Amerikanët e sollën të kopsitur dosjen e falsifikimit të vulës apostile të SHBA dhe mashtrimit me kompaninë, prapa të cilës qëndron Bashkim Ulaj që në dhjetor 2018 si dhe dëshminë e ish ministrit të Infrastrukturës, dhënë në ambasadën e SHBA. Kanë kaluar 7 muaj, ndërsa prokuroria shqiptare vetëm sa e ka pyetur ish kreun e ARRSH dhe atë të OST, pa mundur ta dërgojë dosjen në gjykatë për të ndëshkuar përgjegjësit që kërkuan të abuzonin me tenderat me vlerë 30 milionë euro te Unaza e Re dhe interkoneksioni Burrel-Peshkopi. Kryeprokurorja e përkohëshme kërkon një mandat 7 vjeçar nga Rama, ndaj bindet si “ogiçe”.
Prokuroria ka marrë në “dorëzim” të gjitha dokumentet e provat për të hetuar skandalin e mashtrimit përmes falsifikimit të tenderave nga kompania “DH Albania”, që në fillim të dhjetorit të vitit të kaluar.
Dosja e falsifikimit dhe mashtrimit e kësaj kompanie, prapa të cilës fshihej Bashkim Ulaj, oligarku klient i Ramës ishte e kopsitur me detaje nga organet ligjzbatuese amerikane, duke pasur brenda të gjitha provat dhe faktet, ndërsa organit shqiptar të akuzës i mbetej vetëm seanca e pyetjeve dhe dërgimi në gjykatë.
Megjithatë, që më 10 dhjetor të vitit të kaluar, Prokuroria e Tiranës ka administruar të gjithë dokumentacionin që kompania “DH Albania” dorëzoi në dy institucionet nga të cilat fitoi dy tenderë me vlerë 30 milionë euro, ndërsa ende vijon ta mbajë në “konservim” këtë dosje.
Autoriteti Rrugor ka vënë në dispozicion të hetuesve të gjithë procedurën e tenderimit të lotit të parë të Unazës së Re, për të cilin do të lëvroheshin 18 milionë euro.
Ndërsa OST, ka vënë në dizpozicion të organit të akuzës procedurën e tenderimit të 12 milionë eurove, për ndërtimin e linjës së interkoneksionit 220 kilovolt, Burrel-Peshkopi.
Njëherësh, organi i akuzës kishte marrë përsipër që të verifikojë veprimet e drejtuesve të kompanisë “DH Albania” dhe posaçërisht të Avdjol Dobit, përfaqësuesit ligjor të saj, kompani prapa të cilës qëndronte Bashkim Ulaj.
Në qendër të hetimeve janë falsifikimi i dokumenteve nga “DH Albania” dhe mënyra se si tenderi iu dha një kompanie fantazmë, me përfaqësues një 26-vjeçar që punën më të rëndësishme përpara se të përfaqësonte ligjërisht këtë kompani, ka pasur atë të recepsionistit në një spital privat.
Pas këqyrjes së këtyre materialeve voluminoze nga ARRSH dhe OST, Prokuroria lëshoi dhe fletëthirrjet e para, në drejtim të kreut të ARRSH Afrim Qendro dhe atij të OST Klodian Gradeci, të cilët u morën në pyetje.
Pavarësisht se në dokumentet e kompanisë rezultojnë emrat e përfaqësuesit ligjor, Avdjol Dobi, të noteres Xhevahire Brahja dhe përkthyeses Shenda Kruja, që s’figuron në listën e përkthyesve zyrtarë të Ministrisë së Jashtme, çka do të thotë se përkthimi i saj s’është ligjërisht i vlefshëm, e vërteta është se prapa kësaj kompanie qëndron kompania “Gener 2” e Ulajt.
Madje edhe përkthyesja ishte në “borderonë” e Ulajt, ndërsa disa pagesa në emër të “DH Albania” janë paguar nga ana e kompanisë “Gener 2”, ku dhe adresën e kishin të njejtë.
Ndërkohë që në tryezën e prokurorëve është dhe dëshmia e ish ministrit të Infrastrukturës dhe Energjetikës, të dhënë në ambasadën amerikane, menjëherë pas plasjes së skandalit, si dhe përgjigjia zyrtare që autoritetet amerikane kthyen, në të cilin konfirmohej se firma e Sekretarit të Shtetit të Delavare dhe bilanci i kompanisë ishin të falsifikuara.
Në atë kohë, paralel me thirrjen në prokurori të krerëve të institucioneve që kishin organizuar tenderat me vlerë 30 milionë euro, ministrja e re e Infrastrukturës dhe Energjisë Belinda Balluku që pasoi Damian Gjiknurin e shkarkuar në këtë post, liroi nga detyra Qendron dhe Gradecin.
Madje u deklarua se hetimi nuk ka shumë punë për të përfunduar pasi gjithçka është e qartë dhe dosja është e kopsitur, duke paralajmëruar një gjykim të shpejtë dhe ekzemplar për ata që mundësuan këtë mashtrim të madh, duke filluar nga Gjiknuri, vijuar me ish drejtorët Qendro dhe Gradeci, dhe përfunduar me oligarkun Bashkim Ulaj.
Hetimi në Prokurorinë e Tiranës është në varësi vetingut të udhëheqësve të saj.
Megjithëse kanë kaluar 7 muaj nga fillimi i këtij hetimi, në dukje i mbyllur që kur nisi, dhe ende dosja s’ka shkuar në gjykatë e për pasojë përgjegjësit kryesore të abuzimit me 30 milionë eurot e shqiptarëve, nuk kanë dalë para drejtësisë për të marrë atë që u takon nga barra e përgjegjësisë.
Prioriteti që iu dha Gjiknurit në qarkun e Vlorës ku kryeministri është dhe deputet, gjatë fushatës së 30 qershorit, i mbështetur dhe nga Afrim Qendro, tregon qartë se Rama e ka bllokuar hetimin e tyre, duke urdhëruar Arta Markun që ta “arkivojë” çështjen.
Kryeprokurorja e përkohëshme kërkon një mandat 7 vjeçar nga Rama, ndaj bindet si “ogiçe”./Pamfleti
