Kryeministri Avdullah Hoti është vënë në veprim pasi pak orë më parë, ushtruesja e detyrës së presidentes, Vjosa Osmani, reagoi për emërimin e të birit të deputetit Haxhi Shala konsull në Pragë.
Osmani po ashtu pati kritika për Qeverinë se deri më tash, me gjithë kërkesën e saj, nuk ka marrë për shqyrtim asnjë dokument sa i përket shërbimit diplomatik.
Ndërkohë, Hoti përmes një postimi në Facebook, ka bërë të ditur se ka biseduar me Osmanin dhe se e ka njoftuar se Qeveria së shpejti do të mbyllë analizën e rishikimit funksional të rrjetit të misioneve diplomatike të Kosovës.
“E njoftova znj. Osmani se Qeveria e Republikës së Kosovës do të përmbyllë së shpejti analizën e rishikimit funksional të rrjetit të misioneve diplomatike të Kosovës. Mbi bazën e kësaj analize, do të ndërmerren të gjitha veprimet e nevojshme: (1) për të siguruar funksionim efikas të misioneve diplomatike të Republikës së Kosovës; dhe (2) përbërja e misioneve diplomatike të jetë në përputhje me ligjin”, ka shkruar Hoti në Facebook.
I biri i deputetit Haxhi Shala, Flakroni, është emëruar konsull në Pragë. Shala ishte kyç në formimin e Qeverisë Hoti.
