Të korruptuarit në Shqipëri do vijojnë ta kenë të pamundur të udhëtojnë drejt SHBA. Ambasadorja Yuri Kim pak ditë më parë publikoi shpalljen nongrata të ish-Kryeprokurorit Adriatik Llalla, por si ai ka dhe shumë të tjerë. Departamenti Amerikan i Shtetit në faqen zyrtare në internet publikon raporte periodike mbi masat e marra në kuadër të sesionit 7031(c) në buxhet. Sipas të dhënave të DASH janë mbi 150 persona në 30 shtete që janë shpallur të padëshiruar. Por SHBA thekson se vetëm një pjesë e tyre janë bërë publike, pasi ka shumë të tjerë që janë sekret.
Kur Sekretari i Shtetit shpall një person nongrata, ai vendos ta bëjë publik ose jo. Kur nuk bëhet publik vihet në dijeni vetëm individi. Kjo do të thotë se ashtu si në shumë shtete edhe te ne mund të ketë shumë politikanë që janë shpallur të padëshiruar, por që emrat e tyre nuk janë publikuar. Nëse vihet re, politika shqiptare ka shumë vite që nuk udhëton në SHBA. “Sekretari vendos nëse do t’i informojë publikisht ose privatisht zyrtarët e qeverive të huaja dhe anëtarët e ngushtë të familjes për të cilët ka informacione të besueshme pa marrë parasysh nëse individi ka aplikuar për vizë”, thuhet aty. Nga ana tjetër në faqen e DASH bëhet me dije se Kongresi Amerikan informohet herë pas here mbi zbatimin e sesionit 7031(c) në buxhet.
“Jo më vonë se 30 ditë pas marrjes së vendimit dhe çdo 90 ditë pas tij, Sekretari i Shtetit u paraqet një raport, përfshirë një aneks të klasifikuar nëse është e nevojshme, komiteteve përkatëse të Kongresit dhe Komiteteve për Gjyqësorin duke përshkruar informacionin në lidhje me korrupsionin ose shkeljen e të drejtave të njeriut në lidhje me secilin prej individëve të gjetur të papërshtatshëm në 12 muajt e fundit”, thuhet në sqarimet e DASH. Sipas të dhënave, Adriatik Llalla ishte i pari që u shpall i padëshiruar dhe pas tij e njëjta rrugë është ndjekur për 150 individë për 30 vende. “Penalizimi i parë ndodhi në vitin 2018 (për ish-kryeprokurorin shqiptar Adriatik Llalla) dhe që atëherë janë shpallur të padëshiruar më shumë se 150 individë nga 30 vende të botës. Përfshirë këtu dhe anëtarë të afërt të familjes që janë identifikuar në bazë të përcaktimeve të Nenit 7031(c). Në tre muajt e parë të vitit 2020, Departamenti i Shtetit identifikoi publikisht 30 individë”, thuhet në raport. Më tej theksohet se procesi do të vijojë.
Të ngelurit në veting
Gazeta ka mësuar se përveç vendimeve të DASH, ambasada e SHBA ka bllokuar me qindra viza për zyrtarë të kategorive nga më të ndryshmet. Por mësohet se ata që janë më të penalizuarit janë gjyqtarët dhe prokurorët e ngelur në veting. Janë mbi 100 emra deri më tani që kanë dalë nga sistemi, pasi nuk justifikojnë pasuritë. Pra de fakto ata janë të korruptuar, edhe pse nuk ka nisur një hetim penal ndaj tyre. Sipas burimeve të gazetës, në ambasadën e SHBA shkojnë çdo ditë me dhjetëra denoncime për gjyqtarët dhe prokurorët në vend, sidomos ata që janë në proces vetingu. Kjo do të thotë se amerikanët kanë një listë të qartë me të korruptuarit në sistemin e drejtësisë.
Në raportin e Kongresit theksohet se vetë ambasadës i lind e drejta që të bllokojë vizën emigruese për një individ që ka dyshime se është zyrtar i korruptuar. “Zyrtarë të huaj të korruptuar apo shkelës të të drejtave të njeriut, gjithashtu mund t’i nënshtrohen kufizimit të vizave sipas Nenit 212 të INA (8 U.S.C 1182), e cila u jep të drejtë autoriteteve të bllokojnë hyrjet në SHBA. Një ndër arsyet që mund të përdoret për mos dhënien e vizës është edhe të qenit i dënuar, pjesëmarrje në gjenocid, tortura, shkelje të lirisë fetare, trafikimi, etj”, thuhet më tej në dokument./ Sot.news
