Sekretari i Përgjithshëm i Partisë Demokratike, Arben Ristani, i është kundërpërgjigjur ish-kryetarit të PD Dega Kukës, Ibsen Elezi, i cili tha në Kuvendin e PD-së se Ristani nuk mund të zëvendësojë asesi Ridvan Boden.
Sipas Elezit, Arben Ristani, asnjë ditë anëtar partie u bë sekretar i Përgjithshëm.
“Si mund ta zëvendësojë Ristani Ridvan Boden? Unë nuk e kam votuar Ristanin. Ridvani është njohës i mirë i strukturave. U bë një lobim i deputetëve dhe zgjodhën Ristanin. Ai nuk ka qenë asnjëherë anëtar partie. Doktor nuk duhet ta kishe lejuar këtë”, tha Elezi.
I ftuar në studion e televizionit “ABC News” ai tha: “E respektoj Ridvan Boden, kam kërkuar këshilla dhe jam konsultuar me të.”, ndërsa shtoi se ai vetë ka kontribute në PD.
Ristani u shpreh se nuk e priste që fjalimi i Elezit të kalonte në sulme personale, ndërsa tha: “Janë njerëz që u mungojnë tribunat, dhe ndaj kur u vjen mundësia flasin gjithçka.”
