“Burg pa afat” është masa e sigurisë që Gjykata e Lezhës ka dhënë sot për Gjergj Gjinin, autorin e dyshuar të plagosjes së 43-vjeçarit Hil Gjini, ngjarje e ndodhur mëngjesin e së martës në Balldre të Lezhës.
Gjergji ka thënë në seancë e sotme se ka pasur konflikte të mbartura me Hilën dhe se ditën e krimit nuk kishte qëllim që ta plagoste. “Unë i zura pritë për ta trembur. Nuk kisha qëllim që ta qëlloja me armë”, tha 69-vjeçari.
Ndërsa avokati i Gjergjit kërkoi një mase më të butë ndaj klientit të tij me pretendimin se ka probleme shëndetësore me zemrën, kërkesë që nuk u mor në konsideratë.
Mëngjesin e 1 dhjetorit Gjergj Gjini i zuri pritë dhe qëlloi me armë fqinjin e tij Hil Gjini, teksa ky i fundit po dërgonte 4 fëmijët në shkollë me automjetin e tij. Fëmijët e të dëmtuarit kanë ndërhyrë për t’i hequr armën nga dora 69-vjeçarit, duke përjetuar edhe momente paniku.
