Pas ka përfituar projekte pafund nga Zhvillimi i Rajoneve duke marrë nga arka e shtetit 74 milionë euro në vitet e fundit, Paqsor Buzi s’ka qëndruar në “paqe” me fitimin si pjesë e “oborrit” qeveritar. Në shtator 2019 ai ishte një nga 15 të arrestuarit nga policia nën akuzën se ka krijuar skema mashtruese në fushën e taksave, duke prodhuar fatura fiktive shit-blerjesh. Kriteri bazë i përzgjedhjes së biznesve për t’u “dorovitur” nga kryeministri është të qenit brenda oborrit të qeverisë dhe niveli i lartë i maskarallëkut
Çudirat e Edi Ramës në përdorimin e parave të shqiptarëve nuk rreshtin, teksa nuk mungon të “dorovisë” oligarkët klientë të tij edhe pse janë nën hetim dhe më pas në burg.
Rasti më i freskët është ai i kompanisë “G.P.G Company” me pronar Paqsor Buzin, i cili renditet në 6 vendet e para të përfituesve më të mëdhenj të punëve publike dhe milionave nga arka e shtetit shqiptar
Pasi ka fituar tenderin për ndërtimin e rrugës Voskopojë-Kisha e Shën Prodhomit me ofertën prej 83 milionë lekësh nga Agjencia për Zhvillimin Rajonal e Korçës, kjo kompani nuk është ndalur në përfitime.
Përveç këtyre tenderave të fituar drejtpërdrejt, kjo kompani ka kryer punime në infrastrukturë nga Konispoli në Vermosh, si e nënkontraktuar nga kompani të tjera. Mes këtyre punimeve renditen punime për Bypass-in në Vlorë dhe punime të tjera në Rrugën e Arbrit, duke qënë nënkontraktor i oligarkut tjetër klient të Ramës, Rrok Gjoka.
“G.P.G Company” ka fituar 32 projekte të financuara nga Komiteti i Zhvillimit të Rajoneve me vlerë totale 28.6 milionë euro. Me këtë vlerë Paqsori ka rikonstruktuar qendrat e qyteteve të Korçës, Beratit, Delvinës, Lushnjes dhe Konispolit si dhe projekte të tjera në asfaltim rrugësh dhe bulevardesh, ndërtim shkollash apo ujësjellësa.
Sipas të dhënave të Thesarit, “G.P.G Company” ka përfituar tendera publikë në vlerën e 74 milionë eurove në total përgjatë 4 viteve të fundit.
Por Paqsor Buzi nuk është mjaftuar me paratë që ka marrë nga buxheti i shtetit, si dhuratë nga ana e Ramës për klientët e tij të oborrit. Ai nuk ka qënë aq “paqësor” sikurse ka emrin, pasi në shtator të vitit të kaluar Buzi ishte një nga 15 të arrestuarit nga policia nën dyshimin se kanë krijuar skema mashtruese në fushën e taksave.
Kontraktori më i madh i qeverisë në projektet e “Rilindjes Urbane”, u arrestua si pjesë e një grupi biznesmenësh që dyshohet se janë përfshirë në një skeme mashtruese me tatimin mbi vlerën e shtuar, TVSH.
Pronari i kompanisë së ndërtimit “G.P.G Company” sh.p.k u prangos bashkë me 14 biznesmenë të tjerë në Tiranë, me akuzat e “krijimit të skemave mashtruese me TVSH”, “falsifikimit” dhe “fshehjes së të ardhurave”.
Biznesmenët akuzohen se prodhonin fatura fiktive shit-blerjesh me qëllim përfitimin e TVSH-së. Sipas njoftimit të Policisë së Tiranës në shtator 2019, vlera e faturave fiktive është 182.6 milionë lekë me një dëm prej 25.7 milionë lekë të reja si rimbursim TVSH-je për buxhetin e shtetit.
Ndërkohë që sipas prokurorisë në skemën e mashtrimit ishin përfshirë 50 kompani të fushave të ndryshme dhe përveç 15 personave të arrestuar, u shpallën në kërkim edhe 35 të tjerë.
Prokuroria bëri me dije se, skema më e fundit mashtruese është realizuar prej vitit 2017 përmes pesë kompanive “fantazmë”, të cilat ndonëse rezultonin me aktivitet dhe xhiro zero në Drejtorinë e Tatimeve, prodhonin fatura multimilionëshe, përmes transaksioneve fiktive për llogari të kompanive të akuzuara. Pra mashtrimi ka ndodhur pikërisht në kulmin e punëve publike të dhëna nga qeveria e Ramës për këtë biznesmen.
“G.P.G Company” është më e madhja mes kompanive nën hetim nga Prokuroria e Tiranës, me kapital prej 1 miliard lekësh dhe xhiro vjetore prej 1.4 miliardë lekësh.
Prokuroria ka identifikuar gjithashtu pesë kompanitë fantazmë, të cilat dyshohet se përdoreshin për shit-blerjet fiktive ndonëse nuk rezultojnë të kenë asnjë aktivitet real, por administratorët e tyre po hetohen.
Përmendëm këto fakte të pakontestueshme për të treguar qartë se kriteri bazë i përzgjedhjes së biznesve për t’u ‘sajdisur’ nga kryeministri është të qenit brenda oborrit të qeverisë dhe mbi të gjitha niveli i lartë i maskarallëkut./Pamfleti
