Mbërritja e një pëllumbi amerikan në Australi ka tërhequr vëmendjen e mediave dhe të autoriteteve. 13 mijë kilometra i janë dashur pëllumbit të pagëzuar Joe Biden për të kaluar Paqësorin. Autoritetet po shohin mundësinë për ta vrarë, sepse sipas tyre, është rrezik për shpendët e tjerë, dhe mund të bart sëmundje.
Një pëllumb garash amerikan i ka mbijetuar një udhëtimi të jashtëzakonshëm përmes Oqeanit Paqësor prej 13,000 kilometrash, nga Shtetet e Bashkuara për të gjetur një shtëpi të re në Australi.
Por autoritetet australiane e konsiderojnë zogun si një rrezik për biodiversitetin në vend dhe po planifikojnë ta vrasin atë.
Mediat australiane njoftojnë se pëllumbi mbërriti i rraskapitur pak ditë më parë në Melbourn.
Ai ishte zhdukur që më 26 tetor në Oregon, në SHBA. Pëllumbi amerikan është pagëzuar me emrin Joe, sipas presidenti i zgjedhur amerikan. Ai kishte hyrë në një anije mallrash për të kaluar Paqësorin.
Pëllumbi Joe ka tërhequr vëmendjen e medias australiane por edhe të Shërbimit të Inspektimit të kafshëve në vend.
Autoritetet janë të shqetësuar se mos pëllumbi bart sëmundje dhe rrezikon zogj të tjerë.
Departamenti i Bujqësisë, i cili është përgjegjës për biosigurinë, tha se pëllumbi “nuk lejohet të qëndrojë në Australi” sepse “mund të rrezikojë sigurinë ushqimore të Australisë dhe popullatat australiane të shpendëve të egër”.
“Ai paraqet një rrezik të drejtpërdrejtë të biosigurisë dhe industrinë tonë të pulave,” tha një deklaratë e departamentit.
Një situatë e ngjashme ka qenë edhe në vitin 2015, kur qeveria kërcënoi të vriste dy terrierë sepse ishin futur kontrabandë në vend nga çifti hollivudian Johnny Depp dhe ish-gruaja e tij Amber Heard. Të ballafaquar me një afat prej 50 orësh për të lënë Australinë, Depp i largoi ata me një avion me çarter.
Unioni Amerikan i Pëllumbave të garave, me bazë në Oklahoma, ka konfirmuar se Joe ishte regjistruar tek një pronar në Montgomery, Alabama.
Shpendi e kalon çdo ditë në oborrin e shtëpisë së një qytetari australian i quajtur Celi Bird.
