Presidenti Ilir Meta ka zhvilluar sot një komunikim online me mjekë e specialistë për të diskutuar rreth masave që mund të propozohen në luftën ndaj pandemisë.
Një nga mjekët e njohur në vend, Tritan Shehu tha se gjendja sot është jashtë kontrollit. Ai theksoi se duhet të bëhen sa më shumë teste në popullatë. “Sot gjendja është jashtë kontrollit, nesër do jetë akoma më jashtë kontrollit, kur të nisin edhe virozat. Shumë pak teste janë bërë. Popullsia duhet të bëjë testime, duhet të ftohet për këtë gjë. Bëhen vetëm 1400 teste, që janë pak”, tha Shehu.
Ish-ministri i Shëndetësisë, Petrit Vasili, tha se strategjia e testimit duhet të jetë perfekte dhe se qeveria ka marrë masa të gabuar.
“Themeli i gjësë mbetet që i gjithë sistemi të ketë një dekoncentrim të situatës. ‘Vija e zjarrit’, e ashtuquajtur, e vendosur në Qendrën Spitalore Universitare, është një ‘vijë zjarri’ e vendosur gabim. Kemi të bëjmë me një pandemi, jo me një shpërthim epidemiologjik. Nuk duhet kufizuar në hapësirë dhe në kohë. Nëse nuk e pranojmë pandeminë, në tërësinë e masave, por nisemi nga masa të shkëputura, do të ndodhë që të marrim masa që nuk e kufizojnë pandeminë, ngjallim mosbesim dhe nuk e bëjmë popullatën solidare me ne. Franca në 4 nëntor regjistronte 58 mijë raste. Mori masat e një lockdown-i të caktuar dhe Franca ka patur dje 4500 raste. Masat duhet të kenë efektivitet që të kufizojnë pandeminë. Masa si këto të marra deri tani, që nga 27 raste që ishte piku, në 835 raste, 40 herë më shumë, janë masa edhe të gabuara, edhe të pakonsultuara dhe që nuk e ndihmojnë pandeminë”, tha Vasili.
Mjeku Ajran Mezini propozoi që të testohen të paktën 800 persona në ditë dhe se vendet e BE me anë të kësaj procedure po zbulojnë rrënjën e infeksioneve. “Testimi masiv është shumë i rëndësishëm, edhe për shkak të shkëputjes së zinxhirit të infektimit. Ne duhet të testojmë së paku 800 vetë në ditë. Nuk mund të ketë shfajësim. Vendeve europiane nuk iu ka dalë jashtë kontrollit, por ata po zbulojnë rrënjën e infeksioneve”, u shpreh Mezini.
