Mediet fqinje kanë zbardhur dëshminë e shqiptarit të akuzuar për vrasjen e biznesmenit të njohur grek, pronari i një hoteli në Santorini. I riu ka thënë në polici se 69-vjeçarin Nikos Halaris, nuk i kishte dhënë 200 euro nga puna e kryer dhe se me ato para ai mbante familjen.
“Unë vij dhe punoj me sezone këtu. Kam nënën dhe tre motra në shtëpi. Me punën që bëj mbaj edhe ato me para. Nuk më dha 200 eurot që duhej të më paguante, prandaj ndodhi gjithçka”, tha 20-vjeçari para policisë, ndërsa më tej ai shpjegon se si ndodhi përplasja.
“Shkova t’i kërkoj paratë por ai nuk m’i jepte dhe mori një shishe uiski për të më qëlluar. Unë ia mora shishen dhe gjithçka pas kësaj doli jashtë kontrollit”, vijon i riu.
Më pas, sipas policisë greke, 20-vjeçari e ka goditur disa herë 69-vjeçarin duke e lënë pa ndjenja në zyrën e tij. Më pas ia ka lyer trupin me vodka duke i vënë zjarrin për të zhdukur gjurmët. Mësohet se i riu i ka vjedhë edhe orën e shtrenjtë që biznesmeni mbante në dorë dhe kishte tentuar të hapte kasafortën, por që më pas u largua pa marrë asgjë.
