Rama u dha Dulakëve portin me koncension 1 euro për 20 vjet, ata nxjerrin Sarandën nga harta turistike e Mesdheut. Shumëfishojnë çmimet

Rama u dha Dulakëve portin me koncension 1 euro për 20 vjet, ata nxjerrin Sarandën nga harta turistike e Mesdheut. Shumëfishojnë çmimet

“Pamfleti” para dy muajsh ngriti shqetësimin që Edi Rama i jep portin e Sarandës për 20 vite Dulakëve që janë pronarë të Vizion Plus thjeshtë dhe vetëm për mbështetje mediatike.

Bëhej fjalë për ish-bazën ushtarake të Sarandës me një sipërfaqe prej 5 370 m2, nga të cilat 90 m2 janë sipërfaqe objekt dhe 5 280 m2 janë sipërfaqe funksionale, në përgjegjësi administrimi të Portit Detar, sh.a., Sarandë.

Këshilli i Ministrave, vendosi në mungesë të kryeministrit Edi Rama dhe me firmën e zv.kryeministres Senida Mesi dhënien e miratimit për lidhjen e kontratës së qirasë me tarifën 1 euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë “Concord Investment”, sh.p.k., si qiramarrës, për pasurinë “Pjesë të ambienteve të Portit të Limjonit”, Sarandë.

Kompania në fjalë e cila merr në zotërim koncesionin e rëndësishëm ka si administrator Genci Dulakun, dhe mes ortakëve të firmës figuron edhe Artan Dulaku, ndërtuesi i njohur dhe pronari i televizionit Vizion Plus.

Dhe kur nuk kanë kaluar as dy muaj nga dhënia me koncesion me një afat 20 vjet, e Portit të Limjonit në Sarandë, duket se janë shfaqur edhe pakënaqësitë e para, lidhur me një praktikë që po zbatohet nga koncensionari, me përfaqësues Dulakët.

Kompanitë kryesore të karburanteve në vend kanë marrë së fundmi një njoftim se për çdo litër karburant që do të fusin në këtë port për të furnizuar jahtet apo kroçerat, sipas kontraktimeve të bëra nga agjencitë turistike, do të paguajnë 0.06 euro për litër.

Aktorët kryesorë që operojnë në tregtimin me shumicë dhe pakicë të karburanteve thanë se ky është një precedent tërësisht shqiptar, pasi praktikat ndërkombëtare të menaxhimit të porteve janë të ndryshme.

“Zakonisht në të tilla raste kompania që ka nën menaxhim portin vendos tarifë fikse për shërbimin ndaj klientit që ankoron jahtin apo kroçerën dhe këto shërbime fillojnë nga furnizimi me naftë, ujë, cigare, pije e kështu me radhë.

Por kurrsesi nuk mund të ndërhyhet tek çmimi final i produktit. Vetëm kjo 0.06 euro është një rritje prej 8 lekësh në çmimin final të karburantit dhe kjo e heq nga harta Shqipërinë si mundësi për furnizimin me karburant të jahteve dhe kroçerave pasi do  të preferohen porte të tjera në Maltë, Itali apo Kroaci të cilët për nga cilësia” shpreh shqetësimin e tij te Monitor përfaqësuesi i njërës prej kompanive kryesore në treg.

Sipas tij ka shumë pak kohë që Shqipëria është kthyer në një “stacion” për furnizimin me karburant dhe pika e saj e vetme që mund të sillte jahtet apo krocerat për furnizim ishte çmimi disi i lirë. Ndërkohe që cilësia e portit apo shërbimeve të tjera s’kanë të krahasuar me portet e tjera të Mesdheut.

“Le të mos shkojmë tek portet e rajonit, mjaft të shohim portet e tjera të shkarkimit dhe depozitimit të karburanteve në vend që të kuptojmë se niveli i tarifës që është vendosur është goxha i lartë.

La Petrolifera në Vlorë kërkon për shkarkim dhe depozitim 30 ditë 7.5 euro për ton ndërkohë që Romano Port kërkon 4.5 euro ton në shkarkim.

Në Portin e Limjonit për 1 ton kostoja shtesë është 72 euro” u shprehën përfaqësues të kompanive të tregtimit të karburaneve në vend.

Sasia e kontraktuar nga agjencitë turistike deri më tani për furnizimin me karburant të jahteve dhe kroçerave është 35 mijë ton çka përkthehet në një fitim prej më shumë se 2.5 milionë euro për kompaninë koncesionare.

Shkresa që njofton kompanitë e karburanteve për këtë tarifë është dërguar nga Homeport Albania një kompani e regjistruar në Qendrën Kombëtare të Biznesit më 7 maj 2018 me objekt të saj shërbime portuale, furnizim karburantesh, menaxhim marine, shërbime furnizimi të përgjithshme për mjetet detare.

Administratori i saj Fatos Demiri u shpreh se kompania është thjesht e nënkontraktuar për menaxhimin.

 

Porti i Limjonit u dha me 1 euro, do investohen 3.8 milionë euro

 

Në fund të prillit 2018 me një vendim të veçantë qeveria i kaloi me qira portin e Limjonit në Sarandë kompanisë Concord Investment sh.p.k kundrejt vlerës simbolike prej 1 euro për 20 vjet.

 Referuar detajeve të dhëna në vendim saktësohet se sipërfaqja dhënë me qira është pjesë e ambienteve të Portit të Limjonit, Sarandë, me nr. pasurie 5/232, zona kadastrale 8641, me sipërfaqe të përgjithshme prej 5 370  m2.

Të paktën 90 m2 janë sipërfaqe objekt dhe 5 280 m2 janë sipërfaqe funksionale, në përgjegjësi administrimi të Portit Detar, sh.a., Sarandë.

Në planin e saj të biznesit kompania koncesionare e ka parashikuar investimet në dy faza me një total prej 3.8 milionë euro.

Faza e parë e investimit përfshin pak më shumë se 58 mijë euro dhe do të realizohet brenda 20 muajsh nga data e fillimit çka korrespondon me fundin e vitit 2019.

Kjo vlerë investimi do të konsistojë në vendosjen e 3 depozitave me kapacitet: 2000 tonë për furnizimin e mjeteve me naftë, 100 ton për furnizimin e mjeteve me benzinë dhe 200 tonë për ujë.

Ndërtimi i rrugëve për kalimin e automjeteve dhe këmbësorëve, blerje makineri e mjete të tjera, mobilimi i zyrave për fillimin e punës.

Në fazën e dytë është parashikuar pjesa më e madhe e investimit me një vlerë rreth 3.3 milionë euro. Punimet pritet të zgjasin 44 muaj dhe mbylla e tyre mendohet të jetë diku rreth fundit të vitit 2021.

Kjo fazë konsiston në vënien e plotë në shfrytëzim të kantierit detar, me të gjithë infrastrukturën moderne përkatëse për pritjen e mjeteve detare, pasagjerë e mallra.

Ndër të tjera punimet përfshijnë ndërtimin e kalatës së re, ndërtimi i kapanonit të kantierit, blerje e pjesës teknike (mjete shkarkuese), zhvillimi në gjatësi i rrugëve, krijimi i sipërfaqeve të gjelbëruara, parkimi të hapur, sistemi zjarrfikës, sistemi ndriçimi dhe sinjalizimi, ndërtimi i kullës së kontrollit ndërtimi i sipërfaqeve për shërbime civile, ndërtimi i ofiçinës së servisit.  Numri i të punësuarve parashikohet të jetë rreth 30 në dy faza.

Ndërkohë që në vitin 2012, qeveria e Sali Berishës e kishte kaluar në privatizim pjesën në fjalë. Sidoqoftë vlen të theksohet se dhënia me koncesion për 20 vjet e kësaj pjese të portit për ngarkesa (kargo) mallrash, pra ndryshe nga terminali i trageteve për udhëtarët, është një periudhë e konsiderueshme.

Ky koncension me një euro u mor nga Dulakët që kanë në pronësi dhe Vizion Plus të cilët kanë marrë një sërë koncesionesh nga kryeministri Edi rama, mes tyre dhe për ndërtimin e një fshati turistik në Gjirin e Lalzit.

Mbetet mister se çfarë ka përfituar kryeministri Edi Rama për këtë firmë të hedhur në favor të Dulakëve dhe mos ka ndonjë ortakëri mes përfaqësuesve të familjes së tij dhe Dulakëve.

Të cilët tashmë ndjehen të qetësuar dhe nuk ka më sulme me median e tyre kundër kryeministrit.

Tashmë si hap të parë me këtë koncesion kanë vendosur largimin e jahteve dhe krocereve nga Saranda, duke e nxjerrë nga harta turistike këtë perlë të Jonit dhe Mesdheut./Pamfleti