Rama duket se nuk po i lë gjë mangut paraardhësit të tij, Sali Berisha, kur flasin për krahasime të Shqipërisë me vendet më të përparuara të botës.
Kryeministri Edi Rama ditën e sotme ka publikuar vlerësimin e revistës prestigjoze ‘Lancet’, e cila merret me vlerësimin e sistemit të shëndetësisë.
Përmes një videoje të publikuar në profilin e tij, Rama shpjegon se Shqipëria është vlerësuar me 70 pikë dhe mban pikët më të larta në rajon. Sipas revistës, Shqipëria është rënditur me 70 pikë, Serbia me 63, Mali i Zi 66 pikë, Maqedonia e Veriut me 61 pikë dhe Bosnjë Hercegovina me 64 pikë.
“MIRËMËNGJES dhe me këtë vlerësim kuptimplotë për punën tonë transformuese për shëndetësinë nga prestigjozja botërore “Lancet”, e mirënjohur për nivelin e lartë të kompetencës profesionale mbi sektorin e shëndetësisë, e cila e rendit Shqipërinë me pikët më të larta në rajon dhe në një grup me disa nga vendet lindore të Bashkimit Europian, ju uroj një ditë të mbarë,” shkruan Rama.
Po ndërsa Rama në video mburret se ka lënë pas Turqinë duhet bërë një analizë e ftohtë e nuk duhen parë vetëm shifrat e propozuara nga kryeministri. Studimi i “Lancet” në fakt nuk vlerëson drejtpërdrejt sistemin shëndetësor, por mbulimin që ai bën në respekt të nevojës së qytetarëve.
Shqipërisë në fakt nuk është se i mungojnë qendrat shëndetësore, por i mungon shërbimi. Nuk disponojmë teknologji adeguate, mjekët më të mirë kanë ikur nga vendi për shkak të pagave të ulëta, korrupsioni në spitale vazhdon, tregues këto që zhbëjnë atë që thotë Edi Rama. E kurrsesi se mund të jemi më të mirë se Turqia në shëndetësi, vend që është avangard në botë në këtë fushë.
SHIKO VIDEON: https://www.facebook.com/edirama.al/videos/779916759223516/
