Qeveria ka nxjerrë vendime se si do veprohet me privatët, shkollat, qytetarët, të papunët, biznesin e madh e të vogël, në këtë moment pandemie koronavirusi që ka pushtuar vendin. Eshtë kujdesur, siç thotë, për shtresat në nevojë, pleqtë dhe për oligarkët që të mos u ndërpritet pagesa. Asnjë fjalë për punonjësit e administratës, as në vendime, as në postime dhe as në shpalljen e gjendjes së fatkeqësisë natyrore. Emergjencë një vendim qeverie, pasi janë 165 mijë punonjës, që bashkë me familjet shkojnë gjysmë milionë njerëz, të rrezikuar nga koronavirusi
Qeveria ka nxjerrë akte normative për privatët, shkollat, shtresat në nevojë, biznesin e vogël, të madh, për ecjen 2 metra larg njëri tjetrit, kufizimin e orareve të lëvizjes së makinave dhe qytetarëve. Eshtë vënë që në fillim numri 127 tek Urgjenca e Infektivit për të treguar të gjitha simptomat, kanë bërë prezente penalizimet e qeverisë nëse shkel rregullat, nëse vjen në Shqipëri dhe nuk deklaron se vjen nga vendet e “zonës së kuqe” etj.
Pra ka shpallur shtetërrethim për të përballuar epideminë e koronavirusit dhe mirë ka bërë për të gjitha. Ka dhënë para pa fund për oligarkët dhe po kaq në mënyrë të pafundme ka dalë live në rrjetin social dhe në media vetë Edi Rama duke u lutur Zotin shqiptarëve që të mos lëvizin nga shtëpia dhe në orarin e përcaktuar, pa pasur hall.
Vetë administrata, nga më e larta deri tek e ulta ka mbetur duke parë çdo vendim qeverie apo postim të kryeministrit Rama për të gjetur veten qoftë dhe mes rreshtave se si do veprohet me ta.
Bëhet fjalë nëse do të shkojnë çdo ditë në zyra dhe punët e përditshme që nuk kanë lidhje me domosdo me emergjencat e përballimit të koronavirusit apo dhe mund të punojnë nga shtëpia.
U dha një udhëzim në fillim të përhapjes së koronavirusit që kush ka mundësi të punojnë nga shtëpia, por pa vendim qeverie. Më pas asnjë fjalë për administratën. Do përfshihen dhe ata te qytetarët që duhet të qendrojnë në shtëpi për t’u mbrojtur nga koronavirusi apo do ikin në zyrë.
Rastet e punonjëses së kadastrës në Korçë që rezultoi pozitiv me koronavirus çka solli dhe karantinimin e 59 punonjësve të tjerë, i policit gjyqësor në Shkodër etj, janë këmbanë alarmi për qeverinë që të japë një vendim të prerë dhe për punonjësit e administratës.
Pasi dhe në vendimin e qeverisë për shpalljen e gjendjes së fatkeqësisë natyrore, askund nuk flitet për faktin se ku do të qendrojnë punonjësit e administratës në këtë periudhë piku të epidemisë së koronavirusit, dhe të thirrjeve për qytetarët që të qendrojnë brenda në shtëpi.
As vetë dikasteret s’kanë nxjerrë një vendim të qartë, duke e lënë gjithçka në mënyrë fakultative, ndërkohë që punonjësit, pjesa më e madhe e tyre, shkojnë nëpër zyra, duke rrezikuar seriozisht të infektohen nga epidemia. Pavarësisht maskave, dorezave apo masave të tjera rrethanore që mund të marrin.
Është emergjencë që qeveria të dalë me një vendim të prerë se ku do të qendrojnë punonjësit e administratës, në shtëpi apo në zyrë. Nuk janë pak, janë mbi 165 mijë të tillë që do të ishte një minë me sahat për gjithë vendin, pasi pas tyre kanë dhe familjet që mund të shkojnë deri në gjysmë milioni kontingjent njerëzit për t’u infektuar. Kjo do ta fuste vendin në kolaps./Pamfleti
Bota
