Mediat europiane ka disa ditë që publikojnë fakte të reja të marra nga Departamenti Amerikan i Drejtësisë për financimin nga parajsat fiskale të lobimit të kreut të PD në SHBA. Deri më tani Berisha ka postuar mesazhe kundër qeverisë, Ramës deri për vaksinën kundër gripit. Asnjë fjalë në mbrojtje të liderit demokrat. Ish kryeministri, në përplasjen Bashën për të kapur lidershipin e PD po kërkon që “faturën” e këtij skandali t’ia lërë vetëm liderit demokrat. Për më tepër po përpiqet që ta shfrytëzojë në luftën e tij brenda PD
Për disa ditë me radhë po botohen fakte të reja nga ana e mediave prestixhoze europiane në lidhje me lobimin me para ruse të Lulzim Bashës në Uashington.
Në fillim ishte “The Times”, media britanike, ajo që referuar dokumenteve të Departamentit Amerikan të Drejtësisë, akuzoi Bashën se është financuar nga ana e kompanisë guackë “Biniatta Trade” me qendër në Skoci.
Sipas medias britanike, prapa këtyre parave qëndrojnë oligarkët rusë, të cilët kanë depozituar në llogarinë bankare të lobistit amerikan Nic Muzin 650 mijë dollarë për llogari të Bashës, për t’i përdorur për lobim në favor të demokratëve në SHBA.
Madje “The Times” kritikonte fort ligjvënësit dhe qeverinë britanike se përse nuk mbështesnin më fort hetimin e lëvizjes së këtyre parave të pista në favor të një partie politike shqiptare.
Ndërsa një ditë më parë ka qënë media gjermane “Bild” ajo që publikoi fakte të tjera që kishin të bënin me financimin e lobimit të Bashës në SHBA, me para ruse.
Madje “Bild” shkoi më tej, duke nënvizuar faktin se këto para nga bota e nëndheshme e krimit rus kishin shkuar në favor të lobimit kundër hapjes së negociatave të Shqipërsisë me BE, për sa kohë në krye të qeverisë të ishte Edi Rama.
“Bild” nënvizon se lobimi kundër negociatave kishte për qëllim dëmtimin e qeverisë shqiptare, pasi një hapje e bisedimeve me BE, argumentohej se do t’i jepte pikë Edi Ramës.
Për në të gjithë këtë përplasje të fortë, ku eksponentë të PD akuzojnë Ramën se ka dorë në rihapjen e kësaj çështjeje për të zhurmuar vendimin e gjykatës që e çliroi Bashën nga akuzat dhe vetë akuzat e opozitës ndaj kryeministrit për shitjen e interesave të Kosovës me mini-shengenin Ballkanik, vetëm një njeri ka heshtur.
Sali Berisha nuk ka thënë asnjë fjalë në lidhje me të gjitha këto zhvillime politike, të cilat e kanë vënë dhe njëherë Lulzim Bashën në qendër të goditjes, për shkak të ri-nxjerrjes në skenë të lobimit me para ruse në SHBA.
Ish kryeministri demokrat gjatë gjithë këtyre ditëve ka postuar mesazhe në rrjetin social që nga keqqeverisja e Ramës, abuzimi i tij me pushtetin, marrëveshjen sipas tij për krijimin e një force të përbashkët ruso-serbe shqiptare, e deri tek vaksinimi i popullsisë kundër gripit.
Por nuk e ka “gjetur” kohën për të sulmuar të paktën sot Ramën në lidhje me publikimin në “Bild” të materialeve kompromentuese për lobimin e Bashës. Madje as pas fshirjes së lajmit nga vetë gazeta gjermane, Berisha nuk ka folur asnjë fjalë.
Me sa duket konflikti mes Berishës dhe Bashës ka arritur deri në atë pikë, sa ish kryeministri nuk reagon as ndaj akuzave, të cilat nuk dëmtojnë jo thjeshtë e vetëm Bashën, por dhe vetë PD.
Ish kryeministri, në përplasjen me kreun e PD për të kapur lidershipin e partisë po kërkon me të gjitha mënyrat që “faturën” e këtij skandali t’ia lërë vetëm Bashës. Për më tepër që ta shfrytëzojë në luftën e tij brenda PD. Berisha po ia servir të “ftohtë” hakmarrjen Bashës, sa herë i jepet rasti./Pamfleti
