Kosova18 Qershor 2023, 18:24

Mediat serbe paralajmërojnë lëvizjen "suprizë" të Beogradit për veriun e Kosovës

Shkruar nga Pamfleti

Mediat serbe paralajmërojnë lëvizjen "suprizë"

Serbët në Kosovë po planifikojnë të fillojnë vetë formimin e Unionit të Komunave Serbe (ZSO), njofton media serbe Blic, duke iu referuar informacioneve jozyrtare.

Në periudhën pasuese planifikohet të mbahet një Kuvend serbësh nga Kosova, në të cilin do të shpallet ZSO dhe do të themelohen organet e Bashkësisë.

“Plani është që së shpejti të fillojë formimi i Unionit të Komunave Serbe dhe organeve të tij dhe Dragisha Miloviq, një mjek i respektuar dhe ish-kryetar i komunës së Zveçanit, do të propozohet për kryetar të parë të ZSO-së”, shkruan Blic.

Sipas raportimit marrëveshja e Brukselit është nënshkruar më shumë se 10 vjet më parë.

"Asociacioni i Komunave Serbe nuk është formuar për më shumë se 3700 ditë, dhe pas gjithçkaje që kemi duruar ditët e fundit, është e qartë se askush nuk e dëshiron realisht: as qeveria në Kosovë, as bashkësia ndërkombëtare. Kjo është arsyeja pse ne do t’i marrim gjërat në duart tona”, shton burimi .

Presidenti serb Aleksandar Vuçiç ka njoftuar sot se serbët në Kosovë do të marrin vendime të rëndësishme për Vidovdan (28 qershor), duke paralajmëruar kështu atë që raporton Blic.

“Vidovdan është një ditë e rëndësishme në historinë serbe….Serbët do të bëjnë hapat e tyre paqësisht në rrugën e lirisë së tyre, në përputhje me normat juridike ndërkombëtare.

Përsa na përket ne, nuk do të informojmë më askënd, përveç ngritjes apo uljes së gatishmërisë luftarake, përveç detyrimeve tona ndaj NATO-s, të cilat do t’i përmbushim gjithmonë plotësisht në përputhje me Rezolutën 1244.

Do të përpiqemi të ruajmë paqen, por i paralajmërojmë të gjithë ata që nuk i intereson paqja dhe që duan që serbët të dëbohen nga veriu i Kosovës pak më qetë dhe jo aq me zë të lartë, se kjo nuk do të ndodhë. Kaq duhet t’u them”, tha Vuçiç.

Kujtojmë se Vidovdani është përkujtimi serb i betejës së Fushë Kosovës, aty ku osmanët nisën sundimin e Ballkanit.

mediat serbe veriu i kosovës zso