandeli Majko: Dhe ju prisni që unë t’iua them këtu në emisionin tuaj?

Blendi Fevziu: Është një mundësi.

Pandeli Majko: Pa mandatin e partisë. Do të ishte një arsye më tepër që dikush të më kritikonte nesër që bën show televiziv pa mandatin e partisë.

Blendi Fevziu: Nëse do qëllojë që të jeni përballë Zotit Nano në mënyrë institucionale, a do ta takonit?

Pandeli Majko: Në disa momente ne jemi e njëjta teknologji, e njohim mjaft mirë njëri-tjetrin për të qenë të komplikuar përballë njëri-tjetrit.

Blendi Fevziu: Pra do takoheni?

Pandeli Majko: Normalisht. Do jemi brenda së njëjtës parti dhe përballë asaj të kaluare të përbashkët të cilën unë nuk mund ta rindërtoj në mënyra të ndryshme. Unë mendoj se ajo që kemi kaluar sëbashku na bën më të detyruar për të përcaktuar rregulla më të qarta përsa i përket të ardhmes. Nano është një politikan i sofistikuar, unë kam patur rastin ta njoh, t’i respektoj cilësitë dhe sigurisht jam i bindur që ai ka kuptuar mesazhin shumë të veçantë që PS na dha në këtë moment të vështirë që ne kaluam. Dëshiroj ta them këtë me një gjysmë dhimbje. Blendi nëse zgjedhjet do të bëheshin në Gusht të këtij viti PS do të kishte shumë më tepër vota se sa ne morëm në referendumin me kushtetutën. Ne kemi disa probleme, por unë mendoj që duhet të organizojmë sa më shpejt të jetë e mundur zgjedhjet për pushtetin lokal. Pas kalimit të kartës për autonominë e pushtetit lokal njerëzit duhet të kuptojnë se fati i Shqipërisë nuk varet vetëm nga vota e 100 e ca deputetëve.

Blendi Fevziu: A keni kohë t’i rikuperoni deri në zgjedhje këto probleme që keni brenda PS?

Pandeli Majko: Duhet.

Blendi Fevziu: Duhet, por a keni mundësi?

Pandeli Majko: Koha do ta tregojë.

Blendi Fevziu: Sot keni deklaruar, është transmetuar nga të gjitha mediat, i keni kërkuar të gjithë anëtarëve të kabinetit dhe gjithë zyrtarëve të lartë të shtetit që të deklarojnë pasurinë. Po ju vetë e keni deklaruar?

Pandeli Majko: Po.

Blendi Fevziu: Dhe jeni vërtetë aq i varfër sa jeni shprehur?

Pandeli Majko: Nuk besoj se e keni parë dokumentin e deklarimit të pasurive.

Blendi Fevziu: Jam i sigurt se nuk ka asnjë politikani që të shprehet se ka gjendje të mirë ekonomike.

Pandeli Majko: Kam përshtypjen se varfëria nuk të detyron të ulësh kokën.

Blendi Fevziu: Dhe pyetja e fundit që është më shumë njerëzore se sa politike duke besuar se kam qenë këmbëngulës në këtë intervistë. Tre ditë më parë kur dolëm nga zyra juaj për të pirë një kafe pasi kishim rënë dakort për këtë emision ju u shprehët se gjatë këtij viti që keni qenë kryeministër keni humbur shumë gjëra. Pyetja ime është shumë konkrete, çfarë keni humbur realisht?

Pandeli Majko: Kryeministrit nuk i shkon të bëjë rolin e viktimës. Kryeministri është pushtetari që paguhet më shumë në administratën shqiptare. Ai ka të qartë vetëm një gjë, të bëjë detyrën e tij. Unë vij nga një familje e cila ka qenë e lidhur me administratën e shtetit, im atë ka qenë ushtarak. Duhet të bësh detyrën, të ulësh kokën sepse paguhesh për këtë. Sot për mua është një datë e veçantë. 5 vite më parë unë kam humbur fëmijën tim. Dhe kur ju erdhët dhe më thatë se duhet të japësh një intervistë, mendova se kjo vlente më tepër sesa qëndrimi në heshtje i mbyllur së bashku me njerëzit e mi të shtëpisë. Por mendoj se njerëzit duhen kuptuar ashtu siç janë dhe unë mendova që kjo qeveri në një moment të caktuar ofroi një moment shumë të qartë përpara njerëzve. Pushtetarët duhet të bëjnë detyrën e tyre. Nesër është e hënë dhe ora 8 duhet të gjejë administratën në punë pavarësisht se një kryeministër deklaron se gongu ra për të filluar analizën e qeverisjes. Të jeni të bindur se sekretari i përgjithsëm i qeverisë, drejtorët e departamenteve juridike në qeveri kanë marë udhëzimet përkatëse. Unë kam marë zëvendësministrat të cilët janë njerëz që qëndrojnë të palëvizshëm në këto problemet e politikës së përditshme dhe po e ndjek me shumë vëmendje atë që quhet administratë. Qytetari shqiptar nuk do të dijë se si i ka marrëdhëniet Nano me Majkon apo se Majko ka tradhtuar me Berishën. Ai do të dijë a ka qetësi, si po i shtrohet rruga dhe a po i shtrohet rruga përpara shtëpisë ku ai banon, apo i vjen uji apo jo dhe këtë dimër do të ketë drita apo jo. Këto janë pyetjet që ne duhet të diskutojmë. E kemi tepruar aq sa nuk nuk shkon. E di që kur të vete në shtëpi do kem një grua që të më flasi ashpër për momentin e veçantë të ditës, por Blendi mendoj se nëse do të kisha diçka për të thënë është që para 5 viteshu unë kujtova se vdiqa sepse kisha humbur shancin tim të parë për të patur fëmijë. Por kuptova se nëse në krahë do të kesh njerëz që të duan mund të ringrihesh edhe nëse mendon se je në fund të varrit. Boll që të kesh në krahë njerëz që të vlerësojnë me dashuri. Prandaj edhe në këto momente kur unë them se gongu ra, të jenë të bindur të gjithë se unë di të ngrihem sepse kam parë dhe më keq. Jam kryeministri i një vendi që ka fituar një luftë dhe jam krenar për këtë dhe gongu ra për të shpresuar për diçka më të mirë.

Blendi Fevziu: Atëherë mbetet t’iu falënderoj dhe t’iu konfirmoj se e keni rikonfirmuar besimin tim se do jeni i hapur në këtë intervistë. Ju faleminderit.

Pandeli Majko: Faleminderit edhe ju.

 

Histori “Luftë e ashpër brenda llojit” intervista e njeriut që u bë Kryeministër në moshën 29-vjeçare