Kryeministri Edi Rama inspektoi sot kantierin e punimeve për rindërtimin e shtëpive të banorëve të prekur nga tërmeti i 26 nëntorit në Fushë-Krujë. Shefi i qeverisë ishte i shoqëruar edhe nga ministri për Rindërtimin, Arben Ahmetaj, i cili bëri të ditur se kjo do të jetë një nga zonat më të bukura të rindërtimit.
“Bëjini me disa ngjyra, jo shumë, por që të ketë një lloj kombinimi dhe i jep një atmosferë tjetër”, tha ndër të tjera kryeministri Edi Rama.
Po kështu u bë e ditur se brenda një periudhë të shkurtër do të fillojë edhe rindërtimi i pallateve. Lagja e quajtur “Rilindja” shtrihet në 10 hektarë tokë dhe në pak javë nisin themelet për 15 pallate banimi me 100 apartamente, të cilave do t’u bashkëngjiten qendra shëndetësore, zyrat e shërbimeve, zonat e gjelbra dhe një treg modern për produktet e zonës. Për kreun e qeverisë, kjo lagje e re do të ndryshojë rrënjësisht jetën e banorëve.
