Bota19 Prill 2019, 08:27

SHBA shton trysninë ndaj Kubës për rolin në Venezuelë

Shkruar nga Pamfleti
SHBA shton trysninë ndaj Kubës për rolin në Venezuelë

SHBA shton trysninë ndaj Kubës për rolin në Venezuelë

Shtetet e Bashkuara po zbatojnë masa të reja të ashpra për të goditur Kubën dhe për të dekurajuar mbështetjen e saj për Presidentin e Venezuelës, Nicholas Maduro. Në një ndryshim të madh politikash, administrata e Presidentit Trump u lejon shtetasve amerikanë të padisin kompanitë e huaja dhe individët që përdorin pronat në Kubë, të cilat u janë konfiskuar dekada më parë nga qeveria komuniste e udhëheqësit të atëhershëm kuban, Fidel Castro. Korrespondentja e Zërit të Amerikës në Departmentin e Shtetit, Cindy Saine sjellë hollësitë.

Me përkeqësimin e gjendjes në Venezuelë, ndërsa kriza politike atje po vazhdon, këshilltari i Sigurisë Kombëtare John Bolton njoftoi të mërkurën sanksione të reja të ashpra mbi këtë vend dhe aleatët e tij, Kubën dhe Nikaraguan.

Në një fjalim në Miami, Bolton kritikoi ashpër ish-Presidentin Barak Obama për hapjen me Kubën, duke thënë se Havana po ndihmon qeverinë e Maduros të qëndrojë në pushtet.

“Për të justifikuar politikën e tij për normalizimin e marrëdhënieve me Kubën, Presidenti Obama tha se Kuba “nuk paraqet asnjë kërcënim të vërtetë”. Pyesni diplomatët amerikanë të cilët u sulmuan në Havanë dhe banorët e terrorizuar të Venezuelës”, tha John Bolton, Këshilltar i Sigurisë Kombëtare.

Më parë, Sekretari i Shtetit Mike Pompeo njoftoi se administrata Trump do të fillonte zbatimin e një dispozite të një ligji të vitit 1996 që lejon shtetasit amerikanë që kanë prona të cilat u janë konfiskuar në Kubë gjatë Luftës së Ftohtë për të ngritur padi. Deri më tani, kjo dispozitë, e quajtur Titulli III, ishte pezulluar nga presidentët e mëparshëm.

“Politika e uljes së tensioneve me regjimin ka dështuar. Miqësia me diktatorët kubanezë do të jetë gjithmonë një shenjë e zezë në historinë e gjatë të këtij vendi të madh në fushën e mbrojtjes së të drejtave të njeriut. Për këto arsye, unë jam duke njoftuar se administrata Trump nuk do të pezullojë Titullin III. Duke filluar më 2 maj, e drejta për të ngritur padi në bazë të Titullit III të Aktit Libertad do të zbatohet plotësisht. Unë tashmë e kam informuar Kongresin për vendimin tim”, tha Sekretari i Shtetit Mike Pompeo.

Vendet evropiane kundërshtojnë fuqimisht lejimin e padive kundër kompanive të huaja që bëjnë biznes me Kubën dhe po kërcënojnë të sfidojnë masën tek Organizata Botërore e Tregtisë.

“Këtu në Kubë jemi të vetëdijshëm se transaksionet financiare po bëhen gjithnjë e më të vështira, që është synimi e këtyre masave. Ato kanë për qëllim të dekurajojnë bizneset nga invesimi në Kubë dhe t’i shtyjnë ato të investojnë parat e tyre në Punta Cana, Panama ose Kankun”, thotë Alberto Navarro, Ambasador i BE-së në Kubë

Departamenti amerikan i Thesarit njoftoi gjithashtu ndryshime për të kufizuar udhëtimet jo-familjare nga Shtetet e Bashkuara në Kubë, duke e quajtur atë turizëm të fshehtë.

Bolton tha se qëllimi i kësaj politike është që të lëvizë dollarët amerikanë larg regjimit kuban, shërbimeve të tij ushtarake dhe atyre të sigurisë. Shtetet e Bashkuara gjithashtu kanë vendosur sanksione ndaj Bankës Qendrore të Venezuelës dhe drejtorit të saj, si dhe ndaj qeverisë Ortega në Nikaragua./VOA

Bota John Bolton Këshilltari i Sigurisë Kombëtare Nicolas Maduro presidenti i Venezuelës