Ndërsa zgjedhjet afrojnë, ‘ushtarët e kryeministrit Rama’ raportojnë se situata ekonomike dhe jo vetëm, në Shqipëri është shumë mirë krahasuar edhe me Europën.
Deputeti i Partisë Socialiste Ervin Bushati është shprehur mbrëmjen e djeshme për “Ekopolitikë”, se ekonomia e Shqipërisë u godit rëndë jo vetëm nga pandemia, por edhe nga dy tërmetet e vitit 2019, ku ai i 26 nëntorit ishte shkatërrimtar.
Sipas tij, edhe pse pandemia ka goditur ekonominë e të gjithë botës, sërish Shqipëria vazhdon përpara në mënyrë dinjitoze.
“Akoma kemi njerëz të pa akomoduar nga pasojat që la pas tërmeti i 2019-ës. Këto kanë bërë që ekonomia të ketë një tkurrje rreth 6 %. Është një tkurrje e menaxhueshme. Franca e ka 9 % në raport me GDP-në. Këto janë forca madhore që nuk i përgatitesh dhe i pret. Më keq se kaq nuk bëhet, nuk mund të kombinohet më. Ja dhe një tërmet që filloi që në shtator të vitit 2019. Një tërmet tjetër në nëntor, që ishte i rëndë, frenoi shumë turizmin. Duhet të ndihmoheshin këto qytetarë. Më pas filloi pandemia dhe bllokoi të gjithë botën.
Ne kishim mbi kurriz dhe tërmetin e 2019-ës. Sot 91 % e bizneseve të Shqipërisë nuk paguajnë tatim-fitimin. Unë pres të kemi një sektor ndërtimi shumë më të rritur. Do të jenë dyfishi i asaj që kanë qenë. Në të gjithë vendet e botës ndërhyrja e shtetit në ekonomi ka qenë masive. Përtej teorive të majta dhe të djathta, në të gjithë vendet e botës ndërhyrjet kanë qenë masive. Vendet që ne mund t’i quajmë më të djathta se sa ne, ndërhyrjet i kanë pasur masive. Shqipëria sido që të jetë në mënyrë dinjitoze vazhdon përpara. Turizmi u mbajt mirë, ka vende që u bllokuan totalisht. Ne e kishim 60% të turizmit”, tha Bushati.
