Qendrat për Kontrollin dhe Parandalimin e Sëmundjeve dhe Pfizer, kanë nisur hetimin për vdekjen e një mjeku në Florida, i cili vdiq nga një gjendje e rrallë e gjakut dy javë pas marrjes së vaksinës kundër COVID-19.
Pfizer në një deklaratë që ka bërë për mediat tha se ‘po heton në mënyrë aktive’ vdekjen, por nuk beson se ai ka ndërruar jetë për shkak se të efektit të vaksinës.
“Nuk ka pasur sinjale të sigurisë të identifikuara në provat tona klinike [ose] përvoja të tilla deri më tani,” tha Pfizer në një deklaratë për mediat e huaja.
“Deri më sot, miliona njerëz janë vaksinuar dhe ne po monitorojmë nga afër të gjitha rastet e padëshiruara tek individët që marrin vaksinën tonë. Është e rëndësishme të theksohet se raste të rënda anësore, përfshirë vdekjet që nuk kanë lidhje me vaksinën, për fat të keq ka të ngjarë të ndodhin me një ritëm të ngjashëm siç do të ndodhnin në popullatën e përgjithshme”.- tha kompania Pfizer.
Dr. Gregory Michael, një obstetër gjinekolog 56-vjeçar në Miami Beach, mori vaksinën në Qendrën Mjekësore Mount Sinai në 18 dhjetor dhe vdiq 16 ditë më vonë nga një hemorragji në tru, shkroi gruaja e tij, Heidi Neckelmann në një postim në “Facebook”.
Vdekja e Michael është duke u hetuar së bashku me Departamentin e Shëndetësisë në Florida dhe Qendrat federale për Kontrollin dhe Parandalimin e Sëmundjeve.
Agjencitë lokale dhe federale po hetojnë vdekjen e Dr. Michael. Disa ekspertë thanë se çështja ishte tejet e pazakontë, por mund të kishte qenë një reagim i rëndë ndaj vaksinës.
Departamenti i Shëndetësisë në Florida referoi vdekjen e Dr. Michael në Qendrat për Kontrollin dhe Parandalimin e Sëmundjeve (CDC) për hetim. Kristen Nordlund, një zëdhënës i CDC, tha në një deklaratë se agjencia do të “vlerësojë situatën kur më shumë informacion të bëhet i disponueshëm dhe do të sigurojë azhurnime në kohë për atë që dihet dhe çdo veprim të nevojshëm”.
