I njohur me nofkën “Peshkaqeni”, Princ Dobroshi nga Peja kishte zënë për vite me radhë faqet kryesore të gazetave në Norvegji e Çeki. Ai njihej si bosi i mafias shqiptare të drogës, saktësisht heroinës. Për këtë dhe vepra të tjera penale ai u arrestua dhe dënua me 19 vite burgim duke iu ndaluar kështu edhe hyrja në vendet e Bashkimit Europian.
Ai ishte larguar nga Kosova në vitin 1988. Fillimisht kishte shkuar në Gjermani, ku ishte marrë me biznesin e kazinove. Pas Gjermanisë ai kishte shkuar në Norvegji.
Në vitin 1993, Princ Dobroshi, u arrestua nga policia norvegjeze nën dyshimin për trafik droge. Në një rrëfim për mediat në Kosovë pas kthimit të tij, ai thoshte se kishte qenë në kazino kur shoku i tij me emrin Zhuzepe i kishte kërkuar para. “Më tha nëse mund t’ia dërgoja 130 mijë marka. Kur jam afruar afër veturës për t’ia dhënë paratë njerëzve të tij, është shfaqur policia. Në makinën që më priste mua ishin 5.4 kilogram heroinë dhe rasti shkoi në gjykatë ku u dënuam”, pati thënë Dobroshi për Gazetën Jeta në Kosovë.
Siç raporton portali “Royalcentral.co.uk”, që prezantohet si burimi më i madh i informacionit për familjet mbretërore nëpër botë, rrjeti i tij kosovaro-shqiptar nisi planifikimin e rrembimit të Princit Haakon. Ata deshën ta merrnin peng atë për ta shkëmbyer pastaj me lirimin e liderit të tyre nga burgu.
Gjykata në Norvegji në vitin 1994 e kishte dënuar atë me 14 vite burgim.
Dobroshi, kishte arritur të arratisej nga burgu në vitin 1997, pasi kishte korruptuar rojën e burgut. Pas arratisjes, sipas shefit të antidrogës, ishte fshehur në Kroaci ku kishte bërë një operacion plastik në fytyrë.
Autoritetet policore çeke kishin lëshuar një njoftim të përbashkët në të cilin thuhej se kishin lokalizuar Dobroshin.
Në aksionin e koduar “Kafaz”, operacioni i të cilit kishte zgjatur dy vjet, e që ishte mbështetur nga policia suedeze, daneze e veçanërisht ajo norvegjeze, kishte rezultuar me kapjen e Dobroshit, me 23 shkurt të vitit 1999.
Prej 99-es kur ishte rikthyer në qeli, Dobroshi kishte qëndruar deri në vitin 2005 duke rrumbullakosur nëntë vite burg ne kuadër të dënimit prej 14 vite burgim. Dy vite kishte ikur nga burgu ndërsa tre vite tjera i ishin hequr nga autoritetet norvegjeze.
Në vitin 2005 kur kishte kryer burgun, Princ Dobroshi ishte përcjellur nga autoritetet norvegjeze nën masa të rrepta sigurie për në Kosovë. Dëbimi ishte kryer me helikopterë pasi nga autoritetet policore të këtij shteti ishte vlerësuar si njeriu më i rrezikshëm që kishte qëndruar në burgjet norvegjeze. “Peshkaqeni” nuk kishte me të drejtë të kthehej në Norvegji.
Pas kthimit në Kosovë, Dobroshi nis të vazhdojë aktivitetin e tij në fushën e lojrave të fatit.
Më 28 mars të këtij viti në Agjencinë për Regjistrimin e Bizneseve ai ka hapur biznesin “StarLotoSport”, e cila për aktivitet kishte bastvënien. Pas 14 ditësh ka bërë kërkesë për ndërrimin e emrit të biznesit duke e regjistruar si “Eurolive-24”. Kjo kompani ishte e regjistruar për bastvënie, bixhoz si dhe kafe.
Administrata Tatimore e Kosovës më 2 maj të vitit 2012 i ka dhënë licencën për operimin si bastore sportive kompanisë “Eurolive-24”.
Bota
