Detaje të tjera janë zbardhur në lidhej me operacionin e antidrogës dje në Elbasan, ku u sekuestruan 4.2 kg heroinë dhe u arrestuan 5 persona.
Në pranga fillimisht përfundoi shtetasi Gëzim Balla, i cili drejtonte furgonin me lëndë drusore, ku ishin fshehur pakot me heroinë. Ai është arrestuar në flagrancë, pasi policia gjeti dhe sekuestroi 8 pako me drogë, me peshë totale 4 kg e 215 gr, dhe një sasi kanabisi.
Sot u njoftua edhe për arrestimin e radhës, ku në pranga ka rënë 36-vjeçari Gazmir Harremi, i cili sipas policisë i siguronte lëndën narkotike shtetasit të arrestuar ditën e djeshme, Gëzim Balla.
Gjithashtu në lidhje me këtë ngjarje, janë arrestuar edhe katër persona të tjerë: Haziz Musai, Xhulio Musai, Danjel Xhelilaj dhe Endrit Karaj.
Policia njoftoi dje zyrtarisht se ishte finalizuar operacioni i koduar “Kështjella”, nën drejtimin e Prokurorisë. Aksioni u shtri në Elbasan dhe në disa qytete të tjera, duke u mbyllur me sekuestrimin e 4.2 kg heroinë.
Hetimet për goditjen e grupit kriminal të trafikut ndërkombëtar të heroinës, kishin nisur përpara një muaji. Droga kishte ardhur nga Turqia dhe do të trafikohej drejt Greqisë. Disa prej tyre janë mbajtur nën vëzhgim, derisa dje u bë ndërhyrja dhe arrestimi në flagrancë.
