‘Laku’ për Valdrin Pjetrin sa vjen dhe ngushtohet. Pas publikimit të dokumenteve nga PD në lidhje me dënimin e kryer në Itali dhe dëbimin nga shteti në fjalë, burime pranë prokurorisë bëjnë me dije se organi i akuzës ka lëshuar urdhërin për marrjen e shenjave të gishtave për fituesin e zgjedhjeve monopartiake për kreun e Bashkisë Shkodër.
Nëpërmjet një shkrese, Prokuroria e Përgjithshme i është drejtuar Ministrisë së Brendshme, Drejtorisë së Përgjithshme të Policisë dhe Institutit të Policisë Shkencore, ku kërkohet marrja e shenjave të gishtave për kryebashkiakun e ri të Shkodrës.
Një ditë më parë, Partia Demokratike publikoi dokumente, të cilat dëshmojnë se i zgjedhuri i Partisë socialiste për kryetar të Bashkisë së Shkodrës Valdrin Pjetri, ka qenë i dënuar në Itali nën akuzën e prodhimit dhe trafikimit të substancave narkotike.
Një dënim të cilin ai nuk e ka deklaruar në formularin e dekriminalizimit. Prej disa ditësh Pjetri ka mohuar akuzat se ka qenë i dënuar dhe vijoi ta bëjë këtë dhe pas publikimit të dokumenteve italiane.
Ndërsa në një reagim të tij kryeministri Edi Rama u shpreh se “deri kur e vërteta ligjore të dalë, Valdrin Pjetri dhe Partia Socialiste i kanë rrugët e ndara plotësisht”.
